ބަޖެޓަށް 366 މިލިއަން އިތުރުކޮށް ކޮމިޓީ ރިޕޯޓް ތަޅުމަށް
މިނިވަން މުއައްސަސާގެ ބަޖެޓު އިތުރު ކޮށްފައިވޭ
2020 ވަނަ އަހަރަށް ލަފާކުރާ ދައުލަތުގެ ބަޖެޓް
އަންނަ އަހަރަށް ލަފާކުރާ ދައުލަތުގެ ބަޖެޓަށް 366 މިލިއަން ރުފިޔާ އިތުރުކޮށް, ރައްޔިތުންގެ މަޖިލީހުގެ ބަޖެޓް ދިރާސާ ކުރާ ކޮމިޓީން އެކުލަވައިލި ރިޕޯޓް މަޖިލީހުގެ ތަޅުމަށް ފޮނުވައިފިއެެވެ.
އަންނަ އަހަރަށް ލަފާކުރާ 37،504،493،680 (ތިރީސް ހަތް ބިލިއަން ފަސްސަތޭކަ ހަތަރު މިލިއަން ހަތަރު ސަތޭކަ ނުވަދިހަ ތިންޙާސް ހަ ސަތޭކަ އަށްޑިހަ ރުފިޔާ) ގެ ބަޖެޓް މަޖިލީހަށް ހުށައަޅާފައިވަނީ މި މަހުގެ ހަތަރު ވަނަ ދުވަހުއެވެ. ބަޖެޓަށް ބަހުސް ކުރުމަށްފަހު އިތުރަށް ދިރާސާ ކުރުމަށް ބަޖެޓް ކޮމިޓީއަށް ފޮނުވައި، ބަޖެޓާއި ގުޅިގެން ސަރުކާރުގެ އިތުރުން މިނިވަން މުއައްސަސާތަކުގެ ވެރިންނާ ކޮމިޓީން ވަނީ މަޝްވަރާ ކޮށްފައެވެ.
ހޯމަ ދުވަހު ބަޖެޓް ދިރާސާކުރި ކޮމިޓީގެ ރިޕޯޓް ވަނީ މަޖިލީހުގެ ވެބްސައިޓްގައި އާއްމު ކޮށްފައެވެ. ކިނބިދޫ ދާއިރާގެ މެމްބަރު މުހައްމަދު ނާޝިޒް މުގައްރިރުކަން ކުރެއްވި ބަޖެޓް ކޮމިޓީން ވަނީ ދައުލަތުގެ ބަޖެޓަށް މުހިއްމު ކަންތައްތަކެއް ހުށައަޅާފައެވެ.
އޭގެތެރޭގައި ސަރުކާރުގެ އިތުރުން މިނިވަން މުއައްސަސާތަކުގެ ބަޖެޓަށް 93.5 (ނުވަދިހަ ތިނެއް ޕޮއިންޓް ފަހެއް) މިލިއަން އިތުރު ކުރުމާއި، ޕީއެސްއައިޕީ އަށް ކަނޑައަޅާފައިވާ 10،181.4 (ދިހާ ހާސް އެއްސަތަކޭ އަށްޑިހަ އެކެއް ޕޮއިންޓް ހަތަރެއް) މިލިއަން ރުފިޔާގެ ޖުމުލަ ބަޖެޓަށް 273.3 (ދުއިސައްތަ ހަަތްދިހަ ތިނެއް ޕޮއިންޓް ތިނެއް) މިލިއަން ރުފިޔާ އިތުރު ކުރުން ހިމެނެއެވެ.
ކޮމިޓީއަށް ހުށައަޅާފައިވާ ބަޖެޓަށް ގެނެވުނު އިސްލާހުތަކާއި އެކު ބަޖެޓުގެ އަދަދު 37،871،314،865 (ތިރީސް ހަތް ބިލިއަން އަށްސަތޭކަ ހަތްދިހަ އެއްމިލިއަން ތިން ސަތޭކަ ސާދަހާސް އަށްސަތޭކަ ފަސްދޮޅަސް ފަހެއް) ވަނީ އިތުރުވެފައެވެ. ކޮމިޓީގެ އިސްލާހުތައް ފާސްކޮށްފައިވަނީ ކޮމިޓީގެ ހުރިހާ މެމްބަރުންގެ އިއްތިފާގުންނެވެ.
ބަޖެޓް ހުށައަޅުއްވަމުން ފިނޭންސް މިނިސްޓަރު އިބްރާހިމް އަމީރު ވިދާޅުވީ، އަންނަ އަހަރު ޖުމްލަ އާމްދަނީ އާއި ހިލޭއެހީގެ ގޮތުގައި ދައުލަތަށް ލިބޭނީ 29.9 ބިލިއަން ރުފިޔާ އެވެ. ޢާމްދަނީގެ ގޮތުގައި އެންމެ ބޮޑު ބައެއް ޙިއްސާކުރަނީ ޓެކްސްގެ ގޮތުގައި ލިބޭ ފައިސާއިންނެވެ. އަންނަ އަހަރު ޓެކްސްގެ ގޮތުގައި 17.9 ބިލިއަން ރުފިޔާ ލިބޭނެކަމަށް ލަފާކޮށްފައިވެ އެވެ.
