ސްޕެނިޝް ލަލީގާގައި މަޔޯކާ އަތުން ބަލިވެ ރެއާލް މެޑްރިޑުން ޕޮއިންޓް ތާވަލުގެ އެއްވަނައަށް އަރަން ލިބުނު ފުރުސަތު ނަގާލައިފިއެވެ.

ހޮނިހިރު ދުވަހުގެ ރޭ ކުޅުނު މެޗުން ރެއާލް ބަލިވީ މަޔޯކާއާ ވާދަކޮށް 0-1 ގެ ނަތީޖާއަކުންނެވެ.

މަޔޯކާ ދަނޑުގައި ކުޅުނު މި މެޗު ފެށިގެން ހަތްވަނަ މިނެޓުގައި އެޓީމުން ވަނީ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ފެބަސްގެ އެހީތެރިކަމާއެކު ލަގޯއެވެ.

މި ލަނޑާއެކު ރެއާލުން ވަނީ އެޓީމުގެ ކުޅުން ރަނގަޅުކޮށް، މަޔޯކާގެ ހާފަށް ބާރުބޮޑުކޮށް ގިނަ ހަމަލާތަކެއް އުފައްދާފައެވެ. ނަމަވެސް އެ ހަމަލާތަކުގެ ބޭނުން އެންމެ ރަނގަޅަށް އެޓީމަށް ހިފިފައެއް ނުވެއެވެ.

ދެވަނަ ހާފް ފެށިގެންވެސް ރެއާލްގެ ފަރާތުން މޮޅު ކުޅުމެއް ފެނިގެންދިޔައިރު، މި ހާފްގައިވެސް އެޓީމުގެ ފަރާތުން ވަނީ ގިނަ ހަމަލާތަކެއް ފެނިގެން ގޮސްފައެވެ.

ނަމަވެސް މުޅި މެޗުގައިވެސް މޮޅު ޑިފެންސެއް ކުރި މަޔޯކާއިން ވަނީ ބައިކޮޅަށް ލަނޑެއް ވަނެ ނުދިނުމަށް ވަރަށް ބުރަކޮށް މަސައްކަތް ކޮށްފައެވެ. އެގޮތުން ރެއާލްގެ ގިނަ ހަމަލާތަކެއް އެޓީމުން ވަނީ ދިފާއުކޮށްފައެވެ.

މެޗުގެ 74 ވަނަ މިނެޓުގައި ރެއާލްގެ އޮޑްރިޒޯލާ އަށް ރެފްރީ ވަނީ ދެވަނަ ރީނދޫ ކާޑާއެކު ރަތް ކާޑު ދައްކާ ދަނޑުން ފޮނުވާލައިފައެވެ. އެގޮތުން މެޗުގެ ބާކީ 15 މިނެޓެއްހާއިރު، ރެއާލުން ކުޅުނީ 10 ކުޅުންތެރިނާއެކުގައެވެ.

މި ނަތީޖާއާއެކު ރެއާލް އޮތީ ކުޅުނު ނުވަ މެޗުން ލިބުނު 18 ޕޮއިންޓާއެކު ޕޮއިންޓް ތާވަލުގެ ދެވަނައިގައެވެ. މެޗުން މޮޅުވި މަޔޯކާ އޮތީ ކުޅުނު ނުވަ މެޗުން ލިބުނު 10 ޕޮއިންޓާއެކު ޕޮއިންޓް ތާވަލުގެ 15 ވަނައިގައެވެ. އެއްވަނައިގައި އޮތީ ނުވަ މެޗުން 19 ޕޮއިންޓް ހޯދައިގެން ބާސާއެވެ.