ސްރީލަންކާއިން ރާއްޖެއާއެކު ބާއްވަމުން އަންނަ ބަދަހި ގުޅުމަށް ފޮރިން މިނިސްޓަރުގެ ތަޢުރީފު
"ސްރީލަންކާ- މޯލްޑިވްސް ޖޮއިންޓް ކޮމިޝަން" އަންނަ އަހަރުގެ ފުރަތަމަ ތިންމަަސް ދުވަހުގެ ތެރޭގައި ބޭއްވުމަށް ނިންމެވި
ރާއްޖެއާއި ސްރީލަންކާގެ ފޮރިން މިނިސްޓަރުންގެ ބައްދަލުވުން
ދިވެހި ރާއްޖޭގެ އިޖްތިމާޢީ އިޤްތިޞާދީ ތަރައްޤީގެ ޒަމާންވީ ބައިވެރިއެއްގެ ގޮތުގައި ސްރީލަންކާގެ ދެމިއޮންނާތީ ، ރާއްޖޭގެ ފޮރިން މިނިސްޓަރު ސްރީލަންކާއަށް ތަޢުރީފުކުރައްވައިފިއެވެ.
ސްރީލަންކާއަށް ކުރެއްވި ތިން ދުވަހުގެ ރަސްމީ ދަތުރުފުޅުގެ ތެރެއިން އެޤައުމުގެ ފޮރިން މިނިސްޓަރ ދިނޭޝް ގުނަވަރްދަނާއާއެކު ބޭއްވި ބައްދަލުވުމުގައި ދިވެހި ރާއްޖޭގެ ފޮރިން މިނިސްޓަރ އަބްދުﷲ ޝާހިދު ވިދާޅުވީ އިޖްތިމާޢީ އިޤްތިޞާދީ ތަރައްޤީގައި ދެޤައުމުން އެއްބާރުލުންދެމުން އައުމަކީ، ދޭދޭ ގުޅުމުގެ ބަދަހިކަން ދައްކުވައިދޭކަމެއް ކަމުގައެވެ. އަދި މީގެ ސަބަބުން ދޭދޭ ގުޅުމަށް އިތުބާރު ލިބި، އިހްތިރާމު ލިބޭ ގާތްގުޅުމަކަށް މަގުފަހިވެގެންދާނެކަމަށެވެ.
ސްރީލަންކާގެ ފޮރިން މިނިސްޓްރީގައި ބޭއްވި މިބައްދަލުވުމުގައި ފޮރިން މިނިސްޓަރ ވަނީ ދިވެހި ރާއްޖޭގެ ވިޔަފާރިއާއި، އިޤްތިޞާދާއި، ފަތުރުވެރިކަމާއި، ޒުވާނުން ބިނާކުރުމަށާއި، ޞިއްހަތާއި، ތަޢުލީމާއި، އިޖްތިމާޢީ ރައްކާތެރިކަން ކަށަވަރުކުރުމަށާއި، އިންސާނީ ވަޞިލަތް ތަރައްޤީ ކުރަން ދިވެހި ސަރުކާރުން ކުރަމުންދާ މަސައްކަތުގައި ސްރީލަންކާއިން ދޭ އެއްބާރުލުން ފާހަގަކުރައްވާ ތަޢުރީފު ކުރައްވާފައެެވެ. އަދި ރާއްޖެއިން ކޮމަންވެލްތު ޖަމާއަތުގައި އަލުން ބައިވެރިވުމަށް ކުރަމުން ގެންދާ މަސައްކަތައް ސްރީލަންކާއިން އެއްބާރުލުން ދެމުންދާތީ ފޮރިން މިނިސްޓަރ ވަނީ ސްރިލަންކާ ސަރުކާރަށް ޝުކުރު ދަންނަވާފައެެވެ.
މި ބައްދަލުވުމުގައި ވާހަކަފުޅު ދައްކަވަމުން ސްރީލަންކާގެ ފޮރިން މިނިސްޓަރ ދިނޭޝް ގުނަވަރްދަނާ ވަނީ ދެޤައުމުން އެކި ކަންކަމުގައި ޞަރަޙައްދީ އަދި ބައިނަލްއަޤުވާމީ މައިދާނުގައި ދެމުންދާ އެއްބާރުލުން ދެމެހެއްޓުމުގެ މުހިންމުކަމުގެ މައްޗަށް އަލިއަޅުވާލާ ވާހަަކަފުޅު ދައްކަވާފައެވެ.
ދެ މިނިސްޓަރުން ވަނީ މި ބައްދަލުވުމުގައި "ސްރީލަންކާ- މޯލްޑިވްސް ޖޮއިންޓް ކޮމިޝަން" އަންނަ އަހަރުގެ ފުރަތަމަ ތިންމަަސް ދުވަހުގެ ތެރޭގައި ބޭއްވުމަށް އެއްބަސްވެވަޑައިގެންފައެވެ. އިޤްތިޞާދީ ތަރައްޤީގެ ދާއިރާއިން އެއްބާރުލުން ދިނުމަށް ބާއްވާ މި ބައްދަލުވުމުގައި މަސްވެރިކަމާއި، ދަނޑުވެރިކަމާއި، ޞިއްހީ، ތަޢުލީމާއި، ފަތުރުވެރިކަމާއި، ޘަޤާފީ ދާއިރާއިން ދެޤައުމުގެ ދެމެދުގައި އެއްބާރުލުން ދެވިދާނޭ ގޮތްތަކާއި ބެހޭ ގޮތުން މަޝްވަރާ ކުރެއްވުމަށް ވަނީ ހަމަޖެހިފައެވެ.
ފޮރިން މިނިސްޓަރ ވަނީ ސްރީލަންކާގެ ފޮރިން މިނިސްޓަރ ރާއްޖެއަށް ވަޑައިގެންނެވުމަށް ރަސްމީ ގޮތުން ދަޢުވަތު އަރުވާފައެވެ. އަދި މިބައްދަލުވުމުގައި އެ ދަޢުވަތު ޤަބޫލުކުރައްވާ ރާއްޖެއަށް ވަޑައިގަންނަވާނެކަމުގެ ޔަޤީންކަން ސްރީލަންކާގެ ފޮރިން މިނިސްޓަރ ވަނީ ދެއްވާފައެވެ.
ފޮރިން މިނިސްޓަރާއެކު، ރާއްޖެއިން ސްރީލަންކާއަށް ކަނޑައަޅުއްވާފައި ހުންނަވާ ސަފީރު އުމަރު އަބްދުއް ރައްޒާޤާއި، ޑެޕިއުޓީ ހެޑް އޮފ މިޝަން ޚަދީޖާ ނަޖީހާ ބައިވެރި ވަޑައިގެންނެވިއެވެ.
ފޮރިން މިނިސްޓަރ ސްރީލަންކާއަށް ކުރައްވާ ދަތުރުފުޅުގައި މިިދިޔަ ބުރާސްފަތި ދުވަހު ވަނީ، ސްރީލަންކާގެ ރައީސް ގޯޓާބަޔާ ރާޖަޕަކްސަައާއި ބޮޑުވަޒީރު މަހިންދަ ރާޖަޕަކްސައާއި ބައްދަލުކުރައްވާފައެވެ.
