ސްޕްރީމް ކޯޓަށް ފަނޑިޔާރުން އައްޔަނު ކުރުން ދެން އޮންނަ ޖަލްސާގައި

ސުޕްރީމް ކޯޓުގެ ފަނޑިޔާރުކަމުގެ މަގާމަށް ޑްރަގް ކޯޓުގެ ފަނޑިޔާރު މަހާޒް އަލީ ޒާހިރު ނުވަތަ ކުރީގެ ބަންޑާރަ ނައިބު ފާތިމަތު ދިޔާނާ ސައީދު އައްޔަންކުރުމުގެ މައްސަލަ ދެން އޮންނަ ޖަލްސާ އެއްގައި ކުރިޔަށް ގެންދަވާނެކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.

ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާއަށް މިމައްސަލަ ކޮމެޓީތަކުން ހުށަހަޅާ ކަންކަމުގެ ތެރޭގައި ވަނީ އެޖެންޑާ ކޮށްފައެވެ. އެހެންކަމުން ހޯމަ ދުވަހުގެ ޖަލްސާގައި ސުޕްރީމް ކޯޓަށް ފަނޑިޔާރަކު އައްޔަނު ކުރާނެކަމަށް ކުރިން ވަނީ ބެލެވިފައެވެ.

ހޯމަ ދުވަހުގެ ޖަލްސާގައި ވޯޓަށް އެހުމަށް ހުރި ކަންކަމަށް ވޯޓަށް އަހާ ނިމުނީ ކަމަށް ރިޔާސަތުން ވިދާޅުވުމުން ނިޒާމީ ނުކުތާ ނަންގަވާ ތިމަރަފުށީ ދާއިރާގެ މެމްބަރު އަބްދުﷲ ރިޔާޒު ވަނީ އެޖެންޑާގައި ސުޕްރީމް ކޯޓަށް ފަނޑިޔާރަކު އައްޔަނުކުރުން އޮތްނަމަވެސް އެކަން ނުނިމި ދާތީ އެކަމުގެ ސަބަބު އައްސަވާފަ އެވެ. އެއާއެކު ރިޔާސަތުން ވިދާޅުވީ އާންމު ގޮތެއްގައި ކޮމެޓީ ތަކުގެ ރިޕޯޓްގެ މަސައްކަތް ގެންދަނީ 1 އާއި 1:30 އާ ދެމެދު ކަމަށެވެ. އަދި މިހާރު މަޖިލީހުގެ ގަވާއިދު އޮތްގޮތުން ތަރުތީބުން ނޫންގޮތަކަށް ދެވެން ނޯންނަކަމަށް ނަޝީދު ވިދާޅުވި އެވެ.

އެމްއެމްޕީއާރްސީގެ ޚިޔާނާތުގެ މައްސަލާގައި ހިމެނޭ މީހުން އަތުން ފައިސާ ނެންގެވިކަމުގެ ތުހުމަތު ކުރެވި ސުޕްރީމް ކޯޓުގެ ފަނޑިޔާރު އަބްދުﷲ ދީދީ ރައްޔިތުންގެ މަޖިލީހުން ވަކިކުރުމާއި ގުޅިގެން، އެ މަގާމު ވަނީ ހުސްވެފައެވެ. އެމަގާމަށް ފަނޑިޔާރަކު އައްޔަންކުރެއްވުމަށް ހުޅުވާލި ފުރުސަތުގައި ހަ ބޭފުޅަކު ވަނީ ކުރިމަތި ލައްވާފައެވެ.

ރައީސް ސޯލިހު ދިޔާނާ އާއި މަހާޒުގެ ނަންފުޅު މަޖިލީހަށް ފޮނުއްވި މިމަހުގެ 17 ވަނަ ދުވަހު އެވެ.

އެންމެފަހުން އައްޔަންކުރެވުނު ޑރ. އަޒްމިރަލްދާ ޒާހިރާއި، އައިޝާ ޝުޖޫން މުހައްމަދާއެކު ސުޕްރީމް ކޯޓުގެ ފަނޑިޔާރުންގެ ބެންޗުގައި މިވަގުތު ތިއްބެވީ 6 ފަނޑިޔާރުންނެވެ. ކޯޓުތަކުގެ ގާނޫނަށް އެންމެފަހުން ގެނެވުނު އިސްލާހުގައިވާގޮތުން ސުޕްރީމް ކޯޓުގެ ބެންޗުގައި އުއްތަމަ ފަނޑިޔާރާއެކު ޖުމްލަ 7 ފަނޑިޔާރުން ތިއްބަވަންޖެހެ އެވެ.