ވިޔަފާރިތައް ފަސޭހަކަމާއެކު ބެލެހެއްޓޭނެ އޮންލައިން ނިޒާމެއް ގާއިމު ކުރުމަށް ގޮވާލާ ގަރާރު ބަލައިގަނެފި

ގަވާއިދުތަކާއި އެއްގޮތަށް ވިޔަފާރިތައް ފަސެހަކަމާއެކު ބެލެހެއްޓޭނެ އޮންލައިން ނިޒާމެއް ގާއިމު ކުރުމަށް ގޮވާލާ ގަރާރު މަޖިލީހުން ބަލައިގަނެފިއެވެ.

މި ގަރާރު މަޖިލީހުން ބަލައިގަތީ 73 މެމްބަރުންގެ ވޯޓުންނެވެ. މި ގަރާރު ދިރާސާ ކުރުމަށް ވަނީ ރައްޔިތުންގެ މަޖިލީހުގެ އިގްތިސޯދީ ކޮމެޓީއަށް ފޮނުވާފައެވެ.

މި ގަރާރަކީ އެ ނިޒާމް ގާއިމުކޮށް، މި ކަމަށް ބޭނުންވާ އިދާރި އޮނިގަނޑާއި ވަސީލަތްތައް އެކުލަވާލާ، ލުއި ފަސޭހަކޮށް ރައްޔިތުންނަށް ފޯރު ކޮށްދިނުމަށް ހުށެހެޅޭ ގަރާރެކެވެ.

މި ގަރާރަކީ ރަށު އުފެއްދުންތަކާއި ވިޔަފާރިތައް މިނިވަންކޮށް، ޒަމާނީ ތަރައްގީ ގެނުވައިދިނުމަށް ގޮވާލާ ގަރާރެކެވެ. އަދި މި ގަރާރުގައި ވިޔަފާރިތަކުން ދައުލަތުގެ އިދާރާތަކަށް ބަރާބަރަށް ލިބެން ޖެހޭ ފައިސާ ނުލިބި، އިދާރީ ހުރަސްތަކާއި ވިޔަފާރިތައް ހިންގުމަށް ބޭނުން ކުރާ އިލެކްޓްރޯނިކް ނިޒާމެއް ވިޔަފާރިތަކުގައި ގާއިމުވެފައި ނެތުމުގެ ސަބަބުން ރައްޔިތުންނަށް ބޮޑެތި ގެއްލުންތަކެއް ވަމުން ދާ ކަމަށެވެ. އަދި ބޭންކިންގ ހިދުމަތް ލިބޭ ރަށްތައް މަދުވުމުގެ ސަބަބުންނާއި ފަސޭހަކަމާއެކު ލިބެނެ ގޮތެއްނެތި، ފައިސާނުދެއްކި، ޖޫރިމަނާތައް ގިނަވެ، އިގްތިސާދު ލަސްވެ ރައްޔިތުންނަށާއި ގައުމަށް ނުހަނު ބޮޑެތި ގެއްލުން ވަމުންދާ ކަމަށެވެ.

މީގެއިތުރުން މި ގަރާރުގައި ވަނީ ސަރުކާރުގެ ޓެކްސް އިދާރާތަކުން މޯބައިލްއެޕް، އަދި ވެބްސައިޓް މެދުވެރިކޮށް، ޓެކްސްއާއި އެހެނިހެން ޚިދުމަތްތަކަށް ފައިސާ ދެއްކޭނެ ނިޒާމެއް ގާއިމު ކޮށްފައިވީ ނަމަވެސް، ޓެކްސް ދެއްކުމަށް ބޭނުންވާ އިދާރީ ކަންކަމާއި އެކައުންޓްސް ބެލެހެއްޓޭނެ ހަރުދަނާ ނިޒާމެއް ނުވުމުން ވެސް ރައްޔިތުންނަށް ގެއްލުންވާ ކަމަށެވެ.