ޔާމީން ރަޝީދުގެ މަރުގެ މައްސަލަ: ތިން ހެކީން ހެކިބަސް ދޭން ދެކޮޅު!
25 ނޮވެމްބަރު 2019 | ހޯމަ 12:49މިމައްސަލާގައި ހުކުމް ކުރުން ޖެނުއަރީ 30 ވަނަ ދުވަހު
ސޯޝަލް މީޑިއާ އެކުޓިވިސްޓު އަދި ބްލޮގަރ ޔާމީން ރަޝީދު
އަނިޔާވެރި ރަހުމުކުޑަގޮތަކަށް މަރާލަފައިވާ ސޯޝަލް މީޑިއާ އެކުޓިވިސްޓު އަދި ބްލޮގަރ ޔާމީން ރަޝީދު މަރާލި މައްސަލާގައި ދައުލަތުގެ ފަރާތުން ދައުވާ އުފުލާފައިވާ މީހުންގެ މައްޗަށް ކުށް ސާބިތު ކުރުމަށް ހުށަހަޅާފައިވާ ހެކިވެރިންގެ ތެރެއިން ހެކިބަސް ނުނެގިވާ ތިން ހެކީން ހެކިބަސް ދޭން ދެކޮޅު ހެދުމުން، އެމައްސަލާގައި ހެކިބަސް ނަގާ ނިމުނީ ކަމަށް ނިންމައި، ދިފާއީ ހެކީންގެ ހެކިބަސް ނެގުން ކުރިއަށް ގެންދިއުމަށް ޝަރީއަތުން ނިންމައިފި އެވެ.
ހޯމަ ދުވަހުގެ ޝަރީއަތުގެ އަޑުއެހުމުގައި ދައުލަތުގެ ވަކީލު ވިދާޅުވީ، ދައުލަތުން ހުށަހަޅާފައި ހެކިވެރިންގެ ތެރެއިން ހެކިބަސް ނުނެގި ބާތި ތިބި ތިން މީހުން ހެކިބަސް ދޭން ދެކޮޅު ހަދާފައިވާތީ، އެމީހުންގެ ހެކިބަސް ނުނަގައި، މިމައްސަލަ ކުރިއަށް ގެންދަން އެދޭ ކަމަށެވެ. އެއީ ދައުލަތުން އެޝަރީއަތަށް ހުށަހެޅި ސިއްރު ހެކިވެރިންގެ ތެރޭގައި ހިމެނޭ ތިން ހެކިވެރިޔެކެވެ.
ޔާމީން ރަޝީދުގެ މަރުގެ މައްސަލާގައި ހޯމަ ދުވަހު ބޭއްވި އަޑުއެހުމުގައި ކުރިއަށް ގެންގޮސްފައިވަނީ ދައުވާ ލިބޭ އިސްމާއީލް ރަޝީދުގެ ގެ ބަލާ ފާސްކުރި ފުލުސް މީހާއާއި ދައުވާލިބޭ ހުސައިން ޒިޔާދުގެ ގެ ބަލާ ފާސްކުރި ފުލުސް މީހާގެ ހެކިބަސް ނެގުމެވެ.
މިމައްސަލައިގެ ޝަރީއަތަށް އެ ދެ ގެ ބަލާފާސްކުރި ސީން އޮފް ކްރައިމް ރިޕޯޓްތައް ވަނީ ހުށަހެޅިފަ އެވެ.
އެގޮތުން، ޒިޔާދުއާ ދެކޮޅަށް ހުށަހެޅި ރިޕޯޓު ތައްޔާރު ކުރި ފުލުސް މީހާ އާ އެއްވެސް ސުވާލެއް ކުރަން ބޭނުން ނުވާކަމަށް ޒިޔާދުގެ ވަކީލު ވިދާޅުވުމާއި ގުޅިގެން އެ ފުލުސް މީހާގެ ހެކިބަސް ނުނަގައި ޝަރީއަތް ކުރިއަށް ގެންދަން ދައުލަތުގެ ފަރާތުންވެސް އިއުތިރާޒު ނުކުރާތީ ގާޒީ ނިންމެވީ، އެ ފުލުސް މީހާގެ ހެކިބަސް ނުނެގުމަށެވެ.
