ޑިސެމްބަރު މަހު ނޭޕާލުގައި ފަށާ 13 ވަނަ ސައުތް އޭޝިއަން ގޭމްސް އަށް ތައްޔާރުވުމަށް ގައުމީ ސްވިމިންގ ޓީމުން އިންޑިއާއަށް ފުރައިފިއެވެ.

ސައުތް އޭޝިއަން ގޭމްސް ގައި ވާދަކުރާ ސްވިމިންގ ޓީމުގައި ހިމެނިފައިވަނީ 4 އަންހެން ފެތުންތެރިންނާއި 6 ފިރިހިން ފެތުންތެރިންނެވެ. އެއީ އާއިޝަތު ސައުސަން، އާއިޝަތު ސާޖިނާ، އާއިޝަތު އުލްޔާ ޝާއިގް، ހަމްނާ އަހުމަދު، މުބާލް އައްޒާމް އިބްރާހީމް، އަލީ އިއްމާން، ހަސަން އަޝްރަފް، ހުސެއިން ހާއިޝް ހަސަން، ހުސައިން މުބާހު އަދި މުހައްމަދު އާން ހުސައިންއެވެ.

މުބާލް އައްޒާމް އިބްރާހީމާއި އާއިޝަތު ސާޖިނާ ފިޔަވާ ދެން ތިބި ފެތުންތެރިން އިންޑިއާގައި ކޭމްޕް ކުރާނެއެވެ. މުބާލް އަދި ސާޖިނާ އަކީ އޮސްޓްރޭލިއާ އަދި މެލޭޝިޔާގައި އޮލިމްޕިކް ސްކޮލާޝިޕްގެ ދަށުން ފަރިތަކުރުންތައް ފުރިހަމަކުރަމުންދާ ދެ ފެތުންތެރިންނެވެ.

ސައުތް އޭޝިއަން ގޭމްސްގައި ވާދަކުރާ ސްވިމިންގ ޓީމުގެ މެނޭޖަރަކީ ކުރިން ގައުމީ ރެކޯޑްތައް ހަދައިފައިވާ އޮލިމްޕިކް ފެތުންތެރިޔާ ފާތިމަތު ފާރިހާ އެވެ. އަދި ކޯޗުންގެ ގޮތުގައި ގައުމީ ޓީމުގެ ހެޑް ކޯޗު އިބްރާހީމް މޫސާ އާއި ގައުމީ ޓީމުގެ އެސިސްޓެންޓް ކޯޗު އާދަމް މުހައްމަދު ހަރަކާތްތެރިވާނެ ކަމަށް ސްވިމިންގ އެސޯސިއޭޝަނުން ބުނެއެވެ.