މިމަހުގެ 20 ވަނަ ދުވަހުގެ ނިޔަލަށް ރާއްޖޭގެ ހުރިހައި އަތޮޅެއް ވިނަވި ޕޯޓަލްއާ ގުޅާލެވޭނެ: އާސަންދަ
16 އޮކްޓޯބަރު 2019 | ބުދަ 04:28ވިނަވި ޕޯޓަލްގެ ސަބަބުން ހިދުމަތް އަވަސް ވެގެންދާނެ
އިބްރާހީމް ރަޝީދު
މިމަހުގެ 20 ވަނަ ދުވަހު ނިޔަލަށް ރާއްޖޭގެ ހުރިހައި އަތޮޅެއް ވިނަވި ޕޯޓަލްއާ ގުޅާ ނިންމާލެވޭނެކަމަށް އާސަންދައިގެ އެސިސްޓެންޓް މެނޭޖިން ޑިރެކްޓަރ އިބްރާހީމް ރަޝީދު ވިދާޅުވެއްޖެއެވެ.
ރާއްޖެ ޓީވީގެ ފަލަ ސުރުހީ ޕްރޮގްރާމުގައި ވާހަކަ ދައްކަމުން އިބްރާހީމް ރަޝީދު ވިދާޅުވީ ވިނަވި ޕޯޓަލްގެ ޒަރިއްޔާއިން މުޅި ރާއްޖެ ގުޅުވައިލުމަށް ކުރަމުންދާ މަސައްކަތް ވަރަށް ބާރަށް ކުރިޔަށްދާ ކަމަށާއި، އެންމެ ފަހު އަތޮޅު ކަމަށްވާ ލ. އަތޮޅުގެ މަސައްކަތް އޮކްޓޯބަރ 20 ވަނަ ދުވަހަށް ނިންމައިލެވޭނެ ކަމަށެވެ.
އިބްރާހީމް ރަޝީދު އިތުރަށް ވިދާޅުވީ މާލޭގެ އައިޖީއެމްއެޗް އާއި އޭޑީކޭ އަދި ހުޅުމާލެ ހޮސްޕިޓަލް ފިޔަވާ ދެންހުރި ހުރިހާ ހޮސްޕިޓަލްތަކާއި ކްލިނިކްތައް މި ޕޯޓަލް އަށް ވަދެވިފައި ކަމަށެވެ. އަދި އައިޖީއެމްއެޗާއި ހުޅުމާލެ ހޮސްޕިޓަލާއި އޭޑީކޭ އިން މި ޕޯޓަލްއަށް ވަރަށް އަވަހަށް ގުޅާލެވޭނެކަމަށެވެ.
ސަރުކާރުގެ ސިޔާސަތަކީ ޞިއްޙި ޚިދުމަތްދޭ ހުރިހައި ތަނެއް އެއްވިއުގައަކުން ގުޅާލުމެވެ. އެގޮތުން "ވިނަވި" އަކީ "ހުސްނުވާ އާސަންދ ސްކީމްގެ ދަށުން ދޭ ޚިދްމަތްތަކުގެ ފެންވަރު ރަނގަޅުކޮށް ޚިދްމަތް ލިބިގަތުމުގައި ލުއި ފަސޭހަތަކެއް ޤާއިމުކޮށްދިނުމުގެ ބޭނުމުގައި ފަރުމާކުރެވިފައިވާ ޕޯޓަލްއެއް ކަމަށް އާސަންދަ ކުންފުނިން ބުނެއެވެ.
މި ޕޯޓަލްގައި ބަލިމީހާ ޑޮކްޓަރަށް ދައްކަން މެމޯ ހައްދާ ހިސާބުން ފެށިގެން ބަލިމީހާގެ ފަރުވާ ނިމެންދެން މަޢުލޫމާތު ރައްކާކުރެވިފައި ހުންނާނެކަމަށްވެސް އާސަންދަ ކުންފުނިން ބުނެއެވެ.
