ޓުއަރިޒަމް ދުވަހާއި ގުޅުވައިގެން ހަތަރު ބޯޅަ ޖަގްލްކުރަމުން 10 ކިލޯމީޓަރަށް ދުވުމުގެ ރެކޯޑާއި، ތިން ބޯޅަ އުކަމުން ސިޑިން އެރުމުގެ ރިކޯޑް ހެދުމަށް ނިންމައިފިއެވެ.

މި ދެ ރެކޯޑަކީ އެމްއެމްޕީއާރުސީ އާއި ޓީއެފްޖީ އަދި ކެނަޑާގެ ދުވުންތެރިއެއް ކަމަށްވާ މިކަލް ކެޕްރެލްއާ ގުޅިގެން ކުރިއަށް ގެންދިއުމަށް ހަމަޖެހިފައިވާ އިވެންޓެކެވެ.

މި ރިކޯޑް ހެދުމާ ބެހޭ ގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި އެމްއެމްޕީއާރުސީގެ މެނޭޖިންގ ޑިރެކްޓަރ ތޮއްޔިބް މުހައްމަދު ވިދާޅުވީ، މި އިވެންޓްގެ ސަބަބުން ރާއްޖެ ވަރަށް ބޮޑަށް އިޝްތިހާރުވެ، ރާއްޖެ އަންނަ ފަތުރުވެރިން އިތުރުވާނެ ކަމަށެވެ. އަދި މިފަދަ އިވެންޓުތަކަކީ ދުނިޔޭގައި މިހާރު ވެސް ވަރަށް މަޝްހޫރުކަން ހޯދާ އިވެންޓްތައްކަން އޭނާ ފާހަގަކުރެއްވިއެވެ.

މި ނޫސްވެރިންގެ ބައްދަލުވުމުގައި ބައިވެރިވެވަޑައިގެން ޔޫތް މިނިސްޓަރު އަހުމަދު މަހްލޫފް ވިދާޅުވީ ސްޕޯޓްސް ޓުއަރިޒަމް ރާއްޖޭގައި ކުރިއެރުވުމަށް ގިނަ މަސައްކަތްތައް ކުރާ ކަމަށެވެ. އަދި ރާއްޖެއަކީ މެރަތަން ދުވެލުމަށް އަންނަ މަންޒިލެއްގެ ގޮތުގައި ދުނިޔޭގެ މާކެޓުގައި އިޝްތިހާރު ކުރުމަށް ވެސް މަސައްކަތްކުރާ ކަމަށެވެ.

ހަތަރު ބޯޅަ ޖަގްލްކުރަމުން 10 ކިލޯމީޓަރަށް ދުވުމުގެ ރެކޯޑުގައި ދުވުންތެރިޔާ ކެޕްރަލް ހަތަރު ބޯޅަ އުކަމުން ދުވާނީ އެ ދުވަހު އައްޑޫގައި އޮންނަ ޓީއެފްޖީ އައްޑޫ ރަންގެ ދުވުންތެރިންނާއެކުއެވެ. ތިން ބޯޅަ އުކަމުން ސިޑިން އެރުމުގެ ރެކޯޑް ހެދުމަށް ނިންމާފައި ވަނީ މާލޭ ސަލްޓަން ޕާކުގައެވެ. މި ރެކޯޑް ވެސް ކެޕްރަލް ހަދާ އިރު އޭނާ އެ ރެކޯޑް ހަދާނީ ހުއްޓާ ނުލައި ސަލްޓަން ޕާކުގައި އޮންނަ ސިޑި މަތީ ބޯޅަ އުކަމުން ސިޑިން އަރައި ފައިބަމުންނެވެ.