ވޯލްޑް ހެލްތު އޮގަނައިޒޭޝަން (ޑަބްލިއުއެޗްއޯ) އިން މިނިސްޓްރީ އޮފް ހެލްތަށް ހަދިޔާކުރި "ޖީން އެކްސްޕަރޓް މެޝިން" ތައް 4 އަތޮޅަކަށް ފޮނުވުމަށް ނިންމާފައިވާކަމަށް ހެލްތު މިނިސްޓްރީން ބުނެފިއެވެ.

މި މެޝިނުގެ އެހީގައި މީހެއްގެ ކުޅުގައި ޓީބީ ބަލީގެ ޖަރާސީމު ހުރިތޯ 2 ގަޑިއިރު ތެރޭގައި ޓެސްޓް ކުރެވިގެންދާއިރު، މި ބައްޔަށް ބޭނުންކުރެވޭ ބައެއް ބޭސްތަކަށް އެ ޖަރާސީމުތައް "ރެސިސްޓެންޓް" ކަން ނުވަތަ ނޫންކަން ދެނެގަނެވިގެންދެއެވެ. އެގޮތުން ޑަބްލިއުއެޗްއޯއިން 4 ޖީން އެކްސްޕަރޓް މެޝިން ހަދިޔާކޮށްފައިވާއިރު، އެކަމަށްޓަކައި އަންގާރަ ދުވަހު ހެލްތު މިނިސްޓްރީގައި ވަނީ ޚާއްސަ ރަސްމިއްޔާތެއް ބާއްވާފައެވެ.

މި ރަސްމިއްޔާތުގައި ވާހަކަ ދައްކަވަމުން ހެލްތު މިނިސްޓަރ އަބްދުﷲ އަމީން ވިދާޅުވީ، ސަރުކާރުގެ ފުރަތަމަ 100 ދުވަހުގެ ވައުދުތަކުގެ ތެރެއިން މިހާރުވެސް ރާއްޖޭގެ 2 ސަރަހައްދެއްގައި ޖީން އެކްސްޕަރޓް މެޝިން ބެހެއްޓި ޚިދުމަތްދޭން ފަށާފައިވާ ކަމަށާއި، އޭގެ އިތުރުން އަލަށް ލިބުނު 4 މެޝިން ލ އަތޮޅާއި، ރ އަތޮޅާއި، ޅ އަތޮޅުގެ އިތުރުން އައްޑޫ ސިޓީގެ ސިއްހީ ހިދުމަތްދޭ ތަންތަނުގައި ބެހެއްޓުމަށް ހަމަޖެހިފައިވާ ކަމަށް މިނިސްޓަރ ވިދާޅުވިއެވެ.

މިހާރު ހދ ކުޅުދުއްފުށީ ރީޖަނަލް ހޮސްޕިޓަލާއި، ޑރ.އަބްދުލްސަމަދު މެމޯރިއަލް ހޮސްޕިޓަލުގައި ޖީން އެކްސްޕަރޓް މެޝިން ބެހެއްޓި ޚިދުމަތް ދެމުން ގެންދާއިރު، އިތުރު 4 ރަށުން މި ޚިދުމަތް ލިބުމުން ރާއްޖެއިން ޓީބީ ނައްތާލުމަށް ކުރެވޭ މަސައްކަތްތަކަށް އިތުރު އެހީތެރިކަމެއް ލިބިގެންދާނެ ކަމަށް ހެލްތު މިނިސްޓްރީން ވަނީ ބުނެފައެވެ.

ރާއްޖޭގެ ސިއްހީ ނިޒާމުގެ މިހާރުގެ ހާލަތަށް ބަލާއިރު، އާންމުކޮށް ޓީބީ ދެނެގަތުމަށް ހަދަން ޖެހޭ ޓެސްޓުތައް ހެދުމުގެ މަސައްކަތަށް 3 ދުވަސް ހޭދަވެގެންދާއިރު، މި މެޝިންތައް ބެހެއްޓުމުން ބަލީގެ ކުރީ ކޮޅުގައި ދެނެގަނެވި އަވަސް ފަރުވާ ދިނުމަށް އެހީއަކަށްވެގެންދެއެވެ. އެގޮތުން މި ބައްޔަކީ ބަލީގެ ކުރީކޮޅު އެކަށީގެންވާ ފަރުވާދީގެން އެއްކޮށް ރަނގަޅު ކުރެވޭ ބައްޔަކަށްވާއިރު، ސަރުކާރުން ވަނީ 2022 ވަނަ އަހަރުގެ ނިޔަލަށް ރާއްޖެއިން ޓީބީ ނައްތާލުމަށް އަމާޒު ހިފާފައެވެ.