ހަތް އަހަރު ފަހުން ޕަބްލިކް ހެލްތް ފަންޑު ލޯންޗު ކޮށްފި
ފަންޑަކީ 2012 ވަނަ އަހަރު އެކުލަވައިލި ގާނޫނަކުން އުފެެއްދުމަށް ލާޒިމް ކުރާ ފަންޑެއް
މިނިސްޓަރު އަމީން ޕަބްލިކް ހެލްތް ފަންޑު ލޯންޗު ކޮށްދެއްވަނީ
2012 ވަނަ އަހަރު އެކުލަވައިލައި އަމަލުކުރަމުން އަންނަ އާއްމު ސިއްހަތުގެ ގާނޫނު ބުނާ ޕަބްލިކް ހެލްތް ފަންޑު ލޯންޗުކޮށްފިއެވެ.
ފަންޑު ލޯންޗު ކޮށްދެއްވީ، ޕެރެޑައިސް އައިލެންޑް ރިސޯޓް އެންޑް ސްޕާގައި ބޭއްވި ރަސްމިއްޔާތެއްގައި ހެލްތު މިނިސްޓަރ އަބްދުﷲ އަމީން އެވެ. ފަބްލިކް ހެލްތް ފަންޑް އިފްތިތާހު ކޮށްދެެއްވަމުން މިނިސްޓަރު އަމީން ވަނީ މުއްސަނދިންނާއި، ތަނަވަސްކަން ހުރި ފަރާތްތަކާއި، ޖަމިއްޔާ ޖަމާއަތްތަކުން ފަންޑަށް އެހީވެދިނުމަށް ގޮވާލައްވާފައެވެ.
އަމީން ވިދާޅުވީ، އެ ފަންޑަކީ އާއްމު ސިއްހަތުގެ ދުޅަހެޔޮ ކަމަށް ކުރާ މަސައްކަތުގެ ވަރަށް ބޮޑު ބާރަކަށް ވެގެންދާނެ ކަމަށެވެ. ފަންޑަށް ފައިސާ އެއްކުރުމުގެ މަސައްކަތް ކުރާނެ ގޮތްތައް ހޯއްދަވަމުންދާކަންވެސް މިނިސްޓަރ ވަނީ ފާހަގަކުރައްވާފައެވެ.
ފަންޑަށް ޖަމާކުރެވޭ އާމްދަނީގެ ފައިސާ:
ހެލްތު މިނިސްޓްރީން ބުނީ، ވަކި ފަންޑެއް ގޮތަށް ފަންޑުގެ ފައިސާ ނެތަސް ފަންޑަށް މިހާރުވެސް ފައިސާތައް ޚަރަދު ކުރެވެމުން އަންނަ ކަމަށެވެ. ފަންޑެއް އޮތުމުން ދެމެހެއްޓެނިވި ގޮތެއްގައި ފައިސާ ލިބޭނެ ކަމަށާއި، އެހެން ފަރާތްތަކުގެ ފައިސާގެ އެހީ ލިބުމަށްވެސް މަގުފަހިވެގެންދާނެކަމަށެވެ.
