ކ. މާލެ
|
19 ސެޕްޓެންބަރ 2019 | ބުރާސްފަތި 00:05
ބިދޭސީއަކު ކުނި އުކާލުމުގައި ހަރަކާތްތެރިވަނީ
ބިދޭސީއަކު ކުނި އުކާލުމުގައި ހަރަކާތްތެރިވަނީ
މުހައްމަދު ޝަރުހާން
ރެގިއުލަރައިޒޭޝަން ޕްރޮގްރާމް
ބިދޭސީން ގާނޫނީ އިމުގެ ތެރެއަށް ވެއްދުމުގެ ޕްރޮގްރާމް މިއަދު ފަށަނީ
 
ޕްރޮގްރާމްގެ ދަށުން ރެގިއުލަރައިޒް ކުރަން ބޭނުންވާ ފަރާތްތަކަށް އައު އެމްޕްލޯއިމަންޓް އެޕްރޫވަލް ދޫކުރެވޭނީ ޑިޕޮސިޓް ފައިސާ ދެއްކުމުން
 
ޕްރޮގްރާމްގެ ދަށުން ރެގިއުލަރައިޒް ވެވޭނީ ރާއްޖޭގައި މަސައްކަތް ކުރުމަށް "އެމްޕްލޯއިމަންޓް އެޕްރޫވަލް" ދޫކޮށްފައިވާ ބިދޭންސީންނަށް
 
ރެގިއުލަރައިޒޭޝަން ޕްރޮގްރާމް ކުރިއަށް ދާނީ އެއް އަހަރު ދުވަހަށް

ރާއްޖޭގައި ގަވައިދާ ހިލާފަށް މަސައްކަތްކުރާ ބިދޭސީން ރެގިއުލޭޓްކޮށް ގާނޫނީ އިމުގެ ތެރެއަށް ވެއްދުމުގެ މަސައްކަތް ސެޕްޓެމްބަރު މަހުގެ 19 ވަނަ ދުވަހު (މިއަދު) ފެށުމަށް ނިންމައިފި އެވެ.

އެއް އަހަރު ދުވަހުގެ މުއްދަތަށް ކުރިއަށްގެންދާ މި ރެގިއުލަރައިޒޭޝަން ޕްރޮގްރާމް ކުރިއަށް ދާނީ ސިވިލް ސާރވިސް ކޮމިޝަން ހިންގަމުން ގެންދާ އިމާރާތުގެ އެއްވަނަ ފަންގިފިލާގައެވެ. ރެގިއުލަރައިޒް ކުރުމުގެ ޕްރޮގްރާމަކީ ޤާނޫނާއި ހިލާފަށް އުޅޭ ބިދޭސީންތައް، ޤާނޫނީ އިމުގެ ތެރެއަށް ވެއްދުމަށް ހިންގާ ޕްރޮގްރާމެކެވެ.

މި ޕްރޮގްރާމްގެ ދަށުން ރެގިއުލަރައިޒް ވެވޭނީ ރާއްޖޭގައި މަސައްކަތް ކުރުމަށް "އެމްޕްލޯއިމަންޓް އެޕްރޫވަލް" ދޫކޮށްފައިވާ ބިދޭންސީންނަށް ކަމަށް އިކޮނޮމިކް މިނިސްޓްރީއިން މައުލޫމާތު ދެއެވެ. މިނިސްޓްރީއިން އިތުރަށް ބުނީ ރެގިއުލަރައިޒް ކުރުމަށް ހުށައަޅާ ފަރާތްތަކުގެ ތެރެއިން ކާކުކަން އަންގައިދޭ ލިޔުން ނެތް ފަރާތްތަކަށް ވެސް "އެމްޕްލޯއިމަންޓް އެޕްރޫވަލް" ދޫކުރެވިފައި ވާނަމަ ރެގިއުލަރައިޒް ކުރެވޭނެކަމުގައެވެ. އަދި ވަޒީފާ ހަމަޖެހިފައިވާ ފަރާތްތަކުން ރެގިއުލަރައިޒްވުމަށް ހުށައަޅަން ޖެހޭނީ ވަޒީފާދޭ ފަރާތްތަކުން "އެކްސްޕެޓް އޮންލައިން ސިސްޓަމް" މެދުވެރިކޮށް ކަމަށް މިނިސްޓްރީއިން ބުންޏެވެ.

ބިދޭސީންނަށް ވަޒީފާ ދޭ ފަރާތަކީ ބިދޭސީ މަސައްކަތްތެރިން ރާއްޖެ ގެނައުމަށް ދޫކުރެވޭ ކޯޓާ އޮތް ފަރާތެއް ނަމަ، އެފަރާތުގެ އަތުގައި ބޭނުން ނުކޮށް ހުރި ކޯޓާ އަށް ބިދޭސީން ރެގިއުލަރައިޒް ކުރުމަށް ހުށައެޅޭނެ ކަމަށާއި އަދި ކޯޓާ ނެތް ފަރާއްތަކުން ކޯޓާއަށް އެދި ހުށައަޅާ ވަގުތު ބިދޭސީން ރެގިއުލަރައިޒް ކުރުމަށް ހުށެއެޅޭނެ ކަމަށް ވެސް އިކޮނޮމިކް މިނިސްޓްރީއިން ވަނީ ބުނެފައެވެ.

