ދިރާގު ދިވެހި ޕްރިމިއާ ލީގުގައި ހޮނިހިރު ދުވަހުގެ ރޭ ދަ ގްރާންޑޭ ސްޕޯޓްސް ކްލަބް އަތުންވި މޮޅާ އެކު މާޒިޔާއިން ލީގު ތާވަލުގެ އެއްވަނައިގައި 8 ޕޮއިންޓްގެ ލީޑެއް ނަގައިފިއެވެ.

ގައުމީ ފުޓުބޯޅަ ދަނޑުގައި ކުޅުނު މެޗުން މާޒިޔާ މޮޅުވީ 0-1 ގެ ނަތީޖާ އަކުންނެވެ.

ހަމަހަމަ ކުޅުމެއް ފެނިގެންދިޔަ މި މެޗުގެ ފުރަތަމަ ހާފުގައި ދެ ޓީމުގެ ފަރާތުންވެސް މޮޅު އެޓޭކިންގ ގޭމެއް ފެނިގެންދިޔައިރު ދެ ޓީމުން ވެސް ދިޔައީ ނުރައްކާތެރި ގިނަ ހަމަލާތަކެއް ފޮނުވައިލަމުންނެވެ. އެގޮތުން މާޒިޔާގެ ހަމްޒާ މުހައްމަދު (ހަމްޕު) ނުރައްކާތެރި ހަމަލާއެއް ފޮނުވާލިއިރު، ދަ ގްރާންޑޭގެ އަހުމަދު ހުސާމް ފޮނުވާލި ބޯޅަ އަމާޒުވީ ގޯލުގެ ހުރަސް ދަނޑިއަށެވެ.

މެޗުގެ ފުރަތަމަ ހާފު ނިމިގެންދިޔައީ 0-0 ގެ ނަތީޖާ އަކުން އެއްވަރު ވެގެންނެވެ.

މެޗުގެ ދެވަނަ ހާފު ފަށައިގެން މާޒިޔާއިން އެޓީމުގެ ކުޅުން އިތުރަށް ވަރުގަދަ ކުރިއިރު މެޗުގެ 48 ވަނަ މިނެޓުގައި މާޒިޔާއިން ވަނީ ލަނޑު ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބު ކޮށްދިނީ އަސަދުﷲ އަބްދުﷲ އެވެ. އޭނާ މި ލަނޑު ކާމިޔާބުކުރީ ބިދޭސީ ފޯވާޑް ކޮނޭލިއަސް ސްޓެވާޓްގެ އެހީތެރިކަމާއެކުގައެވެ.

މި ލަނޑަށް ފަހު ވެސް މާޒިޔާ އަށް ވަނީ ލަނޑު ޖެހުމަށް ރަނުގެ ފުރުސަތު ތަކެއް ލިބި ބޭކާރު ވެފައެވެ.

މި ނަތީޖާ އާއި އެކު މާޒިޔާއިން ލީގު ތާވަލުގެ އެއްވަނައިގައި އޮތީ 29 ޕޮއިންޓާ އެކުގައެވެ. ދެވަނައިގައި ކްލަބް އީގަލްސް 21 ޕޮއިންޓާއެކު އޮތް އިރު ތިން ވަނައިގައި އޮތް ގްރީސް ސްޓްރީޓްސް އަށް ލިބިފައިވަނީ 20 ޕޮއިންޓެވެ. އަދި މެޗުން ބަލިވި ދަ ގްރާންޑޭ ލީގު ތާވަލުގެ ފަސް ވަނައިގައި އޮތީ 15 ޕޮއިންޓާ އެކުގައެވެ.