އެއްވެސް ސަރުކަރަކުން ވިޔަފާރި ކުރާނަމަ އެވިަޔފާރީގެ ސީދާ ނަފާ ނުހޯދޭނެ ކަމަށް ވިދާޅުވި
ދެކުނު މަހާސިންތާ 2019 ގައި ރައީސް ނަޝީދު ބައިވެރިވެވަޑައިގަންނަވަނީ
ސަރުކާރުން ވިޔަފާރި ކުރުމަކީ ބޮޑު ގޯހެއްކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.
ދެކުނު މަހާސިންތާ 2019 ޝަރަފްވެރިކޮށްދެއްވާ ވާހަކަފުޅުދައްކަވަމުން ރައީސް ނަޝިދު ވިދާޅުވީ އެއްވެސް ބާވަތެއްގެ ވިޔަފާރިއެއް އެއްވެސް ސަރުކާރަކުން ކުރާނަމަ އެވިޔަފާރިއެއްގެ ސީދާ ނަފާ ސާދާ ގޮތުގައި ނުހޯދޭނެކަމަށެވެ.
ރައީސް ނަޝީދު ވިދާޅުވިގޮތުގައި އަމިއްލައަށް ކައުންސިލްތަކުން ވިޔަފާރިކުރުމަކީވެސް ރަނގަޅުކަމެއް ނޫނެވެ. އަދި އަމިއްލައަށް ކައުންސިލްތަކުން ވިޔަފާރިކުރުމުގެ ބަދަލުގައި ބީލަން އުސޫލުން މަސައްކަތްތައް ކުރިއަށްގެންދަންޖެހޭކަމަށް ނަޝީދު ވިދާޅުވި އެވެ.
މީގެއިތުރުން ރައީސް ނަޝީދު ވިދާޅުވީ މިރާއްޖޭގެ މުއްސަނދިކަމާއި ބާރުވެރިކަން މުށުތެރޭގައި ހިފަހައްޓައިގެން އަމިއްލަ ދަރިންނަށްވެސް ގޮތެއް ހޯދެން ނެތްކަން ސާފުވާކަމަށެވެ. ރަށްރަށުގައި ހިންގާ ތަރައްޤީގެ މަޝްރޫއުތައް ކައުންސިލްތަކަށް ނުހިންގެންވީ އެއްވެސް ސަބަބެއް ނެތް ކަމަށާއި އެކާމައި ގުޅޭގޮތުން ދެއްކޭނެ އެއްވެސް ވާހަކައެއް ނެތް ކަމަށް ނަޝީދު ވިދާޅުވިއެވެ.
ލާމަރުކަޒީ ޤާނޫނަށް ގެންނަ ބަދަލާއިއެކު 2 މިލިއަން ރުފިޔާ ލިބެމުން އަންނަ ކައުންސިލަކަށް 30 މިލިއަން ރުފިޔާ ލިބިގެންދާނެ ކަމަށް ރައީސް ނަޝީދު ވިދާޅުވި އެވެ. އަދި އެކަމަކީ ކައުންސިލް ހިންގުމުގެ ތެރޭގައި ކޮރަޕްޝަން އިތުރުވެގެންދާނެ ކަމަށް އިދިކޮޅު ފަރާތްތަކުން ވިދާޅުވާނެ ކަމަށް އެމަނިކުފާނު ވިދާޅުވި އެވެ. ނަމަވެސް އެއީ ކޮރަޕްޝަނަށް މަގުފަހިވާނެކަމެއް ނޫންކަމަށް ރައީސް ނަޝީދު ވިދާޅުވި އެވެ.
އިތުރަށް ވާހަކަދައްކަވަމުން ރައީސް ނަޝީދު ވިދާޅުވީ ތަރައްގީއަކީ ޖީބަށް ވަންނަ އަދަދު ނޫން ކަމަށާއި އާންމު ދިރިއުޅުމަށް އަންނަ ބަދަލު ކަމަށެވެ. އަދި އަމިއްލައަށް ހޯދޭ ތަނަވަސް ކަމަށް ފުރުސަތު ހޯދައިދޭނީ 19 ވަނަ މަޖިލީހުން ކަމަށް ވިދާޅުވިއެވެ. ރައީސް ނަޝީދު ވިދާޅުވީ ރަށު ކައުންސިލްތައް އެ ކައުންސިލްތަކުގެ މިލްކިއްޔާތު ދެނެގަންނަން ޖެހޭކަމަށާއި އަތޮޅު ކައުންސިލްތައް އެކައުންސިލްތަކުގެ މިލްކިއްޔާތު ދެނެގަންނަން ޖެހޭ ކަމަށެވެ.
