ގައުމީ ޓީމުގެ ފަންޑު އެކުލަވައިލައިފި

ގައުމީ ޓީމުގެ ފަންޑު އެކުލަވައިލައިފިކަން ފުޓުބޯޅަ އެސޯސިއޭޝަން އޮފް މޯލްޑިވްސް އެފްއޭއެމްގެ ގައުމީ ޓީމު ކޮމެޓީގެ ޗެއަރމަން އަދި ޓުއަރިޒަމް މިނިސްޓަރ އަލީ ވަހީދު އިއުލާން ކުރައްވައިފިއެވެ.

ގައުމީޓީމުގެ ކޮމެޓީގެ ފަރާތުން ގައުމީޓީމާއި އަދި ފުޓުބޯޅަ އާއިލާއަށް ނިސްބަތްވާ ފަރާތްތަކާއި ބައްދަލުކުރުމަށް ޕެރެޑައިސް އައިލޭންޑް ރިސޯޓުގައި ބޭއްވި ރަސްމިއްޔާތުގައި އަލީ ވަހީދު ވިދާޅުވީ ގައުމީ ޓީމު ކޮމެޓީގެ ފުރަތަމަ ބައްދަލުވުމުގައި ގައުމީ ޓީމުގެ ފަންޑެއް އެކުލަވައިލާން ނިންމާ ހުކުރު ދުވަހުގެ ރެއިން ފެށިގެން ފަންޑް އެކުލަވައިލައިފައިވާ ކަމަށެވެ.

ގައުމީ ޓީމުގެ ޗެއަރމަން އަލީ ވަހީދު ވަނީ ގައުމީ ޓީމަށް ސްޕޮންސަރުން ބޭނުންވާކަން ފާހަގަކުރައްވާ ރާއްޖޭގެ ވިޔަފާރިވެރިން ގައުމީ ޓީމުގެ ފަންޑަށް އެހީތެރިވުމަށް އެދިވަޑައިގެންފައެވެ. އަދި ގައުމީ ޓީމުގެ ފަންޑަށް ވެދެއްވާ އެހީ އަކުން ވިޔަފާރިވެރިން ފަހުން އެކަމާ މާޔޫސްވާކަށް ނުޖެހޭނެ ކަމަށް ޔަޤީންކަން ދެއްވާ އަލީ ވަހީދު ވިދާޅުވީ ވިޔަފާރިވެރިންގެ އިންވެސްޓްމެންޓުގެ ބަދަލު ގައުމީ ޓީމުން ގެނެސްދޭނީ ހިނިތުންވާ ފަދަ ނަތީޖާއަކުން ކަމަށެވެ.

މިހަފުލާގައި މިނިސްޓަރ އަލީ ވަހީދު ވަނީ ގައުމީ ޓީމު ކުޅުންތެރިންގެ ޑިސިޕްލިން ރަނގަޅު ކުރާނެ ކަމަށް ވިދާޅުވެފައެވެ. އެގޮތުން އަލީ ވަހީދު ވިދާޅުވީ ގައުމީ ޓީމުގެ ކުޅުންތެރިންނަށް ސިނގިރޭޓު ބުއިން މަނާ ކުރާނެ ކަމަށެވެ. ކުޅުމަށް ކިތަންމެ މޮޅަސް ސިނގިރޭޓު ފަދަ ޞިއްޙަތައް ގެލުންހުރި އުފެއްދުންތައް ބޭނުންކުރުމުން ކުޅުންތެރިންގެ ކުޅުމަށް އޭގެ ނޭދެވޭ އަސަރުކުރާކަން އެއީ ފެންނަން އޮތް ހަގީގަތެއްކަމަށް އަލީ ވަހީދު ވިދާޅުވިއެވެ.

ގައުމީ ފުޓުބޯޅަ ޓީމުގެ މެނޭޖަރުކަން ކުރިން ކުރެއްވި އަލީ ވަހީދު ވިދާޅުވީ ގައުމީ ޓީމުގެ ކުޅުންތެރިން މެޗަކާއި ކުރިމަތިލާއިރު އެކުރަނީ ހަނގުރާމައެއް ކަމަށާއި މި ކަން ކޮންމެ ކުޅިވަރަކަށް ވެސް އެޕްލައި ވާނެ ކަމަށެވެ.

މި ހަފުލާގައި ވަނީ ގައުމީ ޓީމުގެ ކަންކަން ކުރިޔަށްގެންދާން ރާވާފައިވާ ކަންތައްތައް ތަންފީޒް ކުރާނެ ކުރު ރާސްތާ އަދި ދިގު ރާސްތާ ޕްލޭންތައް ހާމަކުރައްވާފައެވެ.