އެމްޕީއެލްގެ އޮޕަރޭޝަންތަކަށް 30 މިލިއަން ރުފިޔާގެ ސަމާނު ގެނެސްފި
14 ނޮވެމްބަރު 2019 | ބުރާސްފަތި 14:05ކުރިން ބޭނުން ކުރަމުން އައީ ބާވެފައި ހުރި ސާމާނުތައް
އެމްޕީއެލުގެ އޮޕަރޭންސް ތަކަށް ގެނައި ދެ ބާޖް ހޭންޑްލަރ
މޯލްޑިވްސް ޕޯރޓްސް ލިމިޓެޑް (އެމްޕީއެލް) ގެ އޮޕަރޭޝަންސް ތަކުގައި ބޭނުން ކުރަން 30 މިލިއަން ރުފިޔާގެ އަގުހުރި ސާމާނު ގެނެސްފިއެވެ.
މުޅިން އަލަށް ހަތް އިކުއިޕްމެންޓެއް އޮޕަރޭޝަނުގައި ބޭނުން ކުރަން ގެނެސްފައިވާއިރު، އޭގެ ތެރޭގައި ހިމެނެނީ ދެ ބާޖް ހޭންޑްލަރ އާއި ފަސް ޓަރމިނަލް ޓްރެކްޓަރެވެ. މިއީ ފިންލޭންޑުގެ ކަލްމާ ބްރޭންޑުގެ ސާމާނުތަކެވެ.
އެ ސާމާނުތައް ނޫސްވެރިންނަށް ދައްކާލުމަށް ފަހު މީޑިޔާ އަށް މައުލޫމާތު ދެއްވަމުން އެމްޕީއެލްގެ ސީއީއޯ ޝާހިދު އަލީ ވިދާޅުވީ، އެ ސާމާނު ތަކަކީ ޕޯޓުގެ އޮޕަރޭޝަންސް ތަކަށް މުހިއްމު އަދި ''ކްރިޓިކަލް'' އިކުއިޕްމެންޓްސް ތަކެއްް ކަމަށެވެ. ޝާހިދު ވިދާޅުވީ ގޮތުގައި މިހާރު އެތަނުގައި ބޭނުން ކުރަމުންދާ ގިނަ ސާމާނުތައް ހުރީ ބާވެ ހަލާކުވެފައެެވެ. އެހެން ކަމުން މިހާރު ގެނެވުނު ސާމާނުތަކަކީ އޮޕަރޭންސް ތަކަށް އެންމެ މުހިއްމު ސާމާނުތައްކަން އޭނާ ފާހަގަކުރެއްވިއެވެ.
ބުރާސްފަތި ދުވަހުން ފެށިގެން ބާޖް ހޭންޑްލަރ އާއި ޓާމިނަލް ޓްރެކްޓަރ ބޭނުން ކުރަން ވަނީ ފަށާފައެވެ. އޭގެ ތެރެއިން ބާޖް ހޭންޑްލާ ހާއްސަކުރަނީ، ކޮންޓެއިނަރ ހޭންޑްލް ކުރަން ބޭނުން ކުރުމަށެވެ.
ޝާހިދު ވިދާޅުވީ، މައިގަނޑު ގޮތެއްގައި ބާޖް ހޭންޑްލަރ ބޭނުން ކުރާނީ، ކޮންޓެއިނަރ އެއްތަނުން އަނެއް ތަނަށް ގެންދިޔުމާއި، ކޮންޓެއިނަރ ''ޝިފްޓް'' ކުރުމާއި އަދި ކޮންޓެއިނަރ ބޯޓުން ބޭލުމަށް ފަހު ކްލިއަރިން އޭރިޔާ އަށް ގެންދިޔުމުގެ އިތުރުން ހުސް ކޮންޓެއިނަރ އެއްތަނުން އަނެއް ތަނަށް ގެންދިޔުމަށް ކަމަށެވެ.
ކަލްމާ ބްރޭންޑްގެ ސާމާނުތަކަކީ އެމްޕީއެލުން 10 އަހަރަށް ވުރެ ގިނަ އަހަރުތަކެއްް ވަންދެން ބޭނުން ކުރަމުން އަންނަ އެތަނުގެ މުވައްޒަފުން ފަރިތަ ސާމާނުތަކަކެވެ. އަލަށް ގެނެވުނު ސާމާނުތަކާއި އެކު މަސައްކަތްތަކަށް ފަސޭހަ ވެގެންދާނެ ކަމަށް އެމްޕީއެލްގެ ސީއީއޯ ވިދާޅުވިއެވެ.
އަލަށް ގެެނައި ދެ ބާޖް ހޭންޑްލަރއާ އެކު އެމްޕީއެލްގެ އޮޕަރޭޝަންސް ތަކުގައި ޖުމްލަ ހަތަރު ބަރޖް ހޭންޑްލަރ ބޭނުން ކުރާނެއެވެ.
