ދިވެހި ފިލްމު އެވޯޑް ނޮވެމްބަރު މަހު ބާއްވާނީ
ބައިވެރި ކުރުމަށް ހަމަޖެހިފައިވަނީ 2017 އަދި 2018 ފިލްމުތައް
2017 ވަނަ އަހަރު އެންމެ ގިނަ އެވޯޑް ހޯދީ ޑާކްރެއިން އެންޓަޓައިންމެންޓުން
ދިވެހި ފިލްމީ އުފެއްދުންތަކަށާއި ފިލްމީ ދާއިރާގައި މަސައްކަތްކުރާ ފަންނުވެރިންނަށް ހިތްވަރުދީ އަގުވަޒަންކޮށް، އެކުވެރި ވާދަވެރި މާހައުލެއްގައި ފަންނުވެރިކަން ތަރައްގީކޮށް ދެމެހެއްޓުމުގެ މަގްސަދުގައި، ގައުމީ ފެންވަރެއްގައި ދެމުން އަންނަ "ދިވެހި ފިލްމު އެވޯޑްސް" މިއަހަރުގެ ނޮވެމްބަރު މަހު ބާއްވާ ގޮތަށް ހަމަޖެހިއްޖެއެވެ.
ނޭޝަނަލް ސެންޓަރ ފޮރ ދި އާޓްސް ( އެންސީއޭ) އިން އަންގާރަ ދުވަހު ކޮށްފައިވާ އިއުލާނުގައި ބުނީ، އެ އެވޯޑްގައި ބައިވެރި ކުރުމަށް ހަމަޖެހިފައިވަނީ 2017 އަދި 2018 ވަނަ އަހަރު ރިލީޒްކޮށްފައިވާ ފިލްމުތަކެވެ.
ފިލްމު އެވޯޑްސް ގައި ފިލްމު ބައިވެރިކުރުމުގެ އެންމެ ފަހު ތާރީޚަކީ 10 އޮކްޓޯބަރު ވާ ބުރާސްފަތި ދުވަހެވެ.
އެންސީއޭ އިން ބުނީ، އެވޯޑުގެ އުސޫލް އަދި ބައިވެރިވުމަށް އެދޭ ފޯމްއެން.ސީ.އޭގެކައުންޓަރުންނާއި ވެބްސައިޓް އިން ލިބެނެ ކަމަށެވެ. ދިވެހި ފިލްމު އެވޯޑް ބާއްވަނީ އެއް އަހަރުގެ މެދުކެނޑުމަށް ފަހުއެވެ.
2017 ވަނަ އަހަރު ބޭއްވި ފިލްމުއެވޯޑު ތަކުގެ ތެރެއިން އެންމެ ގިނަ އެވޯޑް ލިބިފައިވަނީ ޑާކް ރެއިން އެންޓަޓެއިންމަންޓަށެވެ. އެ ޕްރޮޑަކްޝަނަށް 22 އެވޯޑެއް ލިބިފައިވާއިރު އެންމެ މޮޅު ފިލްމަކަށް ހޮވިފައިވަނީ ޑާކްރެއިންގެ "ފިލްމު ވަށޭ މަށާ އެކީ" އެވެ.
