ރ. މާކުރަތު ކޯޓުގެ އިސް މެޖިސްޓްރޭޓް އަދުނާން ހުސައިން މަގާމުން އިސްތިއުފާދެއްވައިފިއެވެ.
އަދުނާނު ހުސައިންގެ އިސްތިއުފާގެ ސިޓީ ޖުޑީޝަލް ސަރވިސް ކޮމިޝަނަށް ލިބިފައިވާކަން އެ ކޮމިޝަނުން ވަނީ ކަށަވަރުކޮށްދީފައެވެ. އިސް މެޖިސްޓްރޭޓް އަދުނާން މަގާމުން އިސްތިއުފާ ދެއްވާފައި މިވަނީ އޭނާގެ ސުލޫޚީ މައްސަލަތަކެއް ސާބިތުވާކަމަށް ނިންމާ، މަގާމުން ވަކިކުރަން ރައްޔިތުންގެ މަޖިލީހަށް ހުށައަޅާފައިވަނިކޮށެވެ.
އިސް މެޖިސްޓްރޭޓް އަދުނާން ވަކިކުރަން ޖޭއެސްސީން ހުށައެޅި ރިޕޯޓް ދިރާސާކުރުމަށް ފަހު، ޖުޑީޝަރީ ކޮމިޓީން ނިންމާފައިވަނީ އެއީ ގާނޫނު އަސާސީއާ އެއްގޮތަށް ނިންމާފައިވާ ނިންމުމެއް ކަމަށެވެ. އަދި އޭނާ މަގާމުން ވަކިކުރުމަށް މަޖިލީހުގެ ތަޅުމަށް ހުށައެޅުމަށް އެ ކޮމިޓީން ވަނީ ފާސްކޮށްފައެވެ.
އަދުނާންގެ މައްޗަށް ސާބިތުވީ ސުލޫކީ މައްސަލަތަކުގެ ތެރޭގައި، ނިމިދިޔަ ރައްޔިތުންގެ މަޖިލީހުގެ އިންތިހާބުގެ ތެރޭގައި އެމްޑީޕީގެ ކެނޑިޑޭޓުންނަށް ވޯޓު ހޯދަން މަސައްކަތް ކުރުމާއި، އެކަމާއި ގުޅޭ ގޮތުން ފޭސްބުކްގައި ޕޯސްޓް ކުރުން ހިމެނެއެވެ. އޭގެ އިތުރުން، އެ މަގާމުގައި ހޭދަކުރެއްވި އަށް އަހަރުގެ ތެރޭގައި ތަފާތު އެކި ފަހަރު މަތިން މާކުރަތު ކޯޓުގައި މަސައްކަތް ކުރި މުވައްޒަފުންނަށް ޖިންސީ ފުރައްސާރި ކުރުމުގެ ޝަކުވާތަކެއް ވެސް ޖޭއެސްސީން ބަލާފައިވެއެވެ.
