ކުޅުން ހުއްޓާލި ކަމުގެ އިޝާރާތެއް އެޓޫ ކޮށްފި

ކުޅުން ހުއްޓާލި ކަމުގެ އިޝާރާތެއް ކެމަރޫންގެ ލެޖެންޑު ސެމުއެލް އެޓޫ ކޮށްފިއެވެ.

އުމުރުން 38 އަހަރުގެ އެޓޫ އިންސްޓަގްރާމްގައި ކުރި ޕޯސްޓެއްގައި ބުނީ، މިހާ ހިސާބުން ނިމުނީ ކަމަށާއި، ދެން އޮތީ އާ ކަންތައްތަކަކާ ކުރިމަތިލުން ކަމަށެވެ.

އެޓޫ މިހާރު ކުޅެމުން އަންނަނީ ގަތަރުގެ ގަތަރު ސްޕޯޓްސް ކްލަބަށެވެ. އޭނާ މިދިޔަ ހަތަރު ސީޒަން ހޭދަކޮށްފައިވަނީ ތުރުކީގެ ކްލަބްތަކާއެކުގައެވެ.

ސްޕެއިންގެ ރެއާލް މެޑްރިޑް އަދި ބާސެލޯނާއަށްވެސް ކުޅެފައިވާ އެޓޫ ވަނީ އިޓަލީގެ އިންޓަ މިލާންގެ އިތުރުން ޕްރިމިއާ ލީގުގެ ޗެލްސީއަށްވެސް ކުޅެފައެވެ.

ބާސެލޯނާއާއެކު ތިން ލަލީގާ ކާމިޔާބުކޮށްފައިވާ އެޓޫ ވަނީ އެ ކްލަބާއެކު ކޮޕަޑެލްރޭ އާއި ސްޕެނިޝް ސުޕަކަޕް ދެފަހަރު އަދި ޔުއެފާ ޗެމްޕިއަންސް ލީގު ދެފަހަރު ކާމިޔާބުކޮށްފައެވެ.

އިންޓަ މިލާންއާއެކު އިޓާލިއަން ލީގު ކާމިޔާބުކޮށްފައިވާ އެޓޫ ވަނީ އެޓީމާއެކު ކޮޕަޑެލްރޭ ދެފަހަރު ކޮޕަ އިޓަލިއާ އެއްފަހަރު، ޗެމްޕިއަންސް ލީގު އެއްފަހަރު އަދި ފީފާ ކްލަބް ވޯލްޑް ކަޕް އެއްފަހަރު ކާމިޔާބުކޮށްފައެވެ.

އެޓޫ އަކީ ކެމަރޫންއަށް މިހާތަނަށް އެންމެ ގިނަ ލަނޑު ޖަހައިދިން ކުޅުންތެރިޔާއެވެ. އޭނާ ވަނީ އެގައުމަށް ކުޅުނު 118 މެޗުގައި 56 ލަނޑު ކާމިޔާބުކޮށްފައެވެ.

ކެމަރޫންއާއެކު އެފްރިކަން ކަޕް އޮފް ނޭޝަންސް ދެފަހަރު ކާމިޔާބުކޮށްފައިވާ އެޓޫ ވަނީ އެޓީމާއެކު އޮލިމްޕިކް ރަން މެޑަލް 2000 ވަނަ އަހަރު ކާމިޔާބުކޮށްފައެވެ.

އެފްރިކާގެ މޮޅު ކުޅުންތެރިޔާގެ މަގާމު ހަތަރު ފަހަރު ހޯދާފައިވާ އެޓޫއަކީ ކަޕް އޮފް ނޭޝަންސް އަދި މަޔޯކާގެ އެންމެ ގިނަ ލަނޑު ޖެހި ކުޅުންތެރިޔާއެވެ.