ޕްރިމިއާ ލީގުގައި ނޯވިޗް ސިޓީ ބަލިކޮށް މެންޗެސްޓަރ ޔުނައިޓެޑް ޕޮއިންޓް ތާވަލުގެ ހަތްވަނައަށް ޖެހިލައިފިއެވެ.

އާދީއްތަ ދުވަހުގެ ރޭ ކުޅުނު މެޗުން ޔުނައިޓެޑް މޮޅުވީ ނޯވިޗްއާ ވާދަކޮށް 1-3 ގެ ނަތީޖާއަކުންނެވެ.

ނޯވިޗް ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅެމުން ދިޔައީ ޔުނައިޓެޑުންނެވެ. އެގޮތުން އެޓީމުން ވަނީ ނޯވިޗްގެ ހާފަށް ބާރުބޮޑުކޮށް ލަނޑު ޖެހުމަށް ފުރުސަތުތަކެއް ހޯދާފައެވެ.

ޔުނައިޓެޑުން މެޗުގެ ލީޑު ނެގީ 21 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ ޓޮމިނޭއެވެ. މި ލަނޑަށްފަހުވެސް ޔުނައިޓެޑުން ދިޔައީ ލަނޑު ޖެހުމަށް ފުލުފުލުގައި ފުރުސަތު ހޯދަމުންނެވެ.

މެޗުގެ 29 ވަނަ މިނެޓުގައި ޔުނައިޓެޑަށް ޕެނަލްޓީއެއް ލިބިފައިވާއިރު، މާކަސް ރަޝްފޯޑް ފޮނުވާލި މި ޕެނަލްޓީ ނޯވިޗްގެ ކީޕަރ ކްރުލް ވަނީ ހުށިއާރު ކަމާއެކު ދިފާއުކޮށްފައެވެ. ނަމަވެސް އޭގެ މިނެޓެއް ފަހުން ޔުނައިޓެޑުން ވަނީ ލީޑު ފުޅާކޮށްފައެވެ. މި ލަނޑު ޖޭމްސްގެ އެހީތެރިކަމާއެކު ކާމިޔާބުކުރީ ރަޝްފޯޑްއެވެ.

ފުރަތަމަ ހާފް ނިމުމުގެ ކުރިން ޔުނައިޓެޑަށް ވަނީ އިތުރު ޕެނަލްޓީއެއް ލިބި ބޭކާރުވެފައެވެ. އެންތަނީ މާޝިއަލް ފޮނުވާލި މި ޕެނަލްޓީ ނޯވިޗްގެ ކީޕަރ ކްރުލް ވަނީ ދިފާއުކޮށްފައެވެ.

ދެވަނަ ހާފް ފެށިގެން ދެޓީމުގެ ފަރާތުންވެސް ދާދި ހަމަހަމަ ކުޅުމެއް ފެނިގެން ގޮސްފައިވާއިރު، ލަނޑު ޖެހުމަށް ދެޓީމަށްވެސް ވަނީ ފުރުސަތުތަކެއް ލިބި ބޭކާރުވެފައެވެ.

ޔުނައިޓެޑުން ލީޑު އިތުރަށް ފުޅާކުރީ 73 ވަނަ މިނެޓުގައެވެ. މި ލަނޑު ރަޝްފޯޑްގެ އެހީތެރިކަމާއެކު ކާމިޔާބުކުރީ މާޝިއާލްއެވެ. މެޗު ނިމުމުގެ ކުރިން ނޯވިޗްގެ ހަމައެކަނި ލަނޑު ކާމިޔާބުކޮށްދިނީ ހެނާންޑޭޒްއެވެ.

މި ނަތީޖާއާއެކު ޔުނައިޓެޑް އޮތީ ކުޅުނު 10 މެޗުން ލިބުނު 13 ޕޮއިންޓާއެކު، ޕޮއިންޓް ތާވަލުގެ ހަތްވަނައިގައެވެ. މެޗުން ބަލިވި ނޯވިޗް އޮތީ ކުޅުނު 10 މެޗުން ލިބުނު ހަތް ޕޮއިންޓާއެކު ޕޮއިންޓް ތާވަލުގެ 19 ވަނައިގައެވެ.