ރާއްޖޭގެ ފުޓުބޯޅަ ޝެޑިއުލްއެކޭ އޮއެ ގަދަ ދުވަހެއްގައި މޫދުގައި އަޅާފައި އޮންނަ ބޮޔެކޭ އެއްފަދަ: ސުޒެއިން

ރާއްޖޭގެ ފުޓުބޯޅަ ޝެޑިއުލްއެކޭ އޮއެ ގަދަ ދުވަހެއްގައި މޫދުގައި އަޅާފައި އޮންނަ ބޮޔެކޭ އެއްގޮތް ކަމަށް ގްރީން ސްޓްރީޓްގެ ކޯޗު އަލީ ސުޒެއިން ބުނެފިއެވެ.

ރާއްޖެޓީވީގެ ކުޅިވަރު ފައިލް ޕްރޮގްރާމުގައި ވާހަކަ ދައްކަމުން ސުޒެއިން ބުނީ، ރާއްޖޭގެ ފުޓުބޯޅަ ޝެޑިއުލް އޮންނަނީ އޭރަކު އޮއެ ހުރި ކޮޅަކަށް ދަމަ ދަމާ ކަމަށާއި، އެ ޝެޑިއުލްއާ އެއްގޮތަށް ޓީމުތަކަށް ތައްޔާރުވާން ފުރުސަތުވެސް ނުލިބޭ ކަމަށެވެ.

ހަ މަސް ދުވަހަށް ސީޒަން ލަސްކުރިޔަސް، ނެރޭ ޝެޑިއުލްއާ އެއްގޮތަށް ކަންކަން ނުދާނެ ކަމަށް މީގެކުރިން ރާއްޖެ ޓީވީގެ ޕްރޮގްރާމެއްގައި ބުނެފައިވާނެ ކަމަށް ފާހަގަކުރަމުން ސުޒެއިން ބުނީ، ޝެޑިއުލްއާ އެއްގޮތަށް ކަންކަން ނުދާ ކަމަށާއި، ސީޒަނުގައި ބޮޑެތި ބްރޭކްތަކެއްވެސް އަންނަ ކަމަށެވެ.

އެގޮތުން ސުޒެއިން ބުނީ، އެންމެ ފަހުން ޓީސީ ސްޕޯޓްސް ކްލަބް ކުޅުނު މެޗަށްފަހު، ދެން އެންމެ އަވަހަށް އެޓީމު މެޗެއް ކުޅުމަށް ހަމަޖެހިފައިވަނީ އަންނަ ޑިސެމްބަރ މަހުގެ 13 ވަނަ ދުވަހު ކަމަށާއި، ޝެޑިއުލް ދަނީ އެކި ގޮތްގޮތަށް އެނބުރެމުން ބަދަލުވަމުން ކަމަށެވެ.

އެހެން އަހަރުތަކާ ހިލާފަށް މި އަހަރުގެ ފުޓުބޯޅަ ސީޒަން ޖޫން މަހު ފަށާފައިވާއިރު، އެފްއޭއެމްއިން ނެރުނު ޝެޑިއުލްއާ އެއްގޮތަށް ލީގުގެ ކުޅުން ކުރިޔަކަށް ނުދެއެވެ. އަދި ލީގުގައި ގިނަ ބްރޭކްތައް އައުމުން ކްލަބްތަކުގެ ކޯޗުން އަންނަނީ އެކަމަށް ވަރަށް ބޮޑަށް ފާޑު ކިޔަމުންނެވެ.