ބީއެމްއެލްގެ އައު ހިދުމަތްތަތަކީ ޒަމާނީ ހައްލެއް: ގަވަނަރ ހާޝިމް

ބޭންކް އޮފް މޯލްޑިވްސް (ބީއެމްއެލް) އިން އަލަށް ތައާރަފް ކުރި މޯބައިލް ޕޮއިންޓް އޮފް ސޭލްސް (އެމްޕޮސް) ގެ ހިދުމަތާއި މަރޗަންޓް ޕޯޓަލްގެ ހިދުމަތުން، ޕޮއިންޓް އޮފް ސޭލްސް (ކާޑު މެޝިން) ނެތް ތަންތަނަށް ހައްލެއް ކަމަށް އެމްއެމްއޭގެ ގަވަނަރ އަލީ ހާޝިމް ވިދާޅުވެއްޖެއެވެ.

ބީއެމްއެލްގެ އައު ހިދުމަތް ލޯންޗުކުރަން ކްރޮސްރޯޑްސްގައި ބުރާސްފަތި ދުވަހު ބޭއްވި ހަފްލާއަށް ފަހު ރާއްޖެއެމްވީއާ ވާހަކަފުޅު ދައްކަވަމުން، ހާޝިމް ވިދާޅުވީ މި ހިދުމަތުގެ ސަބަބުން، ކާޑް މެޝިނެއް ނެތަސް، ސްމަރޓް ފޯނުގެ ޒަރިއްޔާއިން ޖެނަރޭޓް ކުރާ ކިޔުއާރް ކޯޑަކުން ވިޔަފާރި ކުރެވޭނެ ކަމަށެވެ. ހާޝިމް އިތުރަށް ވިދާޅުވި ގޮތުގައި މިއީ އެމްއެމްއޭގެ ޕްލޭންތަކުގެ އެއް ބައެވެ.

ހާޝިމް ވިދާޅުވީ، މި ހިދުމަތް ބޭނުންކުރާ ފަރާތްތަކަށް ލިބޭ ހިދުމަތް އަވަސްވާނެ ކަމަށެވެ. މިއީ ކުރިއެރުމެއް ކަމަށް ފާހަގަކުރައްވަމުން، ހާޝިމް ވަނީ ބީއެމްއެލްގެ ހައްލަކީ ޕޮސް ޓަރމިނަލް ނުލިބިގެން އުޅޭ ރަށްތަކަށް އޮތް ހައްލެއް ކަމަށް ވިދާޅުވެފައެވެ.

އަލަށް ތައާރަފް ކުރެވުނު ހިދުމަތްތަކާއި އެކު، ބީއެމްއެލްގެ ޕީއޯއެސް ނެޓްވަރކް މެދުވެރިކޮށް ކާޑާއި ޑިޖިޓަލް ވޮލެޓް ހިމެނޭ ގޮތަށް ހުރިހާ ކޮންޓެކްޓްލެސް ޕޭމަންޓްތައްވެސް ބަލައިގަނެވޭނެއެވެ. ރާއްޖެއަށް ޒިޔާރަތްކުރާ ފަރާތްތަކަށްވެސް އަލީ ޕޭ، ގޫގުލް ޕޭ، އަދި އެޕަލް ޕޭ އިން ފައިސާ ދެއްކުމުގެ ޚިދުމަތް ލިބިގެންދާނެއެވެ.