ގައުމީ އުފެއްދުންތެރިކަން އިތުރު ކުރަން ބޭނުންނަމަ ވަޒީފާއާއިބެހޭ ގާނޫނު އިސްލާހުކުރޭ!
ޑރ ހަސަން މިހެން ވިދާޅުވީ ހޯމަ ދުވަހުގެ ގައުމީ ތަރައްގީއާއި ތަރިކައިގެ ކޮމެޓީގައި ވާހަކަދައްކަވަމުން
މޯލްޑިވްސް ނެޝަނަލް ޔުނިވާރސިޓީގެ ޗާންސެލަރު ޑރ. ހަސަން ހަމީދު
ވަޒީފާއާއިބެހޭ ޤާނޫނުގައި މަސައްކަތްތަކުގެ އަހުލާގު ތަންފީޒްކުރެވެން ނެތްކަމަށް ވިދާޅުވެ، މޯލްޑިވްސް ނެޝަނަލް ޔުނިވާރސިޓީގެ ޗާންސެލަރު ޑރ. ހަސަން ހަމީދު ކަންބޮޑުވުން ފާޅުކުރައްވައިފި އެވެ.
ޑރ ހަސަން މިހެން ވިދާޅުވެ، ކަންބޮޑުވުން ފާޅުކުރީ ހޯމަ ދުވަހުގެ ގައުމީ ތަރައްގީއާއި ތަރިކައިގެ ކޮމެޓީގައި ވާހަކަދައްކަވަމުންނެވެ.
ދުނިޔޭގެ އެކި ގައުމުތަކުގައި އަހަރަކު މަސައްކަތްކުރާ ގަޑިތަކުގެ ޗާޓެއް ކޮމެޓީ މެމްބަރުންނާއި ހިއްސާކުރައްވަމުން ޑރ. ހަސަން ވިދާޅުވީ މަސައްކަތް ކުރާ ގަޑިތަކުގެ އަދަދު އެންމެ ދަށް ގައުމަކީ ރާއްޖެ ކަމަށެވެ.
އޭނާ ވިދާޅުވީ ރައްޔިތުންގެ މަޖިލީހުން ވަޒީފާއާއި ބެހޭ ގާނޫނު ފާސްކުރިއިރު ވަޒީފާދޭ ފަރާތްތަކާއި މަޝްވަރާ ކޮށްފައި ނުވާ ކަމަށެވެ.
އެ ގާނޫނުގައި ހިމެނެނީ ވަޒީފާ އަދާކުރާ ފަރާތުގެ ވާހަކަތައް އެކަނި ކަމަށް ޑރ. ހަސަން ވިދާޅުވި އެވެ. މިސާލެއް ނަންގަވަމުން ވިދާޅުވީ ގާނޫނީ ގޮތުން 30 ދުވަހުގެ ޗުއްޓީ ދެނީ ހަމައެކަނި 7 ގައުމަކުން ކަމަށެވެ. އަދި އޭގެއިން އެއްގައުމަކީވެސް ތަރައްގީވެފައިވާ ގައުމެއް ނޫންކަމަށް އޭނާ ވިދާޅުވި އެވެ. މިފަދަ ގާނޫނެއް ތަންފީޒު ކުރުމުގެ ނަތީޖާއަކީ މަސައްކަތްތެރިކަން ދަށްވުން ކަމަށް ވިދާޅުވިއެވެ.
ގައުމީ އުފެއްދުންތެރިކަން އިތުރު ކުރަން ބޭނުންނަމަ ވަޒީފާއާއި ބެހޭ ގާނޫނު އިސްލާހުކުރަންޖެހޭ ކަމަށް ވިދާޅުވި ވިދާޅުވުމަށް ތާއީދު ކުރައްވަމުން ހޯރަފުށި ދާއިރާގެ މެމްބަރު އަހްމަދު ސަލީމް ވިދާޅުވީ ރާއްޖޭގެ އުފެއްދުންތެރިކަމާއި ގައުމީތަރައްގީއަށް އޮތް އެންމެ ބޮޑު އެއް ހުރަހަކީ ވަޒީފާއާއި ބެހޭ ގާނޫނު ކަމަށެވެ. މެމްބަރު ވަނީ ވަޒީފާއާއިބެހޭ ގާނޫނުގެ އިލްމީ މުރާޖާއެއް ކުރުމަށް ބޭނުންވެފައިވާކަން ފާހަގަކުރައްވާފަ އެވެ.
