ބައެއް މަޝްރޫއުތަކަށް ހަމައެކަނި ދިވެހި ކުންފުނިތަކަށް ކުރިމަތިލެވޭ ގޮތް ހަމަޖެހިގެންދާނެ: އަމީރު
10 ނޮވެމްބަރު 2019 | އާދީއްތަ 03:25ކުރިޔަށް އޮތް މަސްްތެރޭގައި ގެޒެޓް ކުރާނެ ކަމަށް ވިދާޅުވި
ބޭރުގެ ފަރާތްތަކުން ވާދަވެރި އަގުތަކެއް ހުށަހަޅަމުން އަންނަަކަމަށް އަމީރު ވިދާޅުވި
ރާއްޖޭގައި ކުރިއަށް ހިންގުމަށް ރާވަފައި ހުރި ޕަބްލިކް ސެކްޓަރ އިންވެސްޓްމަންޓް (ޕީއެސްއައިޕީ) ގެ ބައެއް މަޝްރޫޢުތަކަށް ރާއްޖޭގެ ފަރާތްތަކަށް ކުރިމަތިލެވޭ ގޮތަށް ޓެންޑަރިންގެ އުޞޫލުތަކަށް ބަދަލު ގެނައުމުގެ މަސައްކަތް ކުރަމުންދާ ކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
ހޮނހިރު ދުވަހުގެރޭ ބޭއްވި ބަޖެޓް ދިރާސާ ކުރާ ކޮމިޓީގެ ބައްދަލުވުމުގައި އަމީރު ވިދާޅުވީ، ކުރިއަށް އޮތް މަސްދުވަހުގެ ތެރޭގައި ޓެންޑަރިންއާ ގުޅޭ ކަރުދާސް އިކޮނޮމިކް ކައުންސިލުން ފާސްކުރުމަށްފަހު ގެޒެޓް ކުރާނެ ކަމަށެވެ.
މިނިސްޓަރ ވިދާޅުވީ، ބޭރުން ފަންޑުކޮށްގެން ރާއްޖޭގައި ގިނަ ޕްރޮޖެކްޓްތަކެއް ކުރިއަށްގެންދާ ކަމަށެވެ. އަދި އިންޓަނޭޝަނަލް ބިޑިންގ އަކަށް ހުޅުވާލުމުން މަޝްރޫޢުތައް ހިންގަން ބޭރުގެ ފަރާތްތަކުން ވާދަވެރި އަގުތަކެއް ހުށަހަޅަމުން އަންނަަކަން އަމީރު ފާހަގަކުރެއްވިއެވެ.
މިނިސްޓަރ ވިދާޅުވީ، ޑޮމެސްޓިކް ބަޖެޓުން ހިންގާ ޕްރޮޖެކްޓްތަކަށް ވަކި އުޞޫލެއްގެ ދަށުން ދިވެހި ކުންފުނިތަކަށް ކުރިމަތިލެވޭ ގޮތަށް އުޞޫލެއް އެކުލަވާލުމުގެ މަސައްކަތް ކުރަމުންދާ ކަމަށެވެ. އެ އުޞޫލުގެ ދަށުން މަޝްރޫޢުތަކުގެ ކުޑަ، ބޮޑުމިނަށް ބެލުމަށްފަހު ބޭންޑްތަކެއް ކަނޑައެޅުމަށް ވެސް މަސައްކަތް ކުރައްވާނެ ކަމަށް މިނިސްޓރަ ވިދާޅުވިއެވެ.
އަމީރު ވިދާޅުވީ، ބަޖެޓުގެ ދިހަ ޕަސެންޓް ދާނީ ޑެޓް ސާރވިސިންއަށް ކަމަށާއި އެއީ އިންޓްރެސްޓް ޕޭމަންޓްސް ގޮތުގައި އާއި ޕްރިންސިޕަލް ޕޭމަންޓްސް ގޮތުގައި ކަމަށެވެ.
އަންނަ އަހަރަށް ލަފާކުރާ ދައުލަތުގެ ބަޖެޓުގައި ޕީއެސްއައިޕީ ޕްރޮޖެކްޓްތަކަށް ބަލާލާއިރު މާލޭ ރީޖަންގައި 3.3 ބިލިއަން ރުފިޔާގެ ޕްރޮޖެކްޓްތައް ހިންގުމަށް ވަނީ ހަމަޖެހިފަ އެވެ. އަދި އަތޮޅުތަކުގައި 2.5 ބިލިއަން ރުފިޔާގެ ޕްރޮޖެކްޓްތައް ހިންގުމަށް ވަނީ ހަމަޖެހިފައެވެ.
