އަލިފާނުގެ ހާދިސާއާ ގުޅުން ނެތް 57 ބިދޭސީއަކު ބޯހިޔާވަހިކަމަށް އެދި އައިސްފައިވޭ: ޑިޒާސްޓަރ
ދިވެހިންގެ އިތުރުން ބިދޭސީންނަށް ވެސް އެހީތެރިކަން ފޯރުކޮށްދީފައިވޭ
ކެމިކަލް ގުދަނުގެ އަލިފާނުގެ ހާދިސާ
ހުކުުރު ދުވަހުގެރޭ މާލޭ ކެމިކަލް ގުދަން ތަކެއްގައި ހިނގާދިޔަ އަލިފާނުގެ ހާދިސާއާއި ގުޅުން ނެތް 57 ބިދޭސީއަކު އެހީއަށް އެދި ހުށައަޅާފައިވާ ކަަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.
އާދިއްތަ ދުވަހު ރައީސް އޮފީހުގައި ބޭއްވި ޖޮއިންޓް ނޫސްވެރިންގެ ބައްދަލުވުމެއްގައި އެންޑީއެމްއޭގެ ޗީފް އެގްޒެކެޓިވް ހިސާން ހަސަން ވިދާޅުވީ، ދިވެހިންގެ އިތުރުން ބިދޭސީންނަށް ވެސް އެހީތެރިކަން ފޯރުކޮށްދީފައިވާކަމަށެވެ. އަދި އަލިފާނުގެ ހާދިސާއާ އެއްގޮތަކަށްވެސް ގުޅުން ނެތް 57 ބިދޭސީއަކުވެސް އެހީއަށް އެދި ހުށައަޅާފައިވާ ކަމަށް އޭނާ ވިދާޅުވި އެވެ. އެގޮތުން އެ ފަރާތްތައް ޔޫތު މިނިސްޓްރީގެ އެކަމަޑޭޝަނެއްގައި ބައިތިއްބަމުން ގެންދިޔަ ނަމަވެސް މިހާރު އެ ފަރާތްތައް އިމިގްރޭޝަނާއި ހަވާލުކޮށްފައިވާ ކަމަށް ހިސާން ވިދާޅުވިއެވެ.
ހިސާން އިތުރަށް ވިދާޅުވީ، ހާލުގައި ޖެހުނު ފަރާތްތަކަށް އެހީތެރިކަން ފޯރުކޮށްދިނުމުގެ މަސައްކަތް ކުރަމުންދާ ކަމަށާއި، އެގޮތުން މިހާރުވެސް 7 ދުވަހަށް ދަރުބާރުގޭ ދޮށިމޭނާ މާލަން ހިފައި، ރިލީފް އައިޓަމްސް ބެހުމުގެ މަސައްކަތް ކުރަމުންދާކަމަށް ހިސާން ވިދާޅުވިއެވެ.
އަލިފާނުގެ ހާދިސާއާ ގުޅިގެން 247 ފަރާތަކަށް ވަގުތީ ބޯހިޔާވަހިކަން ހަމަޖައްސަވާފައިވާއިރު، އެ ފަރާތްތަކަށް ބޭނުންވާ ޒަރޫރީ ބޭނުންތައް ފޯރުކޮށްދިނުމުގެ މަސައްކަތްވެސް އެންޑީއެމްއޭއިން ދަނީ ކުރަމުންނެވެ.
