ފާއިތުވި ދުވަސްތަކުގައި ބްރޯޑްކޮމްއިން ކުރިހާވެސް މަސައްކަތަކީ ރާއްޖެޓީވީ ފަހަތުން ބިސްމަޅި ދުއްވުން :އާމިރު
21 އޮކްޓޯބަރު 2019 | ހޯމަ 19:03މި މުއައްސަސާތަކުގައި އުޅެނީ އަދަދުގެ ނުވަތަ ތަޖުރިބާގެ މައްސަލައެއް ނޫން ކަމަށް ވިދާޅުވި
ރާއްޖެޓީވީގެ ހެޑް އޮފް ޕްރޮގްރާމްސް އެންޑް ކޯޑިނޭޝަން އާމިރު ސަލީމް އަދި ނިއުސްޑިރެކްޓަރ ޒިހްނަތު ހަސަން
ފާއިތުވި ދުވަސްތަކުގައި މޯލްޑިވްސް ބްރޯޑްކާސްޓިންގް ކޮމިޝަން (ބްރޯޑްކޮމް) އިން ކުރިހާވެސް ،މަސައްކަތަކަށް ވެފައި އޮތީ ރާއްޖެ ޓީވީ ފަހަތުން ބިސްމަޅި ދުއްވުން ކަމަށް ރާއްޖެޓީވީގެ ހެޑް އޮފް ޕްރޮގްރާމްސް އެންޑް ކޯރޑިނޭޝަން އާމިރު ސަލީމް ވިދާޅުވެއްޖެއެވެ.
އާމިރު މިހެން ވިދާޅުވީ ހޯމަ ދުވަހު މީޑިއާ ކައުންސިލާއި، ބްރޯޑްކޮމް އެއްކުރުމާއި ގުޅޭ މައްސަލަ ދިރާސާ ކުރުމަށް އެކުލަވާލާފައިވާ ސަބް ކޮމެޓީން މީޑިއާތަކުގެ އިސްވެރިންގެ ޚިޔާލު ހޯދުމަށް ހޯމަދުވަހުގެރޭ ބޭއްވި ބައްދަލުވުމުގައި ވާހަކަދައްކަވަމުންނެވެ.
އާމިރު ވިދާޅުވީ ޙަޤީގަތަކީ މި ދެ މުއައްސަސާވެސް އޮތީ ފެއިލްވެފައި ކަމަށެވެ. އަދި މި މުއައްސަސާތަކުގައި އުޅެނީ ޢަދަދުގެ ނުވަތަ ތަޖުރިބާގެ މައްސަލައެއް ނޫން ކަމަށާއި، މައްސަލައަކީ އިޚުލާސްތެރިކަމުގެ މައްސަލައާއި މޮނިޓަރ ކުރުމުގެ މައްސަލަ ކަން އާމިރު ފާހަގަކުރައްވިއެވެ.
އާމިރު ވިދާޅުވީ ކޮމިޝަނެއް ހެދުމަށްފަހު، މީޑިއާ ރެގިއުލޭޓް ކުރެވޭނެ ހަރުދަނާ ނިޒާމެއް ޤާއިމު ކުރަން ޖެހޭ ކަމަށެވެ. އަދި ޤަވާއިދުން މޮނިޓަރ ކޮށްގެން ކަންތައްތައް ގެންދެވޭނަމަ މީޑިއާ ރެގިއުލޭޓު ކުރަން އޮންނަ ކޮމިޝަންތައް ޖަވާބުދާރީވަނިވި ގޮތަކަށް ހިންގޭނެ ކަމަށެވެ.
ކޮމެޓީއަށް ހާޒިރުވި ބައެއް މީޑިއާތަކުގެ އިސްވެރިން، މީޑިއާއަކީ ރެގިއުލޭޓް ކުރަން ޖެހޭ ބައެއް ނޫން ކަމަށް ވިދާޅުވި ވިދާޅުވުމަށް އިޝާރާތްކުރައްވަމުން އާމިރު ވިދާޅުވީ ފަހަރުގައި އެއީ ރަނގަޅު ވާހަކައަކަށް ވެދާނެ ކަމަށެވެ. ނަމަވެސް މީޑިއާތައް ތަރައްޤީކުރަން ކޮންމެވެސް ބަޔަކު ތިބެންވާނެ ކަމަށެވެ.
ފާއިތުވި އަހަރުތަކުގައި ބްރޯޑްކާސްޓިންގް ކޮމިޝަންގައި ކަންތައްތައް ހިނގާ ދިޔަ ގޮތް ފާހަގަ ކުރައްވަމުން އާމިރު ވިދާޅުވީ، އެ ބޭފުޅުންގެ މައިގަނޑު މަސައްކަތަކަށް ވެފައި އޮތީ ފިޔަވަޅު އެޅުމާއި ޖޫރިމައިނާ ކުރުން ކަމަށެވެ. މީޑިއާތައް ކުރިއަރުވާ ތަރައްޤީ ކުރުމަށް އެއްވެސް މަސައްކަތެއް މީޑިއާގެ ބެލެނިވެރި ފަރާތްތަކުން ނުކުރާ ކަން އާމިރު ވަނީ ފާހަގަ ކުރައްވާފައެވެ.
މީގެ އިތުރުން އާމިރު ވިދާޅުވީ ކޮމިޝަނެއް ހަދާއިރު ތަޖުރިބާކާރު މީހުންގެ އިތުރުން މީޑިއާ ނުވަތަ ބްރޯޑްކާސްޓިންގ ދާއިރާގެ ފަންީ މީހުން ހިމެނުން މުހިއްމު ކަމަށެވެ.
ދެ މުއައްސަސާ އެއްކޮލާ މީޑީއާ ކޮމިޝަނެއް އެކުލަވާލުމަކީ އެއްވެސް މީހަކު ދެބަސްވާނެކަމެއް ނޫން ކަމަށާއި ރައްޔިތުންގެ މަޖިލީހުން އައްޔަނުކުރާ ގޮތަށް 5 މެމްބަރުންނާއި މިހާރު މީޑިއާ ކައުންސިލްއުން ގެންގުޅޭ މޮޑެލްގައި އޮންނަ ގޮތަށް ވެސް މީޑިއާތަކުން ދެ މީހަކު އިންތިޚާބު ކުރެވިދާނެ ކަމަށް އާމިރު ޚިޔާލު ހުށަހެޅުއްވިއެވެ.
ހޯމަ ދުވަހުގެ ރޭ ބޭއްވި މި ބައްދަލުވުމަކީ މޯލްޑިވްސް ބްރޯޑްކާސްޓިންގް ކޮމިޝަނާއި މޯލްޑިވްސް މީޑިއާ ކައުންސިލުން ކުރަމުންދާ މަސައްކަތް އެއް އިދާރާއަކުން ކުރުމަށް ރައްޔިތުންގެ މަޖިލީހުގެ މިނިވަން މުއައްސަސާތަކާއި ބެހޭ ކޮމެޓީއިން ގެންގުޅޭ ވިސްނުމަށް ޚިޔާލު ހޯދުމަށް މީޑިއާތަކާއި މަޝްވަރާ ކުރުމަށް ބޭއްވުނު ބައްދަލުވުމެކެވެ.
