ފްރެންޗް ލީގުގައި ނައިސް ބަލިކޮށް ޕެރިސް ސެއިންޓް ޖާމަން (ޕީއެސްޖީ) އިން ޕޮއިންޓް ތާވަލުގައި ފަސް ޕޮއިންޓްގެ ލީޑެއް ނަގައިފި އެވެ.

ހުކުރު ދުވަހުގެ ރޭ ކުޅުނު މެޗު ނައިސްއާ ވާދަކޮށް ޕީއެސްޖީން މެޗު ކާމިޔާބުކުރީ 1-4 ގެ ނަތީޖާއަކުންނެވެ.

ނައިސް ދަނޑުގައި ކުޅުނު މި މެޗު ފެށިގެން 15 ވަނަ މިނެޓުގައި ޕީއެސްޖީން ވަނީ ލީޑު ނަގާފައެވެ. މި ލަނޑު މައުރޯ އިކާޑީގެ އެހީތެރިކަމާއެކު ކާމިޔާބުކުރީ އެންހަލް ޑިމަރިއާއެވެ.

މި ލަނޑަށްފަހުވެސް ޕީއެސްޖީން ދިޔައީ ރަނގަޅަށް ކުޅެމުންނެވެ. އެގޮތުން 21 ވަނަ މިނެޓުގައި ޑިމަރިއާ ވަނީ އިތުރު ލަނޑެއް ކާމިޔާބުކޮށް އެޓީމަށް ލީޑު ފުޅާކޮށްދީފައެވެ.

ފުރަތަމަ ހާފް ނިމުމުގެ ކުރިންވެސް ޕީއެސްޖީއަށް ވަނީ ލަނޑު ޖެހުމަށް ފުރުސަތުތަކެއް ލިބިފައެވެ. ނަމަވެސް އެ ފުރުސަތުތަކުގެ ބޭނުން އެޓީމަށް އެންމެ އެދެވޭ ގޮތެއްގައި ހިފިފައެއް ނުވެއެވެ.

ދެވަނަ ހާފް ފެށިގެން ނައިސްއިން އެޓީމުގެ ކުޅުން ރަނގަޅުކޮށްފައިވާއިރު، 67 ވަނަ މިނެޓުގައި ވަނީ ނަތީޖާގެ ފަރަގު ކުޑަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ޑޮލްބާގްއެވެ.

މެޗުގެ 74 ވަނަ މިނެޓުގައި ނައިސްގެ ސައިޕްރިއެންއަށް ދެވަނަ ރީނދޫ ކާޑާއެކު ރަތް ކާޑު ދައްކާފައިވާއިރު، 77 ވަނަ މިނެޓުގައި ހެރެލް އަށްވެސް ވަނީ ރަތް ކާޑު ދައްކާފައެވެ. އެގޮތުން މެޗުގެ ފަހު 15 މިނެޓެއްހާއިރު ނައިސްއިން ކުޅުނީ ނުވަ ކުޅުންތެރިންނާއެކުގައެވެ.

މެޗުގެ 88 ވަނަ މިނެޓުގައި ކީލިއަން އެމްބާޕޭ ޕީއެސްޖީގެ ތިންވަނަ ލަނޑު ކާމިޔާބުކޮށްފައިވާއިރު، އިތުރު ވަގުތުގެ ތެރޭގައި އިކާޑީ ވަނީ އެޓީމުގެ ހަތަރުވަނަ ލަނޑު ކާމިޔާބުކޮށްފައެވެ.

މި ނަތީޖާއާއެކު ޕީއެސްޖީ އޮތީ ކުޅުނު 10 މެޗުން ލިބުނު 24 ޕޮއިންޓާއެކު ޕޮއިންޓް ތާވަލުގެ އެއްވަނައިގައެވެ. ދެވަނައިގައި އޮތީ ނުވަ މެޗުން 19 ޕޮއިންޓް ހޯދައިގެން ނީސްއެވެ. މެޗުން ބަލިވި ނައިސް އޮތީ ކުޅުނު 10 މެޗުން 13 ޕޮއިންޓާއެކު ޕޮއިންޓް ތާވަލުގެ ނުވަ ވަނައިގައެވެ.