ކައުންސިލްތަަކުގެ ދައުރު 5 އަހަރަށް އިތުރުކޮށް، ރައީސް އާއި ނައިބު ރައީސް ރައްޔިތުންގެ ވޯޓުން ހޮވަނީ
އިސްލާހު ހުށަހަޅާފައިވަނީ ބުރާސްފަތި ދުވަހުގެ މެންދުރުގެ ވަގުތެއްގައި
ތޮއްޑޫ ކައުންސިލްގެ މެމްބަރުންނާއެކު ރައީސް ސޯލިހް ބޭއްވެވި ބައްދަލުކުރެއްވުން
ކައުންސިލްތަކުގެ ދައުރު 5 އަހަރަ ދިގުކޮށް، ރައީސާއި ނައިބު ރައީސް ރައްޔިތުންގެ ވޯޓުން އިންތިހާބުކުރާގޮތަށް ގާނޫނަށް އިސްލާހު ގެނައުމަށް ނިންމައި، ބިލް ރައީސް އޮފީހަށް ހުށަހަޅައިފި އެވެ.
އެޓަރނީ ޖެނެރަލްގެ އޮފީހުން ބުރާސްފަތި ދުވަހު ނެރެފައިވާ ބަޔާނެއްގައި ބުނެފައިވަނީ، ލާމަރުކަޒީ އުސޫލުން ދިވެހިރާއްޖޭގެ އިދާރީ ދާއިރާތައް ހިންގުމުގެ ނިޒާމު ހަރުދަނާކޮށް، ލޯކަލް ކައުންސިލްތައް ބާރުވެރިކުރުވުމަށްޓަކައި ދިވެހި ޖުމްހޫރިއްޔާގެ ގާނޫނު އަސާސީއަށާއި، ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް އިސްލާހު ގެނައުމަށް ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅުމަށް އެކުަލަވާލައިފައިވާ ދެ ބިލެެއް ރައީސް އޮފީހަށް ފޮނުވާފައިވާކަމަށެވެ.
އެޓަރނީ ޖެނެރަލްގެ އޮފީހުން ބުނެފައިވަނީ ގާނޫނު އަސާސީއާއި އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނު އިސްލާހުކުރުމުގެ ބޭނުމަކީ، ލޯކަލް ކައުންސިލްތަކަށް ގާނޫނުން ލިބިދީފައިވާ ބާރުތަކުގެ ތެރެއިން ވޭތުވެދިޔަ މުއްދަތުގައި އެ ކައުންސިލްތަކުގެ ކިބައިން ވަކިކުރެވިފައިވާ ބާރުތަކާއި ޒިންމާތައް އަލުން އިއާދަކަށް ދިނުމާއިއެކު ރައްޔިތުންގެ މަންދޫބުންގެ ބައިވެރިވުމާއިއެކު ކައުންސިލްތަކުގެ ކަންކަން ހިންގޭނެ މަގު ފަހިކޮށްދިނުމެވެ. އަދި ކައުންސިލްތަކުގެ ހިންގުން މިހާރަށްވުރެން ހަރުދަނާކޮށް، ރައްޔިތުންނަށް ބޭނުންވާ ހިދުމަތްތައް، ރައްޔިތުންނާއި ވީހާވެސް ގާތުން ފޯރުކޮށްދިނުމުގެ އިންތިޒާމްތައް ހަމަޖެއްސުން ކަމަށެވެ.
