ލަސްވަމުންދާ މަޝްރޫއުތައް އަވަސް ކުރުމާއި ގުޅޭގޮތުން ޗައިނާއާއިއެކު މަޝްވަރާކޮށްފި
22 ސެޕްޓެމްބަރު 2019 | އާދީއްތަ 13:16މަޝްރޫއުތައް ހިންގަމުންދާ ބައެއް ކުންފުނިތަކާއި އެކުވެސް ބައްދަލުކޮށްފައިވޭ
ޗައިނާއާއިއެކު ބޭއްވި މަޝްވަރާ ބައްދަލުވުންތަކުގެ ތެރެއިން
ލަސްވަމުންދާ މަޝްރޫއުތައް އަވަސް ކުރުމާއި ގުޅިގެން ޗައިނާއާއިއެކު ފޮރިން މިނިސްޓަރ އަބްދުﷲ ޝާހިދު މަޝްވަރާކުރައްވައިފި އެވެ.
ޗައިނާއަށް ކުރެއްވި ދަތުރުފުޅުގެ މައުލޫމާތުތައް ހާމަކުރައްވަމުން މިނިސްޓަރ ޝާހިދު ވިދާޅުވީ ޗައިނާއަށް ކުރެއްވި ދަތުރުފުޅުގައި ރާއްޖޭގައި ތަރައްގީގެ އެކިއެކި މަޝްރޫއުތައް ހިންގަމުންދާ ބައެއް ކުންފުނިތަކާއި އެކުވެސް ބައްދަލުކުރެއްވިކަމަށެވެ. އަދި ޗައިނާގެ ނައިބު ރައީސް އާއި ޗައިނާގެ ޚާރިޖީ ވަޒީރާއެކު ވެސް ބައްދަލުކުރެވުނު ކަމަށާއި މި ބައްދަލުކުރެއްވުމުގައި ރަސްމީ ވާހަތަކެއް ދެކެވިގެން ދިޔަ ކަމަށް ވެސް މިނިސްޓަރ ވިދާޅުވިއެވެ.
ޗަައިނާގެ ޚާޜިޖީ ވަޒީރާއިއެކު ބޭއްވުނު ބައްދަލުވުމުގައި ރާއްޖެއާއި ޗައިނާއާ ދެމެދު އޮތް ގުޅުމަކީ ދެ ޤައުމުގެ ރައްޔިތުންގެ މެދުގައި އޮތް ގުޅުމެއް ކަމަށާއި ކޮންމެ ސަރުކާރެއް އޮތް ނަމަވެސް ރާއްޖޭގެ ތަރައްޤީއަށްކުރާ މަސައްކަތްތަކަށް ޗައިނާގެ އެހީ ލިބޭނެކަމުގެ ޔަގީންކަން ޗައިނާގެ ޚާރިޖީ ވަޒީރު އަރުއްވާފައިވާ ކަމަށްވެސް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ޚާރިޖީ ވަޒީރު މެދުވެރިކޮށް ރައީސް އިބްރާހިމް މުހައްމަދު ސޯލިހުގެ ސަރުކާރަކީ ދިވެހިންގެ ވިންދާއެއްގޮތަށް، ދުނިޔޭގެ ހުރިހާ ގައުމަކާއިއެކު ގުޅުންބަދަހިކުރާ ސަރުކާރެއް ކަމަށް ދެންނެވި ކަމަށެވެ. އެގޮތުން ޗައިނާ ސަރުކާރަކީ ދިވެހި ރާއްޖެއަށް ގިނަ އެހީތަކެެެއްދެމުން އަންނަ ގައުމަކަށްވުމާއެކު ދިވެހި ރާއްޖޭގެ ރައްޔިތުންގެ ހިތްތަކުގައި ޗައިނާއަށް އޮންނަ ލޯބީގެ މަތިވެރިކަމާއި ގުޅިގެންވެސް ހިއްސާކުރެއްވި ކަމަށް ވިދާޅުވި އެވެ.
