ސައުތު އޭޝިއަން ގޭމްސް: ދެވަނަ މެޗުންވެސް ފިރިހެން ފުޓްބޯޅަ ޓީމު އެއްވަރުވެއްޖެ

ސައުތު އޭޝިއަން ގޭމްސްގައި ރާއްޖޭގެ ފިރިހެން ގައުމީ ފުޓްބޯޅަ ޓީމުން ކުޅުން ދެވަނަ މެޗުންވެސް އެއްވަރުވެއްޖެއެވެ.

ފިރިހެން ޓީމު އަންގާރަ ދުވަހު ނިކުތީ ބަންގްލަދޭޝާ ދެކޮޅަށެވެ. މި މެޗު ނިމިފައިވަނީ 1-1 ގެ ނަތީޖާއަކުންނެވެ.

މި މެޗުގެ ލީޑް ބަންގްލަދޭޝުން ނަގާފައިވަނީ ފުރަތަމަ ހާފުގައި، 20 ވަނަ މިނެޓުގައެވެ. އެއީ އަކްރަމް ޣަނީ ބައިކޮޅަށް ޖެހި ލަނޑެކެވެ. ފުރަތަމަ ހާފު ނިމިފައިވަނީ 1-0 ގެ ނަތީޖާއަކުން ބަންގްލަދޭޝް ކުރީގައި އޮވެގެންނެވެ. ނަމަވެސް، ދެ ވަނަ ހާފުގެ 70 ވަނަ މިނެޓްގައި އިބްރާހިމް ހަސަންގެ ލަނޑަކާ އެކު މެޗް އެއްވަރުވިއެވެ.

މި މުބާރާތުގައި ރާއްޖޭގެ ޓީމު ފުރަތަމަ ކުޅެން ޖެހުނީ ސްރީލަންކާއާ ދެކޮޅަށެވެ. މި މެޗުވެސް އެއްވަރުވި އިރު، އެއްވެސް ކޮޅަކަށް ގޯލެއް ޖެހިފައެއް ނުވެއެވެ.

ރާއްޖޭގެ ފިރިހެން ފުޓުބޯޅަ ޓީމް ދެން ނިކުންނާނީ ބޫޓާނާ ދެކޮޅަށެވެ. މި މެޗު ބުރާސްފަތި ދުވަހު ބާއްވަން ހަމަޖެހިފައިވާއިރު، ރާއްޖެއާއި މުބާރާތް ބާއްވާ ގައުމުކަމަށްވާ ނޭޕާލް ކުޅޭނީ ހުކުރު ދުވަހުއެވެ.

ސައުތު އޭޝިއަން ގޭމްސް 2019ގެ ޕޮއިންޓް ތާވަލަށް ބަލާއިރު، ނޭޕާލާއި، ބޫޓާނަށް ތިން ޕޮއިންޓު ލިބިފައިވެއެވެ. އަދި ދެ ޕޮއިންޓާއެކު ރާއްޖެ އޮތީ ތިން ވަނައިގައެވެ. ސްރީލަންކާއާއި ބަންގްލަދޭޝަށް ލިބިފައިވަނީ (ޓީމްއަކަށް) އެއް ޕޮއިންޓެވެ.