ޓްރެފިކް މައްސަލައަށް އޮތް ހަމައެކަނި ހައްލަކީ އެތެރެކުރެވޭ ވެހިކަލް ލިމިޓްކުރުން: ޓްރާންސްޕޯޓް މިނިސްޓްރީ

މާލެއަށް ދިމާވެގެން އުޅޭ ޓްރެފިކް ފްލޯގެ މައްސަލައަށް އޮތް ހަމައެކަނި ހައްލަކީ، ރާއްޖެއަށް އެތެރެކުރެވޭ އެއްގަމު އުޅަނދުފަހަރުގެ އަދަދު މަދުކުރުން ކަމަށް މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަންގެ ޑެޕިއުޓީ މިނިސްޓަރ ޝިމާޒް އަލީ ވިދާޅުވެއްޖެއެވެ.

ހޯމަ ދުވަހު އޮތް ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީގައި ވާހަކަފުޅު ދައްކަވަމުން ޝިމާޒް ވިދާޅުވީ، މިކަން ކުރުމަށް ވިސްނުމަށް ފަހު މަޝްވަރާތައް ކުރެވެމުންދާ ކަމަށެވެ. ޝިމާޒް މިހެން ވިދާޅުވީ މާލޭގެ ގަރާޖުތަކުގައި ރަޖިސްޓްރީ ކުރާ ހަތަރު ފުރޮޅުލީ އުޅަނދުތަކާއި ގުޅޭގޮތުން ދިއްގަރު ދާއިރާގެ މެމްބަރު އިކްރާމް ހަސަން އެއްސެވި ސުވާލަށް ޖަވާބު ދެއްވަމުންނެވެ.

މި މައްސަލައާއި ގުޅޭގޮތުން ޝިމާޒް ވިދާޅުވީ، ބައެއް ފަހަރު ސިޓީ ކައުންސިލުން ގަރާޖު ހުއްދަ ދޫކުރާ ތަންތަނަށް ވެހިކަލްތައް ރަޖިސްޓްރީ ކުރާތާ ދުވަސްތަކެއް ފަހުން އެތަންތަނުގައި ވިޔަފާރިއެއް ހިންގުމުގެ ހުއްދާ ދޫކޮށްފައިވާކަން ފާހަގަކުރެވިފައިވާ ކަމަށެވެ.

ޝިމާޒް ވިދާޅުވީ، މިކަން މިހެންވުން ހުއްޓުވުމަށް، މައްސޫލުވެރި ވުޒާރާތަކާއި ސިޓީ ކައުންސިލް ގުޅިގެން އޮންލައިން ވިއުގައެއް ގާއިމްކުރުމުގެ މަޝްވަރާތައް ކުރެވެމުންދާ ކަމަށެވެ. އަދި މި ވިއުގަ ގާއިމް ކުރެވުމުން އެއްތަނަކަށް ދެ ހުއްދައެއް ދޫކުރުމުގެ މައްސަލައަށް ހައްލެއް ލިބިގެން ދާނެ ކަމަށް ޝިމާޒް ވިދާޅުވިއެވެ.

މާލޭގައި ގަރާޖުގެ ގޮތުގައި ރަޖިސްޓްރީ ކުރެވިފައި ހުރި ބައެއް ތަންތަނުގައި 120އާ ގާތްކުރާ އަދަދަކަށް ވެހިކަލް ރަޖިސްޓްރީ ކުރެވިފައިވާ ކަމަށް ޓްރާންސްޕޯޓް މިނިސްޓްރީން ވަނީ ހާމަކޮށްފައެވެ. އަދި މިކަހަލަ ތަންތަނުގައި ރަޖިސްޓްރީ ކޮށްފައި ހުރި ވެހިކަލްތަކުގެ ހުއްދަ ބާތިލް ކުރުމަކީ ރައްޔިތުންގެ މަސްލަހަތާ ގުޅިފައިވާ މައްސަލައަކަށް ވުމުން މިހެން މިކަން ނުކޮށް، އެހެން ހައްލުތަކެއް ހޯދައިދިނުމުގެ މަސައްކަތް ކުރަމުން އަންނަ ކަމަށް އެ މިނިސްޓްރީއިން ވަނީ ބުނެފައެވެ.

މިހާރު މާލޭގައި ގަރާޖުގެ ގޮތުގައި ރަޖިސްޓްރީ ކޮށްފައި ހުންނަ ތަންތަނަށް ހުއްދަ ދިނުމުގެ މަސައްކަތް ކުރަމުން އަންނަނީ މާލޭ ސިޓީ ކައުންސިލުން ނަމަވެސް، ކުރިން އެކަން ކޮށްފައި ވަނީ ސީދާ ޓްރާންސްޕޯޓް މިނިސްޓްރީގެ ބެލުމުގެ ދަށުންނެވެ.