ސަރުކާރުގެ އަމާޒަކީ ޖަލުތައް ބަންދު ކުރާ ހިސާބަށްވެސް ދިއުން :ސްޓޭޓް މިނިސްޓަރ ޒިފްލީން
20 ސެޕްޓެމްބަރު 2019 | ހުކުރު 10:24މިސްރާބުހުރީ ހަމަޖެހިގެން ރައްޔިތުން އުފާފާގަތި ކަމާއިމެދު އުޅޭނެ މުޖުތަމައެއް ރައްޔިތުންނަށް ހޯދައިދިނުން ކަމަށް
ޖަލުން ގައިދީއަކު ނެރޭ މަންޒަރު
ސަރުކާރުގެ އަމާޒަކީ ޖަލުތައް ބަންދުކުރާ ހިސާބަށްވެސް ދިއުން ކަމަށާއި އެ އަމާޒަށް މަސައްކަތް ފަށައިގެން ނޫނީ ކައިރި މުސްތަގުބަލެއްގައި، ރައްޔިތުންނަށް އުފާ ފާގަތި ކަމާއިމެދު އުޅެވޭނެ މުޖުތަމައެއް ނުހޯދައިދެވޭނެ ކަމަށް ޖެންޑަރ މިނިސްޓްރީގެ ސްޓޭޓް މިނިސްޓަރު ޒިފްލީން ހަސަަން ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަ ދައްކަވަމުން ޖެންޑަރ މިނިސްޓްރީގެ ސްޓޭޓް މިނިސްޓަރު ޒިފްލީން ހަސަަން ވިދާޅުވީ މިސްރާބު ހުރީ ވަރަށް އަމާން އަދި ހަމަޖެހިގެން ރައްޔިތުން އުފާ ފާގަތި ކަމާއިމެދު އުޅޭނެ މުޖުތަމައެއް ރައްޔިތުންނަށް ހޯދައިދިނުމަށް ކަމަށެވެ.
ޒިފްލީން އިތުރަށް ވިދާޅުވީ ހަމަޖެހޭ މުސްތަގުބަލެއް ގާއިމުކުރުމަށްޓަކައި ފަރުދީ ޒިންމާ އަދާކުރި ބައެއް ގައުމުތަކަށް ބަލާއިރު، މިހާރު އެ ގައުމުތަކުގެ ޖަލުތަކުގައި ތިބޭނެ ބަޔަކު ނެތް ކަމަށެވެ. އަދި އެހިސާބަށް ރާއްޖެއަށް ނުދެވެންވީ ކީއްވެތޯ ސުވާލު އުފައްދަމުން ޒިފްލީން ވިދާޅުވީ އެ އަމާޒަށް މަސައްކަތް ކޮށްފިނަމަ އެކަން ހާސިލުވާނެ ކަމަށެވެ.
މީގެ އިތުރުން މުޖުތަމައު ދެކޭ ގޮތުންނާއި ރާއްޖޭގެ ސަގާފަތް ބިނާވެފައި އޮންނަ ގޮތުން، އަނިޔާ ލިބޭ ފަރާތްތަކުން އެފަރާތްތަކަށް ލިބޭ އަނިޔާ ފޮރުވަމުން ދިއުމަކީ ކުރިން ރާއްޖޭގައި އޮންނަ އުސޫލު ކަމަށާއި އެހެންނަމަވެސް މިހާރު އެފަދަ އާއިލާތަކުންވެސް އެކަންކަން ހާމަކުރަމުން ދާކަން ޒިފްލީން ފާހަގަ ކުރެއްވިއެވެ. އޭނާ ވިދާޅުވީ އޭގެންވެސް މީހުން މިފަދަ ކަންކަމާއި މެދު ހޭލުންތެރިވެފައިވާ މިންވަރު އަންގައިދޭ ކަމަށެވެ.
ޒިފްލީން އެހެން ވިދާޅުވެފައިވާއިރު ދާދި ފަހުން މާފުށީ ޖަލުގައި 108 ޤައިދީންނާއެކު ރިހެބިލިޓޭޝަން ޕްރޮގްރާމެއް ވަނީ ފަށާފައެވެ.
ރާއްޖޭގެ ޖަލުތަކުގެ ހާލަތު ރަނގަޅުކޮށް، ބޭނުންތެރި ބައެއްގެ ގޮތުގައި ޤައިދީން އަނބުރާ މުޖުތަމައަށް ނެރުމަކީ މި ސަރުކާރުގެ ރިޔާސީ ވައުދެކެވެ.
