މުވައްޒަފުންގެ ސާރވިސް ޗާރޖުގެ އިތުރުން ސަލާމަތީ ކަންކަމާއި ގުޅޭ އިންސްޕެކްޝަން ނިމިއްޖެ
25 ސެޕްޓެމްބަރު 2019 | ބުދަ 08:10މިއޮފަރޭޝަން ހިންގުނީ ދިވެހި ރާއްޖޭގެ ދިފާއީ ބާރާއި ފުލުހުންނާއި ގުޅިގެން
ޓުއަރިޒްމް މިނިސްޓަރ އަލީ ވަހީދު
ފަތުރުވެރިންނަށް ޚިދުމަތްދޭ ތަންތަނާއި މުވައްޒަފުންގެ ސާރވިސް ޗާރޖުގެ އިތުރުން ސަލާމަތީ ކަންކަމާއި ގުޅޭ އިންސްޕެކްޝަން ނިމިއްޖެ ކަމަށް ޓުއަރިޒްމް މިނިސްޓަރ އަލީ ވަހީދު ވިދާޅުވެެއްޖެއެވެ.
އަލީ ވަހީދު މިހެން ވިދާޅުވީ ބުދަ ދުވަހު މިނިސްޓްރީއިން ބޭއްވި ނޫސްވެރިންގެ ބައްދަލުވުމުގައި ނޫސްވެރިންނަށް މައުލޫމާތުދެއްވަމުންނެވެ.
މި އިންސްޕެކްޝަންއާއި ގުޅިގެން މައުލޫމާތު ދެއްވަމުން މިނިސްޓަރ ވިދާޅުވީ މިއޮފަރޭޝަން ހިންގާފައިވަނީ ދިވެހި ރާއްޖޭގެ ދިފާއީ ބާރާއި ފުލުހުންނާއި ގުޅިގެން ކަމަށެވެ. މި އިންސްޕެކްޝަންގެ ތެރެއިން ރާއްޖޭގެ 20 އަތޮޅެއްގައި ހުންނަ މުޅި ޖުމްލަ 1061 ފަތުރުވެރިންނަށް ޚިދުމަތްދޭ ތަންތަން ބަލާފާސްކޮށްފައިވާނެ ކަމަށް ވެސް އަލީ ވަހީދު ވިދާޅުވިއެވެ. މީގެ ތެރޭގައި މީހުން ދިރިއުޅޭ 81 ރަށެއްގައި ހިންގާ ފަތުރުވެރިންނަށް ޚިދުމަތްދޭ ތަންތަނާއި، 143 ރިޒޯޓާއި 3 ޔޮޓު މެރީނާއާއި 10 ޓޫރިސްޓު ހޮޓެލް އަދި 535 ޓުއަރިސްޓު ގެސްޓު ހައުސްގެ އިތުރުން 194 ޑައިވް ސެންޓަރު ބަލާފައިވާނެ ކަމަށް މިނިސްޓަރ ވިދާޅުވިއެވެ.
އިންސްޕެކްޝަން ތަކުގައި ބަލާފައިވާ ކަންކަމަށް އަލިއަޅުވާލަމުން މިނިސްޓަރ ވިދާޅުވީ، ބަލާފައިވާނެ ކަންކަމަކީ ހިނގާފާނެ އަލިފާނުގެ ހާދިސާ ތަކުން ރައްކާތެރިވުމަށް އެޅިފައިވާ ސަލާމަތީ ފިޔަވަޅުތަކާއި ފަތުރުވެރިންގެ ސަލާމަތާއި ރައްކާތެރިކަމުގެ ގޮތުން އެޅިފައިވާ ފިޔަވަޅުތައް ހިމެނޭ ކަމަށެވެ. އަދި މީގެ އިތުރުން މުވައްޒަފުންނަށް ލިބެން ހުރި ޚިދުމަތްތަކާއި ވަޒީފާއާއި ބެހޭ ގާނޫނޫގެ ދަށުން މުވައްޒަފުންނަށް ލިބިދެވޭ ހައްގުތަކާއި ސާރވިސް ޗާރޖުގެ އިތުރުން ދިވެހި މުވައްޒަފުން ވަޒީފާގައި ތިބި މިންވަރުވެސް ބަލާފައިވާނެ ކަމަށެވެ.
މިނިސްޓަރ ވިދާޅުވީ އޮޕަރޭޝަން ހިންގުނީ ކަންކަން ރަނގަޅު ކުރުމުގެ ނިޔަތުގައި ކަމަށެވެ. އަދި ސިޔާސަތުގެ ގޮތުގައި ގެންނަން ހުރި ބަދަލުތަކާއި، ސަރުކާރުގެ ފަރާތުން ބަދަލު ގެންނާނެ ކަމަށް ވެސް މިނިސްޓަރ ވިދާޅުވިއެވެ.
މި އެއްކުރެވުނު ތަފާސްހިސާބުތަކަކީ ކުރިން ނެތް އެއްޗެއްކަން ފާހަގަކުރައްވަމުން މިނިސްޓަރ ވިދާޅުވީ މިއީ ވަރަށް ބޮޑު ކާމިޔާބީއެެއް ކަމަށެވެ. އަދި ކޮންމެ އަހަރަކު މީގެ ފަހުން ގާވައިދުން އިންސްޕެކްޝަން ކުރިއަށް ގެންދާނެ ކަމަށެވެ.
މިއަހަރުގެ ޑިސެމްބަރު 31ގެ ކުރިން ސަރުކާރުން މި ކޮންމެ ޚިދުމަތް ދޭ ތަނަކުން ފާހަގކުރެވިފައިވާ ކަންކަމާއި ރަނގަޅު ކުރަންވި ކަންކަން އަންގާ އިސްލާހު ކުރަން ވަގުތުވެެސް ދޭނެ ކަމަށް ވިދާޅުވިއެވެ. އިސްލާހު ކުރުމަށް ވަގުތު ދިނުމަށްފަހު، ދެވަނަ ފަހަރަށް ބަލާ ފާސްކުރާނެ ކަމަށް ވެސް ވިދާޅުވިއެވެ. އަންނަ އަހަރު އިންސްޕެކްޝަން ފަށާނީ މޭ މަހުގެ 1 ވަނަ ދުވަސް، މޭޑޭގެ ފަހުން ކަމަށެވެ.
ކޮންމެ އަހަރަކު އިސްޕެކްޝަން ސްޓިކާއެއް އެރުވުމުގެ ވިސްނުންފުޅު ގެންގުޅުއްވާ ކަމަށްވެސް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މިކަމުގެ ޚުލާސާ ރިޕޯޓެއް ރައީސް ސޯލިހަށް އަރުވާނެ ކަމަށެވެ. މި އިންސްޕެކްޝަން ކުރިއަށް ގެންގޮސްފައިވަނީ ފެބްރުއަރީ މަހުގެ 7 ވަނަ ދުވަހުން ސެޕްޓެމްބަރު މަހުގެ 20 ވަނަ ދުވަހުގެެ ނިޔަލަށެވެ.
