އައިޔޫއެމްގެ ޖާގަ ކުޑަވެ ކޮރިޑޯވެސް ކުލާސްރޫމްތަކަށް ހަދައިގެން ބޭނުންކުރޭ: ޒަކަރިއްޔާ

އިސްލާމިކް ޔުނިވަރސިޓީ އޮފް މޯލްޑިވްސްގެ އިމާރާތް މިހާރުހުރި ގޮތުން ޖާގައިގެ ދަތިތައް ދިމާޥެގެން ކޮރިޑޯގައި ކުލާސްރޫމްތައް ހަދައިގެން ބޭނުންކުރަންޖެހޭކަމަށް އެ ޔުނިވަރސިޓީގެ ވައިސް ޗާންސެލަރ ޑރ. އިބްރާހިމް ޒަކަރިއްޔާ މޫސާ ވިދާޅުވެއްޖެއެވެ.

ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީގައި ބުދަ ދުވަހު ވާހަކަދައްކަވަމުން ޒަކަރިއްޔާ ވިދާޅުވީ މިހާރު ބޭނުންކުރާ އިމާރާތަކީ 2003 ވަނަ އަހަރު ކިންގް ފަހަދުގެ ހާއްސަ އިނާޔަތެއްގެ ދަށުން ސާނަވީ މަދުރަސާއެއް ހިންގުމަށް ބިނާކުރެއްވި އިމާރާތެއް ކަމަށެވެ. އަދި އެތަނަކީ ސާނަވީ މަދުރަސާއެއް ހިންގުމަށް ބޭނުންވާ ކަންތައްތަކަކާއި އަމާޒުކުރެވިގެން ފަރުމާ ކުރެވިފައިވާ އިމާރާތެއް ކަމަށާއި، އެއީ ގާތްގަނޑަކަށް 1000 ދަރިވަރުންނަށް އަމާޒުކޮށްގެން ހަދާފައިވާ އިމާރާތެއް ކަމަށެވެ.

އައިޔޫއެމްގެ މިހާރުވެސް 2000 އެއްހާ ދަރިވަރުން ދަނީ ކިޔަވަމުންނެވެ. އަދި އެތަނުގައި ފުލްކޮށް ކޮންމެ ދުވަހަކުވެސް ހެނދުނުން ފެށިގެން ރޭގަނޑު 11 ޖަހަންދެން ކުލާސްތައް ކުރިއަށް ގެންދެއެވެ. ނަމަވެސް 2015 ވަނަ އަހަރު ޔުނިވާސިޓީއަކަށް ބަދަލުވި ހިސާބުން ފެށިގެން ޔުނިވަރސިޓީގެ އެކިއެކި ރިކުއަރމެންޓްތަކަށް ލެކްޗާ ހޯލްތަކާއި އަދި އޮޑިޓޯރިއަމްފަދަ ތަންތަނަށް ބޭނުންވާ ކަމަށް ޒަކަރިއްޔާ ވިދާޅުވިއެވެ.

އެއީ ކަލެކްޓިވްކޮށް ގެންދާ ބައެއް ކޯސްތަކަށް 120 ދަރިވަރުން އެއްފަހަރާ ގެނެސް ލެކްޗާ ދިނުންފަދަ ބައެއް ކޯސްތައް ހިނގާއިރު، އެފަދަ ކޯސްތަކަށްވެސް އޮޑިޓޯރިއަމް ކަހަލަ ތަނެއް ނެތުމުގެ ސަބަބުން ވަރަށްބޮޑެތި ދަތިތަކެއް ދިމާވާ ކަމަށެވެ.

