ހޮނިހިރު ދުވަހުގެ އިރާކޮޅު ހެންވޭރު އަބަދަށްފެހި މަގުގައި ހިނގި އަލިފާނުގެ ހާދިސާގައި ގެތަކަށް ފޫނުބެއްދޭވަރުގެ ގެއްލުން ލިބިފައިވާ ކަމަށް މާލެ ސިޓީ ކައުންސިލުން ބުނެފިއެވެ.
އެ ހާދިސާގައި ތ. ބުރުނި، އައިޝަތު ޝައުނާ ކިޔާ މީހަކު ވަނީ ނިޔާވެފައެވެ. ޝައުނާ ނިޔާވެގެން ދިޔުމަކީ އެކައުންސިލުން އެކަމާއި ހިތާމާކުރާ ކަމެއްކަން ފާހަގަކުރަމުން މާލެ ސިޓީ ކައުންސިލުން ވަނީ ޝައުނާގެ އާއިލާއަށް ތައުޒިޔާ ފޮނުވާފައެވެ. އަދި އެ ހާދިސާގައި ފޫނުބެއްދޭވަރުގެ ގެއްލުމެއް ލިބިފައިވާ ކަމަށް ސިޓީ ކައުންސިލުން ބުންޏެވެ. އެހެން ނަމަވެސް ލިބުނީ ކިހާވަރެއްގެ ގެއްލުމެއް ކަމެއް ހާމައެއް ނުކުރެއެވެ.
ސިޓީ ކައުންސިލްގެ އެ ބަޔާނުގައި އިތުރަށް ބުނީ، އެފަަދަ ހާދިސާތައް ތަކުރާރުވިޔަ ނުދިނުމަށް އަަޅަން ޖެހޭ ފިޔަވަޅުތައް އެޅުމުގެ ގޮތުން މާލޭގައި މީހުން ދިރިއުޅޭ ސަރަހައްދުތަކުގައި ހުރި ކެމިކަލްފަދަ ނުރައްކާތެރި ތަކެތި ރައްކާކުރާ ގުދަންތައް މީހުން ދިރިއުޅޭ ސަރަހައްދުތަކާއި ދުރަށް ބަދަލުކުރުމުގެ ކަންކަން ކުރިޔަށްގެންދުވުމަށް ވަޒީރުންގެ މަޖިލީހުން ނިންމާފައިވާ ނިންމުމަށް މަރުހަބާ ކިޔާކަމަށެވެ. އަދި ކުރިޔަށް އޮތްތާގައި އެފަދަ ކަންތައްތަކުރާރު ވިޔަނުދިނުމުގެ ގޮތުން މީހުން ދިރިއުޅޭ ތަންތަނުގައި ބަހައްޓާފައި ހުރި ގުދަންތައް އެންމެހައި މުއައްސަސާތަކާއި ގުޅިގެން މީހުން ދިރިނޫޅޭ ހިސާބަކަށް ބަދަލުކުރުމުގެ ކަންތައްތައް ވީހާވެސް އަވަހަށް ކޮށްދިނުމަށް ކައުންސިލުން ވަނީ ގޮވާލައިފައެވެ.
މާލޭގައި ހުރި ކެމިކަލްގެ ބާވަތްތައް ރައްކާކުރާ ގުދަންތައް މީހުން ދިރިނޫޅޭ ތަންތަނަށް ބަދަލު ކުރުމުގެ މަސައްކަތް ވީހާ އަވަހަކަށް ފެއްޓެވުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ސޯލިހު ވަނީ ކަމާއިބެހޭ ފަރާތްތަކަށް އާދިއްތަ ދުވަހު އަންގަވައިފައެވެ.
އަލިފާނުގެ ހާދިސާ ހިނގި ވަގުތުން ފެށިގެން އެމްއެންޑީއެފް އާއި ޑިޒާސްޓާ މެނޭޖްމެންޓާއި، ސިޓީ ކައުންސިލްގެ މުވައްޒަފުންގެ އިތުރުން އާންމު ރައްޔިތުން ކޮށްދިން މަސައްކަތަށް ސިޓީ ކައުންސިލުން ވަނީ ޝުކުރު އަދާކޮށްފައެވެ.
