ޕްރިމިއަރ ލީގުގައި ކްރިސްޓަލް ޕެލަސް ބަލިކޮށް ޕޮއިންޓް ތާވަލުގެ ދެވަނައަށް ސިޓީ ޖެހިލައިފިއެވެ.

ހޮނިހިރު ދުވަހުގެ ރޭ ކުޅުނު މެޗުން ސިޓީ މޮޅުވީ ކްރިސްޓަލް ޕެލެސްއާ ވާދަކޮށް 0-2 ގެ ނަތީޖާއަކުންނެވެ.

ސިޓީ ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅެމުންދިޔައީ އެޓީމުންނެވެ. އެގޮތުން ޕެލަސްގެ ގޯލަށް ނުރައްކާކޮށް އެޓީމުން ވަނީ ހަމަލާތައް އުފައްދާފައެވެ.

ސިޓީން މެޗުގެ ލީޑު ނެގީ 39 ވަނަ މިނެޓުގައެވެ. މި ލަނޑު ބެނާޑޯ ސިލްވާގެ އެހީތެރިކަމާއެކު ކާމިޔާބުކުރީ ގެބްރިއަލް ޖީސަސްއެވެ. މި ލަނޑަށްފަހުވެސް އެޓީމަށް ވަނީ ލީޑު ފުޅާކުރަން ފުރަތަމަ ހާފްގައި ފުރުސަތުތަކެއް ލިބި ބޭކާރުވެފައެވެ.

ސިޓީން ލީޑު ފުޅާކުރީ 41 ވަނަ މިނެޓުގައެވެ. މި ލަނޑު ރަހީމް ސްޓާލިންގެ އެހީތެރިކަމާއެކު ކާމިޔާބުކުރީ ޑޭވިޑް ސިލްވާއެވެ.

ދެވަނަ ހާފް ފެށިގެންވެސް ސިޓީން ރަނގަޅަށް ކުޅެމުންދިޔައިރު، ލީޑު އިތުރަށް ފުޅާކުރަންވެސް އެޓީމަށް ވަނީ ގިނަ ފުރުސަތުތަކެއް ލިބިފައެވެ. ނަމަވެސް އެ ފުރުސަތުތަކުގެ ބޭނުން އެންމެ ރަނގަޅަށް އެޓީމަށް ނުހިފުނެވެ.

މި ހާފްގައި ޕެލަސްގެ ފަރާތުންވެސް ހަމަލާތަކެއް ފެނުނެވެ. ނަމަވެސް އެ ހަމަލާތަކުގެ ބޭނުން އެޓީމަށްވެސް އެންމެ ރަނގަޅު ގޮތުގައި ހިފިފައެއް ނުވެއެވެ.

މި ނަތީޖާއާއެކު ސިޓީ އޮތީ ކުޅުނު ނުވަ މެޗުން ލިބުނު 19 ޕޮއިންޓާއެކު ޕޮއިންޓް ތާވަލުގެ ދެވަނައިގައެވެ. މެޗުން ބަލިވި ޕެލަސް އޮތީ ކުޅުނު ނުވަ މެޗުން ލިބުނު 17 ޕޮއިންޓާއެކު ޕޮއިންޓް ތާވަލުގެ ތިންވަނައިގައެވެ.