ސަލަފަށް ފިޔަވަޅު އެޅިދާނެތޯ ބެލުމަށް މިނިސްޓަރު މަހްލޫފް މަޖިލީހަށް ހާޒިރު ކުރަނީ!
ސަލަފަކީ ޓެރަރިޒަމަށް ވާގިދޭ ޖަމާއަތެއް ކަމުގެ ތުހުމަތުތަކެއް ވަނީ ކުރެވިފައި
ޔޫތް މިނިސްޓަރު މަހްލޫފް
ޖަމިއްޔަތުއް ސަލަފަށް ފިޔަވަޅު އެޅިތޯ ބެލުމަށް، މިނިސްޓަރު އޮފް ޔޫތް, ސްޕޯޓްސް އެންޑް ކޮމިއުނިޓީ އެމްޕަވަމަންޓް އަހުމަދު މަހްލޫފް ރައްޔިތުންގެ މަޖިލީހަށް ހާޒިރުކޮށް، ސުވާލު ކުރެއްވުމަށް ހުށަހަޅުއްވައިފި އެވެ.
މިނިސްޓަރާ ސުވާލު ކުރެއްވުމަށް ހުށަހަޅުއްވާފައިވަނީ ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު އެވެ. ޖާބިރު ސުވާލު ކުރައްވަނީ މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބަލާ ކޮމިޝަނުން ޑރ. އަފްރާޝީމް އަލީގެ މަރުގެ މައްޗަށް އެކުލަވާލާފައިވާ ރިޕޯޓުގައި ޖަމިއްޔަތުއް ސަލަފާއި މެދު ތުހުމަތުތަކެއް ކުރެވޭއިރު އެ ޖަމިއްޔާއާއި މެދު އެއްވެސް ފިޔަވަޅެއް އަޅާފައިވޭތޯ އާއި އެޅުއްވި ފިޔަވަޅަކީ ކޮބައިކަން ސާފުކުރެއްވުމަށެވެ.
ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި މަޖިލީހުގެ ރައީސް، ރައީސް މުހައްމަދު ނަޝީދުވެސް ވަނީ ސަލަފް ޖަމިއްޔާއާމެދު ފިޔަވަޅު އެޅުމަށް މަޖިލީހުގެ ސަލާމަތީ ހިދްމަތްތަކާބެހޭ ކޮމެޓީން އެކުލަވާލި ސަބް ކޮމެޓީން ނިންމާފައިވާ ކަމުގެ މައުލޫމާތު ލިބިފައިވާ ކަމަށެވެ. އަދި ސަބްކޮމެޓީގެ ރިޕޯޓުގައި ސަލަފު ޖަމިއްޔާއަކީ ޓެރަރިޒަމްއަށް ވާގިދޭ ޖަމާއަތެއްގެ ގޮތުގައި ފާހަގަކޮށްފައިވާ ކަމަށް ރައީސް ނަޝީދު ވިދާޅުވިއެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު އުފައްދަވާފައިވާ، ގޮތްނޭނގޭ ގޮތަށް މަރާލެވިފައިވާ މީހުންގެ މަރުގެ މައްސަލަތައް ބަލާ ރިޔާސީ ކޮމިޝަނުން ވަނީ ޑރ. އަފްރާޝީމްގެ ޑރ. އަފްރާޝީމް އަލީގެ މަރުގެ މައްޗަށް އެކުލަވާލާފައިވާ ރިޕޯޓެއް އެކުލަވާލައްވާ އެރިޕޯޓް އާންމުކޮށްފަ އެވެ. އެ ރިޕޯޓުގައިވާ ގޮތުން ދީނީ ހައްދުފަހަނަ އަޅާފައިވާ ބައެއް އަތެއް އެކަމުގައިވާއިރު، ސަލަފް ޖަމިއްޔާއަށް ތަހުމަތުތަކެއް ވަނީ ކުރެވިފަ އެވެ.
ޖާބިރު ވަނީ ސަލަފް ޖަމިއްޔާ އުވާލުމަށް ވެސް މަޖިލީހުގެ ޖަލްސާގައި ގޮވާލައްވާފަ އެވެ.