ޒަކަރިއްޔާ ވިދާޅުވީ އައިޔޫއެމްގެ ޓްރަސްޓް ފަންޑަށް ލިބުނު އެހީއެއްގެ ތެރެއިން މިދިޔަ އަހަރުތެރޭގައި ހުޅުމާލެއިން 4300 އަކަފޫޓްގެ ބިމެއް ގަނެފައިވާ ކަމަށެވެ. މި ބިން އައިޔޫއެމުން ގަނެފައިވަނީ 5 މިލިއަން ރުފިޔާއަށެވެ. އަދި މި ބިމުގައި ގާތްގަނޑަކަށް ހަތް ބުރީގެ އިމާރާތެއް ހެދޭނެ ކަމަށާއި، އޭގެ ބޭނުމަކީ އައިޔޫއެމް ވީހާ ވެސް ބޮޑަކަށް ބަޖެޓަށް ޑިޕެންޑް ނުކޮށް އަމިއްލަ ފައިމައްޗަށް ތެދުވެވޭނެ ގޮތެއް ވުން ކަމަށް އޭނާ ވިދާޅުވި އެވެ.

އޭނާ ވިދާޅުވީ އެ އިމާރާތުގެ ޑިޒައިން ކުރަހާ ބީއޯކިއު ވެސް ތައްޔާރުކުރެވިފައިވާ ކަމަށެވެ. އަދި މިދިޔަ އަހަރުގެ ތެރޭގައި ސައުދީ އަރަބިއްޔާއަށް ކުރެއްވި ދަތުރުގެ ތެރެއިން އޯއައިސީގެ ބޭފުޅުންނާ ބައްދަލުކޮށް އެބޭފުޅުންގެ ވަރަށްބޮޑު އިންޓްރެސްޓެއް ފާޅުކުރައްވާ މި އިމާރާތް އެބޭފުޅުންގެ އަމިއްލަ ހަރަދުގައި ހައްދަވައި ދެއްވުމަށް ހުށަހަޅުއްވާފައިވާކަމަށް އޭނާ ވިދާޅުވިއެވެ. ނަމަވެސް ބައެއް ކަންކަން ހުރި ގޮތުން އެ މަސައްކަތް މަޑުޖެހިފައިވާ ކަމަށް ޒަކަރިއްޔާ ވިދާޅުވިއެވެ.

ޒަކަރިއްޔާ ވިދާޅުވީ އެކަން ކުރުމަށް ގާނޫނީ ޕްރޮސެސްއެއްގެދަށުން އެކަންކަން ހަމަޖައްސަން ޖެހޭ ކަމަށާއި، މި ޕްރޮޖެކްޓައް ފަންޑު ލިބިފައިވީ ނަމަވެސް ލީގަލް ޕްރޮސެސްގެ ދަށުން މިކަން ކުރަން ޖެހޭތީ މަސައްކަތް ލަސްވާ ކަމަށެވެ. އަދި އަންނަ އަހަރު ފެށޭ ހިސާބުގައި އިމާރާތްކުރަން ފެށޭގޮތް ވާން އޯއައިސީން ބޭނުންވި ނަމަވެސް، އެކަން އަދި ކުރެވެން ނެތްކަމަށް އޭނާ ވިދާޅުވިއެވެ.

ޒަކަރިއްޔާ ވިދާޅުވީ މި އިމާރާތް ނިންމާލެވިއްޖެކަމުގައި ވާނަމަ މިއީ ވަރަށް ޕްރައިމް ލޮކޭޝަނެއްގައި ހުރި އިމާރާތަކަށް ވެފައި،އެތަން މިހާރުވެސް ކުއްޔަށް ހިފުމުގެ ޝައުގުވެރިކަން ފާޅުކުރަމުންދާ ފަރާތްތައް ހުރުމުން ލަފާކުރެވޭ ގޮތަށް ޕްރޮސްޕެކްޓިވް ގޮތެއްގައި މިތަނުން ފުދޭވަރެއްގެ އާމްދަނީއެއް ޖަނަރޭޓްކުރެވޭނެ ކަމަށް އޭނާ ވިދާޅުވިއެވެ. އަދި އޭގެ ސަބަބުން އައިޔޫއެމްގެ ބަޖެޓަށް ވަރަށް ބޮޑަށް ލޯޑް ކުޑަވެގެންދާނެ ކަމަށް ޒަކަރިއްޔާ ވިދާޅުވިއެވެ.