ސަލްމާން ހާން ހަދިޔާއަކަށް ފްލެޓެއް ދިން ވާހަކަ ރަނޫ ދޮގުކޮށްފި
15 ސެޕްޓެމްބަރު 2019 | އާދީއްތަ 11:38ސަލްމާންގެ ފަރާތުން ރަސްމީކޮށް އެކަމާއި ބެހޭ ގޮތުން ވާހަކަ ދައްކާފައެއް ނުވޭ
ރަނޫ މޮންޑާލް
ރެއިލްވޭ ސްޓޭޝަން ގައި ލަވައެއް ކިޔައިގެން އިންޓަނެޓުން މަޝްހޫރުކަން ހޯދީ ރަނޫ މޮންޑަލް އަށް ސަލްމާން ހާން ފްލެޓެއް ދިން ވާހަކަ އޭނާ ދޮގުކޮށްފިއެވެ. އިންޑިއާ މީޑިއާ ތަކުގައި އަޑު ފެތުރިފައިވާ ގޮތުން ސަލްމާން ވަނީ ރަނޫ އަށް 50 ލައްކަ ރުޕީސްގެ އަގުހުރި ފްލެޓެއް ހަދިޔާ ކޮށްފައެވެ. އެހެން ނަމަވެސް މިހާތަނަސް ރަސްމީކޮށް ސަލްމާން އެކަހަލަ ވާހަކަ ދައްކާފައެއް ނުވެއެވެ.
އިންޑިއާގެ މުނިފޫހިފިލުވުމުގެ ހަބަރު ގެނެސްދޭ މިޑްޑޭ އަށް ދިން އިންޓަވިއުއެއްގައި ރަނޫ ބުނީ، އޭނާ އަށް އެއްވެސް ކަހަލަ ހަދިޔާއެއް ސަލްމާންގެ ފަރާތުން ލިބިފައިނުވާ ކަމަށާއި، އަދި އެކަމާއި ބެހޭ ގޮތުން ސަލްމާން ވާހަކަ ދައްކާފައި ނުވާއިރު އެއީ ތެދެއް ކަމުގައި ގަބޫލްނުކުރާ ކަމަށެވެ.
އިންޑިއާގެ މަޝްހޫރު ލަވަކިޔުންތެރިޔާ ލަތާ މަންގޭޝްކަރުގެ ''އެކް ޕިޔާރުކާ ނަގްމާހޭ'' ލަވަކިޔައިގެން އާއްމުންގެ ހިތް އަތުލައިގަތް ރަނޫ އަށް ހިމޭޝް ރެޝަމިއްޔާ ވަނީ އޭނާގެ ފަހުގެ ފިލްމު "ހެޕީ ހާރޑީ އެންޑް ހީރް" ގެ ލަވައެއް ކިޔުމުގެ ފުރުސަތު ދީފައެވެ. ރަނޫ ރިކޯޑް ކޮށްފައިވަނީ "ތޭރީ މޭރީ ކަހާނީ" ނަމަކަށް ކިޔާ ލަވައެވެ.
