ވޯލްޑްކަޕް ކޮލިފިކޭޝަނުގެ ދެ މެޗަށް ތައްޔާރުވުމަށް ގައުމީ ޓީމު މެލޭޝިއާގައި ކޭމްޕް ކުރަނީ

ވޯލްޑް ކަޕް އަދި އޭޝިއަން ކަޕް ޖޮއިންޓް ކޮލިފިކޭޝަނުގައި ނޮވެމްބަރުމަހު ފިލިޕީންސް އަދި ގުއާމާއި ދެކޮޅަށް ރާއްޖޭގައި ކުޅޭ ދެ މެޗަށް ތައްޔާރުވުމުގެ ގޮތުން ގައުމީ ފުޓުބޯޅަ ޓީމު މެލޭޝިއާގައި ކޭމްޕްކުރަން ނިންމައިފިއެވެ.

އެފްއޭއެމްގެ ޖެނެރަލް ސެކްރެޓަރީ ހުސެއިން ޖަވާޒް ވިދާޅުވީ ގައުމީ ޓީމު މެލޭޝިއާއަށް ފުރުމަށް ހަމަޖެހިފައިވަނީ މިމަހު 27 ގައި ކަމަށާއި އަދި އެނބުރި ރާއްޖެ އައުމަށް ހަމަޖެހިފައިވަނީ ނޮވެމްބަތު ނުވަވަނަ ދުވަހުގައި ކަމަށެވެ.

މީގެ އިތުރުން ޖަވާޒް ވިދާޅުވީ ގައުމީ ޓީމު މެލޭޝިއާގައި ކޭމްޕްކުރުމަށް ހަމަޖެހިފައިވާ ދުވަސްތަކުގައި އެކުވެރިކަމުގެ މެޗުތަކެއް ހަމަޖެއްސުމަށް މަސައްކަތް ކުރަމުން އަންނަ ކަމަށެވެ.

ކޮލިފައިންގައި ރާއްޖެ ކުޅެންޖެހޭ ހަތަރުވަނަ މެޗުގައި ނޮވެމްބަރު 14 ވަނަ ދުވަހު ގަލޮޅު ރަސްމީ ފުޓުބޯޅަ ދަނޑުގައި ފިލިޕީންސް އާއި ދެކޮޅަށް ނިކުންނައިރު ނޮވެމްބަރު 19 ވަނަ ދުވަހު ރާއްޖެއިން ނިކުންނާނީ ގުއާމާއި ދެކޮޅަށެވެ.

މި މެޗަށް ގަލޮޅު ދަނޑަށް ސަޕޯޓަރުން ވެއްދުމަށް ގިނަ މަސައްކަތްތަކެއް އެފްއޭއެމްއިން ކުރަމުން އަންނައިރު ގައުމީ ޓީމު ކޮމެޓީގެ ޗެއާމަން އަލީ ވަހީދު ވިދާޅުވީ މި ދެ މެޗަށް ސަޕޯޓަރުން ނެރުމަށް ކުރެވެންހުރި ހުރިހާ މަސައްކަތެއް ކުރާނެ ކަމަށާއި އެގޮތުން ގަލޮޅު ދަނޑު ފުރާލާ މަޖީދީ މަގުގައި ސްކްރީން ބަހައްޓައިގެން ވެސް ބެލޭނެ ގޮތް ހަދާނެ ކަމަށެވެ.

ކޮލިފިކޭޝަނުގައި ރާއްޖެއިން މިހާތަނަށް ތިން މެޗު ކުޅެފައިވާއިރު މޮޅުވެފައިވަނީ އެންމެ މެޗަކުންނެވެ. އަމިއްލަ ދަނޑުގައި ޗައިނާ އަތުން 5-0 އިން ބަލިވިއިރު ސީރިއާ އަތުން ރާއްޖެ ބަލިވެފައިވަނީ 2-1 ގެ ނަތީޖާ އަކުންނެވެ. ކޮލިފިކޭޝަނުގައި ރާއްޖެއިން މޮޅުވެފައިވަނީ ރަށުން ބޭރުގައި ގުއާމް އަތުން 1-0 ގެ ނަތީޖާ އަކުންނެވެ.

ރާއްޖެ ހިމެނޭ ގްރޫޕްގެ އެއްވަނައިގައި ސީރިއާ ނުވަ ޕޮއިންޓާއެކު އޮތް އިރު ދެވަނައިގައި ޗައިނާ އޮތީ ހަތް ޕޮއިންޓާއެކުގައެވެ. މިގްރޫޕްގެ ތިން ވަނައިގައި ހަތަރު ޕޮއިންޓާއެކު ފިލިޕީންސް އޮތްއިރު ހަތަރުވަނައިގައި ރާއްޖެއިން އޮތީ ތިންޕޮއިންޓާއެކުގައެވެ. އަދި ގްރޫޕްގެ ފުލުގައި ގުއާމް އޮތީ ކުޅުނު ހުރިހާ މެޗަކުން ބަލިވެ ޕޮއިންޓެއް ނުލިބިއެވެ.