50 ވަނަ ގައުމީ ޓެނިސް މުބާރާތް ނޮވެމްބަރު މަހު!
22 އޮކްޓޯބަރު 2019 | އަންގާރަ 13:05މިއީ ރާއްޖޭގެ ބޭއްވޭ ބައިނަލްއަގްވާމީ ފުރަތަމަ ޓެނިސް މުބާރާތް
ޓެނިސް އެސޯސިއޭޝަނުގައި ބޭއްވުނު ނޫސްވެރިންގެ ބައްދަލުވުމުގެ ތެރެއިން
ބޮޑެތި އިނާމު ތަކަކާއެކު 50 ވަނަ ގައުމީ ޓެނިސް މުބާރާތް ނޮވެމްބަރު މަހު ފަށަން ނިންމައިފިއެވެ.
ބޭންކް އޮފް މޯލްޑިވްސް ނެޝަނަލް ޓެނިސް ޗެމްޕިއަންޝިޕް ބޭއްވުމަށް ހަމަޖެހިފައިވަނީ ނޮވެމްބަރު މަހު 15 އިން 23 ގެ ނިޔަލަށެވެ.
މި މުބާރާތުގައި ރާއްޖޭގެ އިތުރުން ސްރީލަންކާއާއި، އިންޑިއާއާއި، ނޭޕާލާއި، ކެމްބޯޑިއާގެ ކުޅުންތެރިން މުބާރާތުގެ އެކި ކެޓަގަރީތަކުގައި ވާދަކުރާނެއެވެ. މި މުބާރާތަކީ ރާއްޖޭގައި މިހާތަނަށް ބޭއްވޭ އެންމެ ބޮޑު ޓެނިސް މުބާރާތް ކަމަށް ޓެނިސް އެސޯސިއޭޝަނުން ބުނެއެވެ.
ރާއްޖޭގެ ޓެނިހުގެ ތާރީޚުގައި ބޭއްވޭ އެންމެ ބޮޑު ޓެނިސް މުބާރާތުގައި ވާދަކުރާ ކެޓަގަރީ ތަކުގެ ތެރޭގައި 7 އަހަރުންދަށް، 8 އަހަރުންދަށް، 12 އަހަރުންދަށް، 14 އަހަރުންދަށް، ޖޫނިއާ އޯޕަން، މެންސް އޯޕަން، ވުމަންސް އޯޕަން، މިކްސް ޑަބަލްސްގެ އިތުރުން 45 އަހަރުންދަށް ހިމެނެއެވެ. މި މުބާރާތުގައި 10 އަހަރުންދަށުގެ ކެޓަގަރީ ތަކުގެ މެޗުތައް ކުޅޭނީ ނޮކްއައުޓް ފޯމެޓަށެވެ.
ޓެނިސް އެސޯސިއޭޝަނުގެ ޖެނެރަލް ސެކްރެޓަރީ ޔޫސުފް ރިޒާ ވިދާޅުވީ މުބާރާތުގައި ބައިވެރިވުމަށް ބޭނުންވާ ކުޅުންތެރިން ބައިވެރިވުމަށް އެދެމުންދާ ކަމަށާއި މި މުބާރާތުގައި ބައިވެރިވުމަށް ހުށަހެޅުމުގެ އެންމެ ފަހު ދުވަހަކީ މި މަހު 23 ކަމަށެވެ. އަދި އުންމީދަކީ މި މުބާރާތުގައި ގާތްގަނޑަކަށް 150 ކުޅުންތެރިން ބައިވެރިވުންކަމަށެވެ. މުބާރާތުގެ އެކި ކެޓަގަރީ ތަކުގައި 20 ނުވަތަ 25 ހެއްހާ ބޭރުގެ ކުޅުންތެރިން ބައިވެރިވާނެ ކަމަށް އުންމީދު ކުރާ ކަމަށްވެސް ރިޒާ ވިދާޅުވިއެވެ.
މިއީ ރާއްޖޭގައި ބޭއްވޭ ފުރަތަމަ ބައިނަލްއަގުވާމީ ޓެނިސް މުބާރާތެވެ. އަދި މި މުބާރާތުގެ ފައިސާގެ އިނާމުގެގޮތުގައި 25،000 (ފަންސަވީސް ހާސް) އެމެރިކާ ޑޮލަރުވަނީ ހުށަހަޅައިފައެވެ. އެހެންކަމުން މި މުބާރާތް ވެގެންދާނީ ރާއްޖޭގެ ޓެނިހުގެ ތާރީޚުގައި ބޭއްވޭ އެންމެ އަގު ބޮޑު ޓެނިސް މުބާރާތަށެވެ.
