ގައުމީ ފިރިހެން ކްރިކެޓް ޓީމުން ސީނިއަރ ކުޅުންތެރިން ބާކީކޮށްފި

ގައުމީ ފިރިހެން ކްރިކެޓް ޓީމުގެ ސްކޮޑުން ސީނިއަރ ކުޅުންތެރިން ބާކީ ކޮށްފިއެވެ.

ރާއްޖެއެމްވީއަށް މައުލޫމާތު ލިބިފައިވާ ގޮތުގައި ގައުމީ ފިރިހެން ކްރިކެޓް ޓީމުން ސީނިއާ ކުޅުންތެރިން ބާކީ ކުރީ ގައުމީ ޓީމުގެ ކޯޗު އާސިފް ޚާން ކުޑަ އަންހެން ކުދިންތަކަކަށް ޖިންސީ ފުރައްސާރަ ކުރި ކަމަށް ބުނެ، އެކަމުގެ ދިފާއުގައި ގައުމީ ފިރިހެން ޓީމުގެ ކުޅުންތެރިން ތެދުވުމުންނެވެ.

ގައުމީ ފިރިހެން ޓީމުގެ ކުޅުންތެރިން ސަސްޕެންޑް ކުރި އިރު، ނޮވެމްބަރު މަހު ގައުމީ ކްރިކެޓް ޓީމު ރާއްޖެއިން ބޭރުގައި ކޭމްޕް ކުރުމަށް ވަނީ ހަމަޖެހިފައެވެ. ނަމަވެސް މައުލޫމާތު ލިބިފައިވާ ގޮތުގައި މި ކޭމްޕަށް މިހާރު ދިޔުމަށް ހަމަޖެހިފައި ވަނީ 21 އަހަރުން ދަށުގެ ގައުމީ ޓީމެވެ.

ކްރިކެޓް ބޯޑުގެ ރައީސް މުހައްމަދު އަފްލާހް ވިދާޅުވީ، ގައުމީ ކްރިކެޓް ޓީމު ސަސްޕެންޑް ކުރިކަމެއް އެނގިފައި ނުވާކަމަށާއި، ނޮވެމްބަރ މަހު އޮތް ކޭމްޕަށް ދާނެ ކުޅުންތެރިން ކަނޑައަޅާނީ ކުޅުންތެރިން ނެގުމަށް ހަދާފައިވާ ކޮމެޓީން ކަމަށެވެ. ނަމަވެސް ރާއްޖެއެމްވީއަށް މައުލޫމާތު ލިބިފައިވަނީ ގައުމީ ފިރިހެން ޓީމު އެއްކޮށް ސަސްޕެންޑް ކުރިކަމަށެވެ.

ގައުމީ ކްރިކެޓް ޓީމުގެ މައްސަލަތައް ފެންމަތިވެފައިވަނީ ކްރިކެޓް ބައެއް ކުޅުންތެރިންނަށް ގައުމީ ކޯޗު އާސިފް ޚާން ޖިންސީ ފުރައްސާރަ ކުރިކަމުގެ ތުހުމަތުތަކާއެކުގައެވެ. އަދި އޭނާ އެކަން ކުރުމުން އެކަންތައް ކްރިކެޓް ބޯޑުން ފޮރުވަން މަސައްކަތްކުރި ކަމަށްވެސް ތުހުމަތުތަކެއް ވަނީ ކުރެވިފައެވެ.

އިތުބާރު ހުރި ފަރާތަކުން ރާއްޖެއެމްވީ އަށް މައުލޫމާތު ދިން ގޮތުގައި ޕާކިސްތާނުގެ އެމްބަސަޑަރ ވައިސް އެޑްމިރަލް ރިޓަޔާޑް ވަސީމް އަކްރަމް އަންނަނީ މައްސަލަ ތަހުގީގު ކުރަމުންދާ ފުލުހުންނަށް ގުޅައި ކްރިކެޓް ކޯޗުގެ މައްސަލަ ވަކިގޮތަކަށް ނިންމުމަށް ނުފޫޒު ފޯރުވަމުންނެވެ. ހަމައެހެންމެ އޭނާގެ ގާނޫނީ ވަކީލުންގެ ފީ ވެސް ދައްކަނީ ކްރިކެޓް ކޯޗު ނިސްބަތްވާ ޕާކިސްތާނުގެ އެމްބަސީއިން ކަން ރާއްޖެއެމްވީ އަށް ވަނީ މައުލޫމާތު ލިބިފައެވެ.

ޒުވާން ކްރިކެޓް ކުޅުންތެރިންނަށް އާސިފް ވަނީ އެކި ފަހަރު މަތިން ޖިންސީ ގޯނާ ކުރިކަމުގެ ތުހުމަތުގައި އޭނާ ހައްޔަރު ކުރުމަށް ފަހު ދޫކޮށްލަން ޖެހުނީ ޖިނާއީ އިޖުރާއަތުގެ ގާނޫނުގައި ބުނާ މުހުލަތުގެ ތެރޭގައި އޭނާ ކޯޓަށް ނުގެންދެވުމުންނެވެ. އޭނާ އެ އަމަލު ހިންގި ކަމަށް ތުހުމަތު ކުރާ ކުދިންގެ ތެރޭގައި، 18 އަހަރު ނުފުރޭ ކުޑަކުދިން ވެސް ހިމެނެއެވެ.

މީގެއިތުރުން އާސިފްގެ މައްސަލަ ފެންމަތިވެފައި ވަނިކޮށް، އޭނާއަށް އެއްވެސް ފިޔަވަޅެއް ނާޅައި ރާއްޖެއިން ފުރުވާލަން މަސައްކަތް ކުރި ކަމުގެ ތުހުމަތު ކްރިކެޓް ބޯޑް އޮފް މޯލްޑިވްސްއަށް ވަނީ ކުރެވިފައެވެ.