އައްޑުގައި ތެލެސީމިއާ ސޮސައިޓީގެ ޖަމިއްޔާއެއް އުފައްދައިފި
26 އޮކްޓޯބަރު 2019 | ހޮނިހިރު 13:11މިހާތަނަށް 60 ވަރަކަށް މެންބަރުން ރަޖިސްޓްރީވެފައިވޭ
އައްޑު ތެލެސީމިއާ ސޮައިޓީގެ އިފްތިތާހީ ޖަލްސާގެ ތެރެއިން
އައްޑު ސީޓީގައި ތެލެސީމިއާ ސޮސައިޓީގެ ޖަމިއްޔާއެއް އުފައްދައިފިއެވެ.
މި ޖަމިއްޔާއަކީ އައްޑުގައި ދިރިއުޅޭ ތެލެސީމިއާ ޕޭޝަންޓުންގެ ކަންކަން ބަލާ އެ ފަރާތްތަކަށް އެހީތެރިވުމަށް އުފައްދާފައިވާ ޖަމިއްޔާއެކެވެ. މި ޖަމިއްޔާ ރަސްމީކޮށް އިފްތިތާހުކޮށްފައިވަނީ ބުރާސްފަތި ދުވަހުއެވެ.
އެޖަމިއްޔާގެ ފައުންޑާ އަދި ހިންގާ ކޮމިޓީގެ ނައިބު ރައީސާ އާމިލާ ވަހީދު "ރާއްޖެ އެމްވީ" އަށް މައުލޫމާތުދެއްވަމުން ވިދާޅުވީ އެ ޖަމިއްޔާގައި މިހާތަނަށް 60 ވަރަކަށް މެންބަރުން ރަޖިސްޓްރީވެފައިވާ އިރު، މީގެ ތެރެއިން 16 މެންބަރުންނަކީ ތެލެސީމިއާ ޕޭޝަންޓުން ކަމަށެވެ.
އޭނާ ވިދާޅުވީ އައްޑޫގައި 4 އަހަރުން ފެށިގެން 50 އަހަރާ ދެމެދުގެ ތެލެސީމިއާ ޕޭޝެންޓުން ތިބި އިރު، އެފަރާތްތަކަށް ބޭނުންވާ އެންމެ އެކަށޭނެ ފަރުވާއެއް އައްޑު ސިޓީއިން ނުލިބޭ ކަމަށެވެ. އަދި އެކަމުގެ ސަބަބުން ދަތިތަކަކާއި ދިމާވާ ކަމަށާއި، މިކަމާއި ގުޅިގެން ކަމާ ބެހޭ ފަރާތްތަކާއި ވެސް ވާހަކަ ދެކެވިފައިވާ ކަމަށެވެ.
އައްޑު ތެލެސީމިއާ ސޮސައިޓީގެ އިފްތިތާހީ ޖަލްސާގައި ވަނީ އެ ސިޓީގައި ހުންނަ "މެޑި ސިޓީ" ކުލިނިކާއެކު އެއްބަސްވުމެއްގައި ސޮއިކޮށްފައެވެ. އެގޮތުން މި އެއްބަސްވުމުގެ ދަށުން ތެލެސީމިއާ ޕޭޝެންޓުންނަށް ކަމާބެހޭ ފަރާތްތަކަށް ދައްކާ، އަދި ޑޮކްޓަރައް ދައްކާ ފީ އިން ޑިސްކައުންޓް ދިނުމަށް ވަނީ ހަމަޖެހިފައެވެ.
