ގާނޫނުތަކަށް އަމަލު ކުރުން "ވަރިހަމަ" ކޮށްލައިފި: ރައީސް ނަޝީދު
24 ނޮވެމްބަރު 2019 | އާދީއްތަ 07:55އަނދިރި ދައުލަތެއްގެ ފަލްސަފާގެ ފިކުރެއް މިރާއްޖޭގައި ހިނގަމުންދޭ
ގާނޫނު ހަދާ މަޖިލިސް: ރައްޔިތުންގެ މަޖިލިސް
ރައްޔިތުންގެ މަޖިލީހުން ފާސްކޮށް، ދައުލަތުގެ އެންމެމަތީ ވެރިޔާ، ރައީސުލްޖުމްހޫރިއްޔާ ތަސްދީގު ކުރައްވާ ޤާނޫނުތަކަކީ އެމައްޗަށް އަމަލުކުރަން ނުޖެހޭ "ވަރިހަމަ" ޤާނޫނުތަކެއްގެ ގޮތުގައި ބައެއް ދިވެހި ރައްޔިތުން ޤަބޫލުކުރަމުންދާ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.
ލ. އަތޮޅުގައި މިހާރު ކުރިއަށްދާ، ކުޑަކުދިންގެ ހައްޤުތަކާއި ކުޑަކުދިންގެ އަދުލުގެ ނިޒާމާބެހޭ ސެމިނާގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ، ދިވެހިރާއްޖޭގައި އަނދިރި ދައުލަތެއް އުފެދި، މުޅިން އެހެން ނިޒާމެއް ހިންގުމަށް ބަޔަކު މަސައްކަތް ކުރަމުންދާ ކަމަށެވެ. އަދި އެ އަނދިރި ދައުލަތުން، ދިވެހިންގެ ޝަރުއީ ނިޒާމާއި ދިވެހިންގެ ޤާނޫނުތަކަށް ގޮންޖެހަމުންދާ ކަމަށް ވެސް ރައީސް ނަޝީދު ވިދާޅުވި އެވެ.
ރައީސް ނަޝީދު ވިދާޅުވީ، ކުޑަކުއްޖަކަށް އަނިޔާއެއް ކޮށްފިނަމަ، މީގެ 50 ހަކަށް އަހަރުކުރީގަ ނަމަ، އަވަށު ސަރުދާރު ވިޔަސް، ބަނޑޭރިގޭ މީހަކު ވިޔަސް، މާބަނޑޭރިއަކުވިޔަސް، އެކަމެއް ނުބަލާ، ނިދަން އޮށޯންނާނެ ކަމަށް ޤަބޫލު ނުކުރެވޭ ކަމަށެވެ. އެކަމަކު މިހާރު ދައުލަތުގެ އިދާރާތަކުގެ ޒިންމާދާރު ފަރާތްތަކުން އެފަދަ ކަންކަމަށް ހުންނަ ފަރުވާކުޑަކަމާއި، "ވަރިހަމަކަން" ވަރަށް ބޮޑަށް ފާހަގަވަމުންދާ ކަމަށެވެ.
ރައީސް ނަޝީދު ވިދާޅުވީ، ވާގޮތް އަދި ވަމުންދާގޮތް އަޅުގަނޑުމެންގެ ތެރޭގައި އެކަކަށްވެސް އޮޅިވަޑައިގެން ނޫޅުއްވާ ކަމަށާއި، މި ގައުމުގައި އަނދިރި ދައުލަތެއް ހިންގަމުންދާއިރު، އެމީހުންގެ ދައުވަތު އުމުރުން 9 އަހަރާއި 10 އަހަރުގެ ކުދިންނަށް ވެސް ލިބެމުންދާ ކަމަށެވެ.
ކުޑަކުދިންގެ ހައްޤުތައް ރައްކާތެރިކުރުމަށް ޤާނޫނީ ގޮތުން ހުރި ގޮންޖެހުންތަކުގެ ވާހަކަ ދައްވަކާއިރު، އަދި ދައުލަތުގެ އެހެން މުއައްސަސާތަކުން ވެސް ޤާނޫނެއް ނެތިގެން، ކަންކަން ތަންފީޒު ނުކުރެވޭ ވާހަކަ ބުނުމަކީ އެއީ ޤަބޫލުކުރެވޭ ކަމެއް ނޫންކަމަށް ރައީސް ނަޝީދު ވިދާޅުވި އެވެ. ރައީސް ނަޝީދު ވިދާޅުވީ މިއުޅެނީ ޤާނޫނެއް ނެތިގެން ނުވަތަ ޤާނޫނުގެ މައްސަލައެއް ނޫން ކަމަށާއި، ޒިންމާދާރު ފަރާތްތަކުގެ އިޚުލާސްތެރިކަން ނެތުމުން ދިމާވެގެން އުޅޭ މައްސަލައެއް ކަމަށެވެ.
މީގެއިތުރުން ރައީސް ނަޝީދު ވިދާޅުވީ، އަޅުގަނޑުމެންގެ ތެރެއަށް އަނދިރި ދައުލަތެއްގެ ފަލްސަފާއެއް ވަދެއްޖެ ކަމަށާއި، މިހާރު ރާއްޖެ މިދަނީ ފިކުރީ ހަނގުރާމައެއްގެ ތެރެއަށް ކަމަށެވެ.
13 އަހަރުގެ ކުޑަކުއްޖާ ބަލިވެއިން މައްސަލާގައި އިހުމާލުވި އިދާރާތަކާއި ހިތްވަރުދިން ފަރާތްތަކަށް ހައްގު އަދަބު ލިބެންޖެހޭ ކަމަށް، ރައީސް މުހައްމަދު ނަޝީދު މީގެކުރުން ވިދާޅުވެފައެވެ. މިމައްސަލަ އާއި ގުޅިގެން އެމަނިކުފާނު ކުރެއްވި ޓްވީޓެއްގައި ވިދާޅުވެފައިވަނީ 13 އަހަރުގެ ކުޑަ އަންހެން ކުއްޖެއްގެ ނާޖާއިޒު ބޭނުން ހިފާ އޭގެ ނަތީޖާއެއްގެ ގޮތުން އެކުއްޖާ ބަލިވެއިނދެ އެކުއްޖާއަށް ދިން އަނިޔާ އެންމެ ހަރުކަށި އިބާރާތުން ކުށްވެރި ކުރައްވާކަމަށެވެ.