ހޯމަ ދުވަހުގެ އަޑުއެހުމުގައި ހެކިބަސް ނަގާފައި ވަނީ އިސްމާއިލް ރަޝީދު ދިރިއުޅުނު މ. ތޯއިފް ބަލާ ފާސް ކުރި ސީން އޮފް ކްރައިމް ރިޕޯޓް ތައްޔާރުކުރި ފުލުސް މީހާގެ ހެކިބަހެވެ. އެ ފުލުސް މީހާގެ ބުނި ގޮތުގައި، ކޯޓު އަމުރެއްގެ ދަށުން އެ ގެ ފާސް ކުރިއިރު ސިފައިން ލައި އުޅޭ ފަދަ އާމީ ގަމީހަކާއި ފަޓުލޫނަކާއި ތޮއްޕެއްގެ އިތުރުން ލެޕްޓޮޕަކާއި ފޯނެއް އެ ގޭގެ ކޮޓަރިއަކުން ފެނުނު ކަމަށެވެ.
ހޯމަ ދުވަހުގެ ޝަރީއަތުގެ އަޑުއެހުމުގައި އެމައްސަލަ ބައްލަވާ ގާޒީ އަލީ ރަޝީދު ވަނީ ދެން މައްސަލަ ކުރިއަށް ގެންދަވާނެ ގޮތުގެ ތާވަލެއް ވަކީލުންގެ މަޝްވަރާއާ އެކު އެކުލަވައިލާފަ އެވެ. އެގޮތުން، ޑިސެމްބަރު މަހާއި ޖެނުއަރީ މަހުގެ ކުރީ ކޮޅު ދިފާއީ ހެކީންގެ ހެކިބަސް ނެގުން ކުރިއަށް ގެންދަވާނެ ކަމަށް ގާޒީ ވިދާޅުވި އެވެ.
ދައުލަތުން ދައުވާ ކޮށްފައިވާ މީހުން ވެސް އެމީހުންގެ ދިފާއުގައި ޝަފަވީ ގިނަ ހެކިތަކެއް ޝަރީއަތަށް ހުށަހަޅާފައި ވެއެވެ.
ގާޒީ ވިދާޅުވީ، ދިފާއުގައި ހުށަހަޅާފައިވާ ޝަފަވީ ހެކީންގެ ހެކިބަސް ނަގާ ނިމުމަށްފަހު، އަންނަ ޖެނުއަރީ މަހުގެ 7 ވަނަ ދުވަހު ކިތާބީ ހެކިތަކާބެހޭ ގޮތުން ވާހަކަ ދެއްކުމަށް އަޑުއެހުމެއް ބާއްވައި، އަދި ޖެނުއަރީ 15 ވަނަ ދުވަހު ހުލާސާ ބަޔާން އިއްވުމަށްފަހު، ޖެނުއަރީ 30 ވަނަ ދުވަހު މިމައްސަލާގައި ހުކުމް ކުރުމަށް ބޭއްވޭ ޝަރީއަތް ތާވަލް ކުރެވޭނެ ކަމަށެވެ.
މިދިޔަ އޮކްޓޯބަރު މަހުގެ 15 ގައި ބޭއްވި ޝަރިއަތުގެ އަޑުއެހުމުގައި ޔާމީން ރަޝީދު ދިރިއުޅެމުން ދިޔަ މ. ސްޕެޓިއުލާ ގޭގެ ލިފްޓް ކެމެރާއިން ނެގި ފިންގަރޕްރިންޓާއި، އެ މައްސަލަައިގައި ދައުވާ ލިބޭ އިސްމާއިލް ހައިޝަމް ރަޝީދުގެ ފިންގަރޕްރިންޓްއާ ދިމާވާކަމަށް ހެކިވެރިޔަކު ބުނެފިއެވެ.
ޔާމީން މަރާލި މައްސަލައިގައި، ތޫނު އެއްޗެއް ބޭނުން ކޮށްގެން ގަސްދުގައި މީހަކު މެރުމުގެ ކުށުގެ ދައުވާ އުފުލައިފައި ވަނީ މ. އަންނާރުމާގޭ އިސްމާއިލް ހައިޝަމް ރަޝީދާއި، މ. ކޮޅުފުށީ އީސްޓް ހުސައިން ޒިޔާދާއި، މ. ތާއިފް އިސްމާއިލް ރަޝީދާއި، މ. ކުދެހިގެ ހަސަން ޝިފާޒާއި، ގދ. ގައްދޫ ސިންދުބާދުގޭ މުހައްމަދު ދިފްރާނުގެ އިތުރުން މ. އިރާސްމިކުގެ އަހުމަދު ޒިހާން އިސްމާއިލްގެ މައްޗަށެވެ.