ވަޒީފާ ދޭނެ ފަރާތެއް ނެތް ބިދޭސީން ރެގިއުލަރއިޒް ޕްރޮގްރާމަ ފަށާތާ ހަ މަސް ދުވަސް ތެރޭގައި އިކޮނޮމިކް މިނިސްޓްރީއަށް ހާޒިރުވެ ރެގިއުލަރައިޒް ވާން އެދި ބިދޭސީންގެ ދަފުތަރުގައި ރަޖިސްޓްރީވާން ޖެހޭނެއެވެ. މި ދަފްތަރުގައި ރަޖިސްޓްރީވާ ފަރާތްތަކަށް "ރެގިއުލަރައިޒޭޝަން ރަޖިސްޓްރޭޝަން ކާޑް" ދެވޭނެއެވެ. މި ކާޑު ދޫކުރެވޭނީ ހަ މަސް ދުވަހުގެ މުއްދަތަކަށެވެ.

މި ޕްރޮގްރާމްގެ ދަށުން ރެގިއުލަރައިޒް ކުރަން ބޭނުންވާ ފަރާތްތަކަށް އައު އެމްޕްލޯއިމަންޓް އެޕްރޫވަލް ދޫކުރެވޭނީ ޑިޕޮސިޓް ފައިސާ ދެއްކުމުންނެވެ.

ރެގިއުލަރައިޒް ޕްރޮގްރާމްގެ ދަށުން ރެގިއުލަރައިޒް ނުވެ ތިބޭ ބިދޭސީން ލައްވާ މަސައްކަތް ކުރުމަކީ މަނާކަމެކެވެ. އަދި މި ޕްރޮގްރާމްގެ ދަށުން ރެގިއުލަރައިޒް ނުވާ ބިދޭސީންނާއި މެދު ފިޔަވަޅު އެޅިގެން ދާނެއެވެ. އެއްވެސް ސަބަބަކާ ހުރެ ރެގިއުލަރައިޒް ނުކޮށްދެވޭ ބިދޭސީންގެ ދަފްތަރެއް މިނިސްޓްރީން ބަލަހައްޓާނެއެވެ.

ބުދަ ދުވަހު ނޫސްވެރިންނާއި ބައްދަލު ކުރައްވާ ވާހަކަފުޅުދައްކަވަމުން މިކަމާ ގުޅިގެން އިކޮނޮމިކް މިނިސްޓަރ ފައްޔާޒު އިސްމާއިލް ވިދާޅުވީ، ރަޖިސްޓްރީ ކުރުމަށްފަހު ގާނޫނީ އިމުގެ ތެރެއިން މައްސަކަތް ކުރުމަށް މުއައްޒަފުން ބޭނުންވާ ފަރާތްތަކަށް ރަޖިސްޓްރީކުރާ މީހުންގެ ތެރެއިން މީހުން ދެވޭނަކަމަށެވެ. އަދި ގިނަ ފަރާތްތަކަކުން ބިދޭސީންގެ އަތުން ފައިސާ ނަގައި ރާއްޖެ ގެނައުމަށްފަހު ދޫކޮށްލައިފާ އެބަހުރި ކަމަށާއި މި ޕްރޮގްރާމްގެ ދަށުން މިފަދަ ފަރާތްތަކަށް ރާއްޖޭގެ ގާނުނުގެ އިމުގެ ތެރެއަށް ވަދުމުގެ ފުރުސަތު ލިބިގެން ދާނެ ކަމުގައެވެ.

ޕްރޮގްރާމްގެ ދަށުން މިނިސްޓްރީން ގަވައިދާ ހިލާފަށް އުޅޭ ބިދޭސީން ހޯދާ އެމީހުން ރަޖިސްޓްރީ ކުރުމުގެ މަސައްކަތް ކުރާނެ ކަމަށް ވެސް މިނިސްޓަރ ވިދާޅުވިއެވެ.

އަޅުގަނޑުމެން ބެލި ބެލުމުގައި އޭގެ ގިނަ ފަރާތްތަކަކީ ހަމަ ދިވެހި ބަޔަކު އޭގަ ހިމެނިގެން އެމީހުންނަށް ވަޒީފާ ދޭނަމޭ ކިޔާގެން ވަރަށް ބައިވަރު ލާރި އެމީހުން އަތުން ނަގައިފަ ގެނަސް މަގުމައްޗަށް ދޫކޮށްލައިފަ ތިބި މީހުން.
އިކޮނޮމިކް މިނިސްޓަރ ފައްޔާޒު އިސްމާއިލް

ބިދޭސީންގެ މަސައްލައަކީ ގިނަ އަހަރުތަކެއް ވެފައިވާ މައްސަލައެއް ކަމަށާއި އެހެން ނަމަވެސް ބިދޭސީންނާއި ނުލާ ރާއްޖޭގެ އިގްތިސާދު ކުރިއަށް ގެންދެވެން ނެތް ކަމަށް ވެސް މިނިސްޓަރ ވަނީ ފާހަގަ ކުރައްވާފައެވެ. އަދި އެ މައްސަލައަށް ހައްލު ހޯދުމުގައި ގިނަ ފަރާތްތަކާއި މަޝްވަރާކުރެވިފައިވާކަމަށް މިނިސްޓަ ވިދާޅުވި އެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: އަބުދުﷲ ނަސީރު އިބްރާހިމް
0%
100%
0%
0%
0%
0%
ކޮމެންޓް