އިންޖީން ހުއްޓިގެން ހާލުގައި ޖެހުނު އީރާން ބޯޓުގައި މަސްތުވާތަކެތި!
3 ނޮވެމްބަރު 2019 | އާދީއްތަ 13:51މި ބޯޓުގައި އީރާނުގެ 7 ފިރިހެނުން ތިބި
ރާއްޖޭގެ ކަނޑުގެ ސަރަހައްދުން އޮޔާދަނިކޮށް ފެނުނު އީރާންގެ ބޯޓު
އާދީއްތަ ދުވަހު ހެނދުނު އިންޖީން ހުއްޓިގެން އޮޔާދަނިކޮށް ރާއްޖޭގެ ކަނޑުގެ ޞަރަޙައްދުން ފެނުނު އީރާން ބޯޓުގައި މަސްތުވާތަކެތިކަމަށް ޝައްކުރެވޭ އެއްޗެއް ހުރިކަމަށް އެމްއެންޑީއެފުން ބުނެފިއެވެ.
މީގެ ކުރިން ފުލުހުން ބުނެފައިވަނީ އދ. މަންދޫ ބޭރުން ރާއްޖެއިން ބޭރުގެ ލަކުޑި ބޯޓެއްގެ އިންޖީނު ހުއްޓިގެން އޮޔާދާ ކަމުގެ މަޢުލޫމާތު ލިބިގެން ދިވެހި ފުލުހުން އެ ބޯޓަށް އެހީތެރިކަން ފޯރުކޮށްދެމުންދާ ކަމަށެވެ. އަދި ބޯޓު އޮޔާދާ ކަމުގެ މަޢުލޫމާތު ލިބުނީ އާދީއްތަ ދުވަހުގެ ހެނދުނު 8:20 ހާއިރު ކަމަށާއި، މައުލޫމާތު ފުލުހުންނަށް ލިބުމާއެކު ކޯސްޓް ގާޑަށް މަޢުލޫމާތު ދިނުމަށްފަހު ފުލުހުން އެޞަރަޙައްދަށް ދިޔަ ކަމަށެވެ.
މި ބޯޓުގައި އީރާނުގެ 7 ފިރިހެނުން ތިބިކަމަށް ވެސް ފުލުހުން މީގެ ކުރިން ވަނީ ބުނެފައެވެ. ނަމަވެސް އެމްއެންޑީއެފުން ބުނީ މަސްތުވާތަކެއްޗަށް ޝައްކުކުރެވޭތަކެއްޗާ އެކު ރާއްޖޭގެ ޞަރަޙައްދުން ބޭރުގެ މަސްބޯޓެއް ހިފަހައްޓާފައިވާ ކަމަށެވެ.
އަދި މި މަސްބޯޓު ހިފަހައްޓާފައިވަނީ، ގޮތްނޭނގޭ އުޅަނދެއް ރާއްޖޭގެ ސަރަޙައްދުން ދަތުރުކުރަމުންދާ ކަމުގެ މަޢުލޫމާތު ލިބިގެން، އެމްއެންޑީއެފް ކޯސްޓްގާޑާއި މޯލްޑިވްސް ޕޮލިސް ސަރވިސްއިން ގުޅިގެން ކުރިއަށްގެންދިޔަ އޮޕަރޭޝަނެއްގައި، އދ.މަންދޫގެ ހުޅަނގުން ގާތްގަނޑަކަށް 4.8 ނޯޓިކަލް މޭލު ބޭރުގައި އެ މަސްބޯޓު އޮއްވައި، މިއަދު ހެނދުނު 11:40 ހާއިރު ކަމަށެވެ.
މި މަސްބޯޓަށް ސިފައިންނާއި ފުލުހުން އަރައި، ބެލިބެލުމުގައި އެބޯޓުގެ ތެރޭގައި، މަސްތުވާތަކެތި ކަމަށް ޝައްކުކުރެވޭ އެއްޗެހި ފެނިފައިވާ ކަމަށާއި، އެހެންކަމުން، އެ ބޯޓު އިތުރަށް ބަލައި ޗެކްކުރުމުގެ ގޮތުން އެމްއެންޑީއެފާއި މޯލްޑިވްސް ޕޮލިސް ސަރވިސްއިން މަސައްކަތް ކުރަމުންދާކަމަށެވެ.
މީގެ ކުރިން ވެސް ރާއްޖެ ޞަރަޙައްދުން ހިފަހެއްޓި އިރާނުގެ ބޯޓަކުން ވަނީ 50 ކިލޯގެ މަސްތުވާތަކެތި އަތުލައިގެންފައެވެ.
