ތައިލޭންޑުގައި ހުންނަ ރާއްޖޭގެ އެމްބަސީ ރަސްމީކޮށް ހުޅުވައިފި
އެމްބަސީ ރަސްމީކޮށް ހުޅުއްވައިދެއްވީ ފޮރިން މިނިސްޓަރ.
ފޮރިން މިނިސްޓަރ ތައިލޭންޑްގަ ހުންނަ ރާއްޖޭގެ އެމްބަސީ ރަސްމީކޮށް ހުޅުއްވައިދެއްވަނީ
ދިވެހި ރާއްޖެއިން ތައިލޭންޑުގެ ބެންކޮކްގައި ޤާއިމުކޮށްފައިވާ ރައްޖޭގެ އެމްބަސީ ރަސްމީކޮށް ހުޅުވައިފިއެވެ.
މިކަމަށްޓަކައި ބުދަ ދުވަހު ބޭއްވި ޚާއްޞަ ރަސްމިއްޔާތުގައި އެމްބަސީ ރަސްމީކޮށް ހުޅުއްވައިދެއްވީ މިނިސްޓަރ އޮފް ފޮރިން އެފެއަރޒް އަބްދުﷲ ޝާހިދުއެވެ.
ރާއްޖޭގެ އެމްބަސީ ތައިލޭންޑްގައި ރަސްމީ ސިފައެއްގައި ޤާއިމުވުމަކީ ދެޤައުމުގެ ދޭދޭ ވަރުގަދަ ގުޅުން ދައްކުވައިދޭ ނިޝާނެއް ކަމެކެވެ. ފޮރިން މިނިސްޓްރީން ބުނީ ރާއްޖޭގެ ޚާރިޖީ ސިޔާސަތު ޕްރޮމޯޓްކުރުމާއެކު، ތައިލޭންޑްގައި ދިރިއުޅޭ އަދި ތައިލޭންޑަށް އެކި ބޭނުންތަކަށް ދާ ފަރާތްތަކައް އެމްބަސީން ފޯރުކޮށްދޭ ކޮންސިއުލަރ ޚިދްމަތްތައް ފުޅާވެގެންދާނެކަމަށެވެ. އަދި ދެޤައުމުގެ ގުޅުން ބަދަހިވެ ބައިނަލް އަޤްވާމީ މައިދާނުގައި ދެޤައުމު ގުޅިގެން މަސައްކަތްކުރުމަށް ބާރަކަށްވެގެންދާނަކަމަށްވެސް ފޮރިން މިނިސްޓްރީން ބުނެއެވެ.
ފޮރިން މިނިސްޓްރީން ބުނީ ތައިލޭންޑްގައި ރަސްމީ ސިފައެއްގަައި އެމްބަސީއެއް ޤާއިމުކުރެވިގެން މިދިޔައީ ބައިނަލް އަޤުވާނމީ މުޖުތަމަޢާއެކު އޮންނަ ގުޅުން ވަރުގަދަ ކުރުމަށް އަދުގެ ސަރުކާރުން ގެންގުޅުއްވާ ސިޔާސަތު ތަންފީޒުކުރުމަށް ކުރަމުންދާ މަސައްކަތުގެ ތެރެއިންނެވެ.
އެމްބަސީ ހުޅުވުމަށް ބޭއްވި ރަސްމިއްޔާތުގައި އެމްބަސީގެ ރަސްމީ ވެބްސައިޓް ވެސް ވަނީ ލޯންޗްކޮށްފައެވެ.
މި ރަސްމިއްޔާތުގައި މިނިސްޓަރ އޮފް ސްޓޭޓް ފޮރ ފޮރިން އެފެއަރޒް އަޙްމަދު ޚާލީލާއި އެމްބަސީގެ މުވައްޒަފުން ބައިވެރިވިއެވެ.
ރާއްޖޭގެ އެމްބަސީއެއް ތައިލޭންޑުގަ ޤާއިމުކުރީ 2018 ވަނަ އަހަރުއެވެ. ރައީސް އިބްރާހިމް މުހައްމަދު ސާލިހު ވަނީ މިދިޔަ ސެޕްޓެމްބަރު މަހު މ. ތިބްރޯޒް މުހައްމަދު ޖިނާހު އައްޔަން ކުރައްވާފައެވެ.
ރާއްޖެއާއި ތައިލޭންޑާ ދެމެދު 1979 ވަނަ އަހަރު ސިޔާސީ ގުޅުން ޤާއިމުކުރިފަހުން އެކި ދާއިރާތަކުން ގުޅުން ބަދަހިވެފައިވެއެވެ. އޭގެތެރެއިން އެންމެ ފާހަގަކުރެވޭ އެއްކަމަކީ ވިޔަފާރިއާއި ފަތުރުވެރިކަމުގެ ދާއިރާގެ ގުޅުންތަކެވެ. އެންމެ ފަހުގެ ޚަބަރުތަކަށް ބަލާއިރު މިއަހަރުގެ އެޕްރީލް މަހުން ފެށިގެން ދިވެހިންނަށް އޮންއެރައިވަލް ވިސާ ލިބޭނެގޮތް ތައިލޭންޑް ސަރުކާރުން އިންތިޒާމުކުރި ޚަބަރު ފާހަގަކޮށްލެވެއެވެ.
މި ވިސާގެ ދަށުން ފަތުރުވެރިކަމުގެ ބޭނުމަށް 30 ދުވަހުގެ މުއްދަތަކަށް ތައިލެންޑްގައި ތިބެވޭނެއެވެ.
