3 ރަށެއްގައި އިންސިނެރޭޓަރ ބެހެއްޓުމުގެ މަޝްރޫއުގައި ސޮއިކޮށްފި

ރައްކާތެރިކަމާއެކު ކުނި ނައްތާލުމަށްޓަކައި ތިން ރަށެއްގައި އިންސިނެރޭޓަރ ބެހެއްޓުމުގެ މަޝްރޫއުގައި ސޮއިކޮށްފިއެވެ.

އަންގާރަ ދުވަހު މިނިސްޓްރީ އޮފް އެންވަޔަރަމެންޓްގައި އޮތް ރަސްމިއްޔާތެއްގައި ކ. މާފުއްޓާއި ޏ. ފުވައްމުލަކުގެ އިތުރުން ހދ ކުޅުދުއްފުށީގައި އިންސިނެރޭޓަރ ބެހެއްޓުމުގެ މަޝްރޫއުގައި ވަނީ ސޮއިކޮށްފައެވެ. އެގޮތުން ކުޅުދުއްފުއްޓާއި ފުވައްމުލަކަށް ގެންދިއުމަށް ހަމަޖެހިފައިވާ އިންސިނިރޭޓަރ ޤާއިމު ކުރުމުގެ މަސައްކަތް ހަވާލު ކުރެވިފައިވަނީ މެކްސްޓަރ މޯލްޑިވްސް ޕްރައިވެޓް ލިމިޓެޑަށެވެ.

މި އެއްބަސްވުންތަކުގައި މިނިސްޓްރީގެ ފަރާތުން ސޮއިކުރެއްވީ އެންވަޔަރމަންޓް މިނިސްޓަރ ޑރ.ހުސައިން ރަޝީދް ހަސަންއެވެ.

މި މަސައްކަތް ނިންމުމަށް އެ ކުންފުންޏަށް 119 ދުވަސް ދީފައިވާއިރު، މާފުށީގައި ބެހެއްޓުމަށް ހަމަޖެހިފައިވާ އިންސިނެރޭޓަރ ޤާއިމު ކުރުމަށް ކޮރަލް ލައިފް ޕްރައިވެޓް ލިމިޓެޑް ކިޔާ ކުންފުންޏަކަށް ހަވާލުކޮށް މަސައްކަތް ނިންމުމަށް 45 ދުވަހުގެ މުއްދަތެއް ވަނީ ދީފައެވެ. އެގޮތުން މިނިސްޓަރ ވިދާޅުވީ، މި މަޝްރޫއުގެ ސަބަބުން ކ. މާފުށީގެ ޓޫރިޒަމަށްވެސް އިތުރު ކުރިއެރުންތަކެއް ލިބިގެންދާނެ ކަމަށެވެ.

އިންސިނެރޭޓަރތައް ޤާއިމުކުރުމުން މި ރަށްރަށުގެ ކުނީގެ މައްސަލައަށް ހައްލެއް ލިބިގެންދާނެކަމަށް މިނިސްޓްރީން ބުނެފައިވެއެވެ.

ރަސްމިއްޔާތަށްފަހު "ރާއްޖެއެމްވީ އަށް ދެއްވި ޚާއްސަ އިންޓަރވިއުއެއްގައި ކުޅުދުއްފުށީ ކައުންސިލްގެ ރައީސް އަބްދުލް ލަތީފް ހަސަން ވިދާޅުވީ، ފާއިތުވި 20 އަހަރު ތެރޭގައި އެރަށުގެ ކުނީގެ މައްސަލަ ވަނީ ވަރަށް ބޮޑުވެފައި ކަމަށެވެ. އަދި މިހާރުވެސް 115،000 ޓަނަށްވުރެ ގިނަ ކުނި ކުޅުދުއްފުށީގެ ކުނި ކޮއްޓަށް ޖަމާވެފައިވާކަމަށް އޭނާ ވިދާޅުވި އެވެ.

މި ރަށްރަށުގައި ޤާއިމުކުރުމަށް ނިންމަވާފައިވާ އިންސިނެރޭޓަރތަކުން ދުވާލެއްގެ މައްޗަށް 4 ޓަނުގެ ކުނި ރައްކާތެރިކަމާއެކު ނައްތާލެވިގެންދާނެ ކަމަށް މިނިސްޓްރީން މައުލޫމާތު ދެއެވެ.