ވޭތުވެދިޔަ ތިން އަހަރަށްވުރެ މި އަހަރު ރާއްޖެ އިޝްތިހާރު ކުރުމަށް ހިންގި ހަރަކާތްތައް ގިނަ: އެމްްއެމްޕީއާރްސީ
25 ނޮވެމްބަރު 2019 | ހޯމަ 03:24ދައުލަތަށް ލިބިފައިވާ ''ހަޑި ނަން' ރީތިކުރުމުގެ މަސައްކަތް ކުރެވުނު ކަމަށް ވިދާޅުވި
ރާއްޖެ އިޝްތިހާރުކުުރުމަށް ބޭރު ގައުމެއްގައި ބަހައްޓާފައިވާ ސްޓޯލެއް
ވޭތުވެދިޔަ ތިން އަހަރާއި އަޅާބަލާއިރު މި އަހަރުގެ މިހާތަނަށް ރާއްޖެ އިޝްތިހާރު ކުރުމަށް ހިންގިފައިވާ ހަރަކާތްތަކުގެ އަދަދު ގިނަ ކަމަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) އިން ބުނެފިއެވެ.
ރާއްޖެޓީވީގެ ފަލަސުރުޚީ ޕްރޮގުރާމުގައި ވާހަކަ ދައްކަވަމުން އެމްއެމްޕީއާރްސީގެ މެނޭޖިންގ ޑިރެކްޓަރ ޠައްޔިބު މުހައްމަދު ވިދާޅުވީ، އެމްއެމްޕީއާރްސީ އަކީ ރާއްޖޭގައި އެންމެ ބޮޑު ޚިޔާނާތް ހިންގާފައިވާ ކުންފުންޏަށްވާތީވެ މަޤާމާއި ހަވާލުވެވަޑައިގަތުމަށް ފަހު އެންމެ ބޮޑު އިސްކަމެއް ދެއްވީ ދައުލަތަށް ލިބިފައިވާ ''ހަޑި ނަން' ރީތިކުރުމުގެ މަސައްކަތް ކަމަށެވެ.
އޭނާ ވިދާޅުވީ، ވޭތުވެދިޔަ ތިން އަހަރާއި އަޅައި ބަލާއިރު މި އަހަރު ރާއްޖެ އިޝްތިހާރު ކުރަން ކުރެވުނު މަސައްކަތްތައް ގިނަ ކަމަށެވެ. އެގޮތުން ހަރަކާތްތައް ހިންގުމަށް އެންމެ ބޮޑު އިސްކަމެއް ދީފައިވަނީ އޮންނަ އުސޫލުތަކާއި، ހަމަތަކުގެ މަތިން ކުރިޔަށް ގެންދިޔުން ކަމަށާއި، އެކަން ކުރުމަށްޓަކައި އޮފީހުގެ އިތުރުން މުވައްޒަފުންގެ ތެރެއިން ހުރަސްތަކެއް ދިމާވި ކަމަށް ވިދާޅުވިއެވެ.
މި އަހަރު މިހާތަނަށް ހިންގިފައިވާ ހަރާކަތްތަކުގެ އިތުރު ތަފްސީލު ދެއްވަމުން ޠައްޔިބު ވިދާޅުވީ، ކުރިޔާއި ޚިލާފަށް މި އަހަރު ތެރޭގައި ރޯޑް ޝޯތަކާއި، ފޭމްޓްރިޕް ތަކުގެ އިތުރުން ''ވިޒިޓް މޯލްޑިވްސް'' ދުނިޔޭގެ ބޮޑެތި މާކެޓުތަކުގައި އޮންލައިން މެދުވެރިކޮށާއި ޑިޖިޓަލްކޮށް ހިންގިފައިވާ ކަމަށެވެ. ރާއްޖެ އިޝްތިހާރު ކުރުމުގެ ގޮތުން އެމްއެމްޕީއާރްސީން ދަނީ ދުނިޔޭގެ މަޝްހޫރު އެއަރލައިންތަކާއި ގުޅިގެން ތަފާތު އެކި ކެމްޕެއިންތައްވެސް ހިންގަމުންނެވެ.
އެމްއެމްޕީއާރްސީގެ އެމްޑީ ވިދާޅުވި ގޮތުގައި، ރާއްޖެ އިޝްތިހާރު ކުރަން ތިބި ބަޔަކަށްވާނަމަ އެ ކުންފުނީގެ އެހީތެރިކަން އަބަދުވެސް ލިބޭނެއެވެ.
ރާއްޖެ އިޝްތިހާރު ކުރުމަށް ގިނަ މަސައްކަތްތަކެއް އެމްއެމްޕީއާރްސީން ކުރަމުންދާއިރު، ޓޫރިޒަމް މިނިސްޓްރީންވެސް ވަނީ މި އަހަރުގެ ޓޫރިޒަމް ދުވަހާ ގުޅުވައިގެން ރާއްޖޭގެ އެކި ކަންކޮޅުތަކުގައި ތަފާތު އެކި ކަހަލަ ހަރަކާތްތައް ހިންގާފައެވެ.
