މި ސަރުކާރުގެ ފަސް އަހަރު ނިމެންދެން ސަރުކާރާއެކު ދެމިހުންނަވާނެކަމަށާއި، އަދި މި ސަރުކާރު އަލުން އިންތިޚާބުވިޔަސް ރައީސް މައުމޫން ނިޞްބަތްވެ ވަޑައިގަންނަވާ ޕާޓީ މޯލްޑިވްސް ރީފޯރމް މޫވްމެންޓް (އެމްއާރުއެމް) ދެމި އޮންނާނީ ސަރުކާރާއެކު ކަމަށް ކުރީގެ ރައީސް އަދި އެ ޕާޓީގެ އިންތިޤާލީ ރައީސް މައުމޫން ޢަބްދުލް ޤައްޔޫމް ވިދާޅުވެއްޖެއެވެ.

މައުމޫން މިހެން ވިދާޅުވީ ރާއްޖެ ޓީވީގެ "ފަށާއިރު" ޕްރޮގްރާމްގައި ވާހަކަފުޅުދައްކަވަމުންނެވެ.

ޕްރޮގްރާމުގައި އެމްއާރުއެމް މި ކޯލިޝަނުގައި 5 އަހަރު ދެމި ހުންނަވާނެ ތޯ އެއްސެވުމުން ރައީސް މައުމޫން ވިދާޅުވީ އެ ޕާޓީ ދެމިއޮންނާނީ ސަރުކާރާއި އެކުގައި ކަމަށެވެ.

އަދި ރައީސް މައުމޫން ވިދާޅުވީ ރައީސް އިބްރާހިމް މުޙައްމަދު ޞާލިޙާއި އޮންނަ ގުޅުން ވަރަށް ރަނގަޅު ކަމަށާއި ރައީސް ޞާލިޙަކީ އެމަނިކުފާނު ވަރަށް އިޙްތިރާމު ކުރައްވާ ބޭފުޅެއް ކަމަށެވެ.

އެމްއާރްއެމްގެ ރައީސަކަށް މައުމޫން އިންތިޚާބުވެ ވަޑައިގެންނެވީ، ނޮވެމްބަރު މަހުގެ 7 ވަނަ ދުވަހުގެރޭ އެމްއާރްއެމް އުފެއްދުމަށް ދަރުބާރުގޭގައި ބޭއްވި ޖަލްސާގައެވެ.

އެމްއާރްއެމް އަކީ ރައީސް މައުމޫން އިސްވެ ހުންނަވައި އުފެއްދެވި ތިން ވަނަ ޕާޓީއެވެ. ރައީސް މައުމޫނު އެންމެ ފުރަތަމަ އުފެއްދެވީ ޑީއާރުއާރުޕީއެވެ. އެމަނިކުފާނުގެ ވެރިކަމުގައި އުފެއްދެވި ސިޔާސީ ޕާޓީގައި ހުންނެވުމަށްފަހު ސިޔާސީ މައިދާނުން ދުރަށް ޖެހިވަޑައިގެންފައިކަން އިޢުލާން ކުރެއްވި އެވެ. ނަމަވެސް އަލުން ސިޔާސީ މަސައްކަތްޕުޅަށް ނިކުމެވަޑައިގެން މަސައްކަތްޕުޅު ފެއްޓެވުމާއި ޑީއާރުޕީގައި ޖެހުނު ހަމަނުޖެހުންތަކަށްފަހު އެ ޕާޓީ ދޫކުރައްވާ ޕީޕީއެމްގެ ނަމުގައި އާ ޕާޓީއެއް އުފެއްދެވި އެވެ. ޕީޕީއެމްގެ ރައީސަކަށް ހުންނަވަނިކޮށް، އެ މަނިކުފާނު އެ މަޤާމުން ވަކިކޮށް، ސިވިލް ކޯޓަށް ހުށަހަޅައިގެން ޕާޓީ ހިންގެވުމުގެ ބާރު ކުރީގެ ރައީސް އަދި މައުމޫންގެ ކޮއްކޯފުޅު ޢަބްދުﷲ ޔާމީން ނެންގެވި އެވެ.