ނޫމަރާގައި އަޑިއަށް ދިޔަ ބާޖު މަސް ދުވަސްވީއިރުވެސް ފުންނުކުރެވޭ: ކައުންސިލް
ހިލަތައް މިހާރު ވަނީ ނަގާފައި
ކަނޑިންމަ ކައިރިއަށް އަޑިއަށް ބާޖު
ށ. ނޫރަމާގެ ބަނދަރު މަރާމާތުކުރުމަށް ހިލަ ހިފައިގެން ދިޔަ ބާޖު އަޑިއަށް ދިޔަތާ މަސްދުވަސްވީއިރު ވެސް އަދިވެސް ފުންނުވާކަމަށް އެރަށުގެ ކައުންސިލުން ބުނެފިއެވެ.
ރާއްޖެއެމްވީއަށް އެރަށުގެ ކައުންސިލްގެ ނައިބް ރައީސް ރުކްޝާނާ ހަސަން ވިދާޅުވީ ބަނދަރު މަރާމަތުކުރުމަށް ހިލަ ހިފައިގެން އައި ބާޖުއައި ދުވަސްކޮޅަކީ ވަރަށް ކަނޑުގަދަ ވިއްސާރަ ދުވަސްކޮޅެއް ކަމަށާއި، ތޮށިގަނޑުމަތީގަ ޖެހި، ބާޖުގެ ވާ ކަނޑައިގެން ދިޔަ ކަމަށެވެ. އަދި ބާޖުގެ ފޫގޮސްގެން އަޑިއަށް ދިޔައީ ކަނޑިމަކައިރިއަށް ކަމަށް އޭނާ ވިދާޅުވިއެވެ.
ރުކްޝާނާ ވިދާޅުވީ ބާޖް އެރަށަށް އައީ އޮކްޓޫވަރު މަހުގެ 22 ވަނަ ދުވަހު ކަމަށާއި، ދެވަނައަށްވީ ދުވަހު މިހާދިސާ ހިނގި ކަމަށެވެ. އަދި ވިދާޅުވީ ބާޖުއަޑިއަށް ދިޔައީ ހުރިހާ ހިލަތަކާއެކު ކަމަށެވެ. ނަމަވެސް މިހާރު އެހުރިހާ ހިލަތައް ނަގާ ބާޖު ހުސްކޮށްފައިވާ ކަމަށް އޭނާ ވިދާޅުވިއެވެ.
މީގެ އިތުރުން ރުކްޝާނާ ވިދާޅުވީ އޮޑިދޯނި ފަހަރަށް ފަޅަށް ވަދެ ނުކުމެ ހެދުމަށް ގިނަ ދަތިތަކާއި ކުރިމަތިވާ ކަމަށާއި، މިއީ ރައްޔިތުންގެ ވަރަށް ބޮޑު ޝަކުވާއެއް ކަމަށެވެ.
ކައުންސިލްގެ ފަރާތުން މިމައްސަލަ ސަރުކާރުގެ ސަމާލުކަމަށް ގެނެސްފައިވާކަން ފާހަގަކުރައްވައި ރުކްޝާނާ ވިދާޅުވީ ބާޖުއަޑިއަށް ދިޔަތާ މަސްދުވަސް ފާއިތުވެގެންދާއިރު ވެސް އެނެގުމުގެ މަސައްކަތްކޮށްފައިނުވާ ކަމަށާއި، މިހާރު ބާޖުގެ ބައިތައް ނެއްޓި އޮޔާދާ ކަމަށެވެ. އަދި މިއީ ދަތުރުކުރާ ފަރާތްތަކަށް އޮތް ބިރެއް ކަމަށާއި، އެކަމުގެ ސަބަބުން ފަރަށް ވެސް ބޮޑެތި ގެއްލުންތަކެއްވާނެ ކަމަށެވެ.
ރުކްޝާނާ ވިދާޅުވީ ބަނދަރު މާރާމާތުގެ ކުރިމުގެ މަސައްކަތް އޮގަސްޓް 23 ގައި ފެށި ނަމަވެސް މިހާރު މަސައްކަތް ހުއްޓިފައިވާ ކަމަށެވެ. އަދި އަލުން ބަނދަރުގެ މަސައްކަތް ފެށޭނެ ދުވަހެއް ނޭނގޭ ކަމަށް ބަނދަރު ހެދުމުގެ މަސައްކަތް ކުރާ ފަރާތްތަކާ ހަވާލާދީ އޭނާ ވިދާޅުވިއެވެ.
ނޫމަރާ ބަނދަރު ހެދުމުގެ މަޝްރޫއު ހަވާލުކޮށްފައިވަނީ މިއަހަރުގެ ޖޫން 23 ވަނަ ދުވަހު ސާސް އީ ކޮންސްޓްރަކްޝަން އާ 9،990،500.00 ރުފިޔާ އަށް އެއް އަހަރު ދުވަހުގެ މުއްދަތަށެވެ. މި މަޝްރޫއުގެ ދަށުން 48 މީޓަރުގެ ގްރޯއިން ޖެހުމާއި، 63 މީޓަރުގެ ބޭރުތޮށި އަދި ދެ ނެރު ބައްތި ޖެހުމަށް ވަނީ ހަމަޖެހިފައި ކަމަށް ޕްލޭނިންގް މިނިސްޓްރީ މައުލޫމާތުދެއެވެ.
