ދަނގެތީގެ އޮޑިދޯނި ފަހަރު އެހެލާ ސަރަހައްދުގައި ހަރުގެ ފަދަ ތަންތަން އެޅުން ވަގުތީގޮތުން މަނާކޮށްފި
13 ސެޕްޓެމްބަރު 2019 | ހުކުރު 09:04މިހާރުހުރި އެފަދަ ހަރުގެތައް ރޫޅާލާ އެއްމަސް ދުވަހުގެ ތެރޭގައި ބިން ސާފުކުރަންޖެހޭ
އދ.ދަނގެތި
އދ.ދަނގެތީގެ އޮޑިދޯނި ފަހަރު އެހެލާ ސަރަހައްދުގައި ހަރުގެ ފަދަ ތަންތަން އެޅުން ވަގުތީގޮތުން މަނާކޮށްފިއެވެ.
ދަނގެތި ކައުންސިލުން ބުނީ އެރަށުގައި އުޅަނދު ފަހަރު އެހެލުމަށާއި މަރާމާތު ކުރުމަށް، އަދި އުޅަނދުފަހަރު ބަނުމަށް، ޚާއްސަކޮށްފައިވާ ރަސްމީ ސަރަހައްދު ކަމަށްވާ، ރަށުގެ އިރުމަތީ ފަރާތުން ކާމިނީގެ މަގުގެ އުތުރުން، ކުނިކޮށި ސަރަޙައްދު ހިމެނިގެންވާ ގޮތައް މުޅިއެބިމުގައި، އަދި ޚާއްސަކޮށް، މިހާރު މަރާމާތު ކުރަމުން ގެންދާ ދަގަނޑު ޓަގުބޯޓް ހިމެނޭ ބިން ހިމެނިގެންވާ ގޮތުން، ހުސްވާ އެއްވެސް ބިމެއްގައި، މިކައުންސިލް އިދާރާއިގެ ހުއްދަ ނުހޯދާ އެއްވެސް ފަރާތަކުން، އެއްވެސް ބާވަތެއްގެ ހަރުގެއެއްފަދަ ތަނެއް، ނުވަތަ ވަގުތީ ހިޔާގަނޑެއް ވިޔަސް އެޅުމަކީ، މަނާކަމެއް ކަމަށެވެ.
ކައުންސިލުން ބުނީ ދަގަނޑު ޓަގުބޯޓް އެހެލާފަ ހުރި ބިމުގައި ވިޔަސް އަދި މިސަރަހައްދުގެ އިތުރު ބިމެއްގައި ނުވަތަ އެސަރަހައްދު ގައިހުރި ހަރުގެ ތަކުގައި ނުވަތަ ހިޔާގަނޑު ތަކުގައި ހުރިނަމަވެސް މިހާރުހުރި އުޅަނދުތައް އެތަންތަނުން ބޭލުމާއެކު، އެތަންތަނައް އެއްވެސް ބާވަތެއްގެ އުޅަނދެއް ފަދަ އެއްޗެއް ވިޔަސް އެހެލުމާއި ވެއްދުމާއި ބޭނުންކޮށް ހެދުމަކީ، މަނާކަމެއް ކަމަށެވެ.
މީގެ އިތުރުން ކައުންސިލުން ބުނީ މިހާރުހުރި އެފަދަ ހަރުގެތަކާއި، ހިޔާގަނޑުތައް ހުރި ސަރަހައްދުން އެއުޅަނދެއް ބާލާތާ އެއް މަސްދުވަހުގެ ތެރޭގައި ރޫޅާލައި ބިންސާފުކުރަން ޖެހޭ ކަމަށެވެ.
ކައުންސިލުން ބުނީ މިގޮތަށް ކަނޑައަޅާއި ހަމަޖައްސަން ޖެހުނު އެންމެބޮޑު ސަބަބަކީ، ހުއްދަނުހޯދާ ގަވާއިދާ ހިލާފަށް ބައެއް ފަރާތްތަކުން ހަރުގެ، ހިޔާގަނޑުފަދަ ތަންތަން އަޅާފައިހުރުމާއި އަދި ގަވާއިދާއި އުސޫލްގެ ތެރެއިން އަލަށް އުޅަނދުފަހަރު ބަނުމަށާއި، އަދި އޮޑިމަރާމާތު ކުރުމުގެ މަސައްކަތްތަކަށް ހަރުގެ އެޅުމަށްވެސް ގިނަފަރާތް ތަކަކުން ބިންހޯދުމަށް އެދެމުން ދިއުމާއެކު އެފަރާތް ތަކަށްވެސް ހަމަހަމަ އުސޫލެއްގެ ތެރެއިން ފަހިފުރުސަތެއް ހޯދާދިނުމަކީ، ކައުންސިލްގެ ޒިންމާއެއް ކަމަށްވާތީ ކަމަށެވެ.
ކައުންސިލުން ބުނީ އެސަރަހައްދުގެ އިންތިޒާމްތައް ރަނގަޅުކޮށް އެސަރަހައްދު ތަރުތީބު ކުރުމަށް ގޮތްތަކެއް ކަނޑައެޅެމުގެ މަސައްކަތް މިހާރު ކުރަމުން ގެންދާތީ ކަމަށެވެ.
ކައުންސިލުން ބުނީ މިއުސޫލާ އެއްގޮތަށް އަމަލުނުކޮށް، އެފަދަ ތަންތަން ( ހަރުގެ، ހިޔާގަނޑު ) ފަދަ ތަންތަން ބޭނުންކުރަމުން ގެންދާނަމަ އެފަރާތަކާމެދު ދަތި ކުރުމުގެ ގޮތުން އެޅެންހުރި ފިޔަވަޅުތައް އިދާރީ ގޮތުން އަޅާނެ ކަމަށާއި، އަދި ގާނޫނީގޮތުން އެކަން ހުއްޓުވުމަށް ކުރަންޖެހޭ އެންމެހާ ކަންކަން، ހަމަޖެހިފައިވާ އުޞޫލުގެ ތެރެއިން ކުރާނެ ކަމަށެވެ.
